ރާއްޖޭގެ ވިޔަފާރިއާއި އިޤުތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް ޒަމާނީކުރުން ކަމަށް އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ވަޒީރު ވަނީ މާލެ ވިޔަފާރި ބަނދަރުގެ މުހިންމުކަމާއި، އެ މަސައްކަތް ކުރިއަށްގެންދެވުމަށް ރައީސުލްޖުމްހޫރިއްޔާ ދެއްވާ އަހައްމިއްޔަތު ހާމަކުރައްވާފައެވެ. ބަނދަރުގެ ޙާލަތު ބަދަލުކޮށް، އަދުގެ އިޤުތިޞާދީ ހަޤީޤަތްތަކާ ފައިހަމަކުރުމަކީ ވިޔަފާރީގެ ކާރުބާރު ހަލުވިވެ ފަސޭހަވެގެންދާނެ ކަމެއްކަން ވަޒީރު ފާހަގަކުރެއްވިއެވެ.
މި ކަމުގެ ޚިޔާލު ކުރެވޭތާ އެތައް އަހަރެއް ވެފައިވީ ނަމަވެސް، މައި ވިޔަފާރި ބަނދަރު ކުރިން އޮތީ އެންމެ ފުރަތަމަ ޤާއިމްކުރި ފެންވަރުގައި ކަމަށް ވަޒީރު ވިދާޅުވިއެވެ. ކުރީގެ ސަރުކާރުތަކުން ގެނެސްދީފައިވަނީ ވަރަށް ކުދިކުދި ބަދަލުތަކެއް ކަމަށްވެސް ސަޢީދު ފާހަގަކުރެއްވިއެވެ.
މި ޙާލަތު ބަދަލުކުރެއްވުމަށް އިސްނަންގަވައި، އެކަމުގެ ޢަމަލީ މަސައްކަތްޕުޅު ފައްޓަވައި، ޤައުމުގައި ހުރި މިފަދަ އެތައް ބޮޑެތި މައްސަލަތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޙައްލުކުރައްވަމުން ގެންދަވަނީ ހިކުމަތްތެރިކަމާއެކު ކަމަށް ވަޒީރު ވިދާޅުވިއެވެ. ދުނިޔޭގެ މަސްރަޙަށް އަންނަ ބަދަލުތަކާއި އިޤުތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވާން ދޫނުކޮށްލައްވާނެކަން ރައީސް ސާބިތުކޮށްދެއްވާ ކަމަށްވެސް ވިދާޅުވިއެވެ.
މާލޭ ވިޔަފާރި ބަނދަރުގެ މަސައްކަތްތަކުގެ އެންމެ ފަހުގެ މަޢުލޫމާތު މޯލްޑިވްސް ޕޯޓްސް လިމިޓެޑުން ވަނީ ހިއްސާކޮށްފައެވެ. އެމްޓީސީސީއާ ހަވާލުކޮށްގެން ކުރިއަށްގެންދިޔަ ސަތޭކަ މީޓަރުގެ ކީވޯލްގެ މަސައްކަތް ނިމި، މިހާރު ކުރިއަށްދަނީ ޔާރޑުގެ ޕޭވިންގ މަސައްކަތްތަކެވެ. މި މަސައްކަތް އޮކްޓޫބަރު މަހުގެ ކުރީކޮޅު ނިމޭނެ ކަމަށް ލަފާކުރެވެއެވެ.
އެމްޕީއެލްއިން މާލޭ ބަނދަރުގެ މި ސަރަޙައްދު ތަރައްޤީކުރަނީ ޑޮމެސްޓިކް އޮޕަރޭޝަންތަކަށެވެ. މާލޭ ބަނދަރުގެ މަސައްކަތް ފުރިހަމަވުމުން، މިހާރު މާލޭގައި ކުރިއަށްދާ ދޯނި ކާރގޯ ކްލިއަރެންސްގެ ޚިދުމަތްތައް ތިލަފުއްޓަށް ބަދަލުކުރެވޭނެއެވެ.
ތިލަފުށީގައި ދޯނި ކާރގޯ ކްލިއަރެންސް ފެށުމަށްޓަކައި ބޭނުންވާ އިތުރު އުމްރާނީ ވަސީލަތްތައް ޤާއިމްކުރުމުގެ މަސައްކަތް މިހާރު ދަނީ ކުރިއަށެވެ. އެގޮތުން ވަގުތީ ވޯކްޝޮޕާއި، ކެންޓީނާއި، އޮފީހާއި، މަޖޫރީން މަޑުކުރާ ސަރަޙައްދުގެ އިތުރުން މިސްކިތް ހެދުމުގެ މަސައްކަތް އެމްޕީއެލްގެ ޓީމުތަކުން ކުރަމުންދެއެވެ.
ތިލަފުށީގައި ޤާއިމްކުރާ ބައިނަލްއަޤްވާމީ ބަނދަރުގެ ތިންސަތޭކަ ހަތްދިހަ ފަސް މީޓަރުގެ ކީވޯލާއި، ޖުމްލަ ދެ ކިލޯމީޓަރުގެ ޑޮމެސްޓިކް ކީވޯލްގެ ބައެއް މަސައްކަތްތައް ޗައިނާ ހާބަރ އިންޖިނިއަރިންގ ކޮމްޕެނީއާ ހަވާލުކޮށްގެން ދަނީ ކުރަމުންނެވެ. އަށްސަތޭކަ ވިހި މީޓަރުގެ ކީވޯލަށް ބޭނުންވާ ބިން ހިއްކުމުގެ ސާޅީސް އިންސައްތަ ނިމިފައިވާއިރު، ކީވޯލްގެ ޕްރީކާސްޓް ޔުނިޓުތައް ހެދުން ކުރިއަށް އޮތް މަހު ފެށޭނެއެވެ.
ތާވަލާ އެއްގޮތަށް ދިޔަނަމަ ޑޮމެސްޓިކް ކީވޯލްގެ މަސައްކަތް މިއަހަރުގެ ނޮވެމްބަރު މަހުގެ ނިޔަލަށް ނިމޭނެއެވެ. އަދި އިންޓަރނޭޝަނަލް ކީވޯލްގެ މަސައްކަތް ދެހާސް ސަތާރަވަނަ އަހަރުގެ ޖުލައި މަހުގެ ތެރޭގައި ނިންމާލެވޭނެ ކަމަށް އެމްޕީއެލްއިން ލަފާކުރެއެވެ.
ތިލަފުށީ ބަނދަރުގެ އޮޕަރޭޝަންތަކަށް ބޭނުންވާ ވަސީލަތްތައް ހޯދުމުގެ މަސައްކަތްވެސް އެމްޕީއެލްއިން ވަނީ ފަށާފައެވެ. އެގޮތުން ދެ އެސްޓީއެސް ކްރޭނާއި މޯބައިލް ހާބަރ ކްރޭނެއް ހޯދުމުގެ މަސައްކަތް ކުރިއަށްދާއިރު، ދެހާސް ސަތާރަވަނަ އަހަރުގެ އޮކްޓޫބަރު މަހުގެ ފަނަރަވަނަ ދުވަހުގެ ކުރިން މި ތަކެތި ރާއްޖެ ގެނައުމަށް ވަނީ އަމާޒުހިފާފައެވެ.
ކިޔުންތެރިންގެ ހިޔާލު