މާލޭގެ ޕާކިން މައްސަލައަށް ހައްލެއް ހޯދުމުގެ ގޮތުން އިމާރާތްކުރާ ދެ ޕާކިން ބިލްޑިންގެ މަސައްކަތް އަންނަ އަހަރުގެ ނޮވެމްބަރު މަހުގެ ކުރިން ނިންމަވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު މުހައްމަދު ސައީދު ވިދާޅުވީ، ހީނާމާގޭގައި ހަދާ ޕާކިން އިމާރާތުގެ މަސައްކަތް ކޮންޓްރެކްޓަރަކާ ހަވާލުކޮށް، އެންމެ ފަހުގެ މައުލޫމާތުތައް ސާފުކުރުމުގެ މަސައްކަތް މިހާރު ކުރެވެމުންދާ ކަމަށެވެ. އަދި ދެވަނަ ބިމެއްގެ ގޮތުގައި ސޯސަންމަގުގައި ހުންނަ ދިވެހިރާއްޖޭގެ ޤައުމީ ޔުނިވާސިޓީއާ ޖެހިގެން އޮތް ބިމުގައި ހަދާ ޕާކިން ބިލްޑިންގެ މަސައްކަތް ވެސް ކޮންޓްރެކްޓަރަކާ ހަވާލުކުރުމަށް ވާންޖެހޭ އެންމެ ފަހުގެ ތައްޔާރީތައް ކުރިއަށްދާ ކަމަށް އެމަނިކުފާނު ވިދާޅުވިއެވެ.
މި މަޝްރޫއަކީ ގްރޭޓާ މާލެ ސަރަހައްދުގެ ޕާކިން މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ސަރުކާރުން ހިންގުމަށް ހަމަޖެހިފައިވާ މުހިންމު މަޝްރޫއެކު މާލެއާއި ހުޅުމާލެ އަދި ވިލިމާލެ ހިމެނޭގޮތަށް ޖުމްލަ 7 ޕާކިން ބިލްޑިން ތަރައްގީކުރުމަށް ސަރުކާރުން ވަނީ ނިންމާފައެވެ. މި އިމާރާތްތައް ނިމިގެންދާއިރު ހަތަރު ފުރޮޅުލީ އުޅަނދުތަކަށް 2600 އަށްވުރެ ގިނަ ޖާގަ އަދި ދެ ފުރޮޅުލީ އުޅަނދުތަކަށް 1000 ޖާގަ ލިބިގެންދާނެ ކަމަށް ސަރުކާރުން ބުނެފައިވެއެވެ.
މިނިސްޓަރު ސައީދު ފާހަގަކުރެއްވި ގޮތުގައި މިއީ މާލޭގެ ޓްރެފިކާއި ޕާކިންގެ ދަތިތަކަށް މީގެ ކުރިން ގެނެވިފައި ނުވާފަދަ ބޮޑު ހައްލެކެވެ. މި މަޝްރޫއުގެ ސަބަބުން ރައްޔިތުންނަށް ދިމާވެފައިވާ ދަތިތަކަށް ލުޔެއް ލިބި، މާލޭގެ މަގުތައް ތަރުތީބުވެގެންދާނެ ކަމަށް ސަރުކާރުން އުންމީދުކުރެއެވެ.
ކިޔުންތެރިންގެ ހިޔާލު