މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މުޅި މަޝްރޫއު 2028 ވަނަ އަހަރުގެ ނޮވެމްބަރު މަހުގެ ކުރިން އެއްކޮށް ނިންމުމަށް އަމާޒު ހިފާފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ތިލަފުށީގައި ކުރިއަށްދާ ޕޯޓު މަޝްރޫއުގެ މަސައްކަތްތައް ބައްލަވައިލެއްވުމަށް ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ކުރެއްވި ޒިޔާރަތުގެ ތެރެއިން ނޫސްވެރިންނަށް މައުލޫމާތު ދެއްވަމުން، މިނިސްޓަރު ސައީދު ވިދާޅުވީ މިއީ ރައީސުލްޖުމްހޫރިއްޔާ އެންމެ އިސްކަންދެއްވައިގެން ގާތުން ބައްލަވަމުން ގެންދަވާ އެންމެ މުހިންމު އެއް މަޝްރޫއު ކަމަށެވެ. ފާއިތުވި ފަނަރަ ނުވަތަ ވިހި އަހަރު ދުވަހު އެކި ސަރުކާރުތަކުން މި ވާހަކަ ދެއްކި ނަމަވެސް، ރާއްޖޭގެ އިގުތިސާދު އެހެން ހަރުފަތަކަށް ގެންދިއުމަށް އޮތް އެންމެ ބޮޑު ހުރަހަކީ މާލޭ ބަނދަރުގެ ޖާގައިގެ ދަތިކަން ކަމަށްވެސް މިނިސްޓަރު ފާހަގަކުރެއްވިއެވެ.
މި މަޝްރޫއު ކުރިއަށް ދަނީ ތިލަފުށީގައެވެ. މަޝްރޫއުގެ ފުރަތަމަ ފިޔަވަހި އަންނަ އަހަރުގެ ނޮވެމްބަރު އެގާރަ ވަނަ ދުވަހުގެ ކުރިން ނިންމުމަށް ވަނީ ތަރުތީބުކުރެވިފައެވެ.
މުޅި މަޝްރޫއު އެއްކޮށް ނިމޭއިރު ބައިނަލްއަގުވާމީ ކީ-ވޯލްއަކާއި ބަނދަރެއްގެ އިތުރުން ވެއާހައުސްތަކާއި ސްޓޯރޭޖް އަދި އަތޮޅު ފިހާރަތައް ތިލަފުއްޓަށް ބަދަލުކުރެވޭނެއެވެ. މީގެ އިތުރުން ގޯޑައުން ސްޕޭސްއާއި ފްރީ ޒޯނެއް ގާއިމުކޮށް، ބްރިޖު މެދުވެރިކޮށް މާލެއާއި ހުޅުމާލެއަށް މުދާ އުފުލޭނެ އިންތިޒާމު ހަމަޖެހިގެންދާނެއެވެ. ވައިގެ މަގުން މުދާ އުފުލުމަށްޓަކައި ކަނޑާއި ވައިގެ މަގު ގުޅުވައިދޭ ކާގޯ ހިދުމަތް އެއާޕޯޓާ ގުޅާލެވޭނެ ކަމަށްވެސް މިނިސްޓަރު ވިދާޅުވިއެވެ.
ރާއްޖޭގެ އިގުތިސާދުގައި އިންވެސްޓުކުރާ ފަރާތްތަކަށް މި މަޝްރޫއުގެ ސަބަބުން ބޮޑު ލުޔެއް ލިބިގެންދާނެއެވެ. އަމިއްލަ ސެކްޓަރުން އަންދާޒާކުރާ ގޮތުގައި އިމާރާތްކުރުމާއި ފަތުރުވެރިކަމުގެ ދާއިރާގައި އެގާރަ ބިލިއަން ޑޮލަރުގެ އިންވެސްޓްމަންޓްތައް މިހާރުވެސް އެބަހުއްޓެވެ. މުދާ ބޭލުމުގައި ހުރި ދަތިތަކަށް ހައްލު ލިބުމަކީ ދެ ހާސް ސާޅީސް ވަނަ އަހަރަށް ކަނޑައަޅާފައިވާ އިގުތިސާދީ ތަސައްވުރު ހާސިލުކުރުމަށް އެޅޭ ވަރުގަދަ ބިންގަލެކެވެ.
އާންމު ރައްޔިތުންގެ ދިރިއުޅުމުގެ ހަރަދުތަކަށްވެސް މީގެ ސަބަބުން ބޮޑު ލުޔެއް ލިބޭނެއެވެ. ކާބޯތަކެއްޗާއި ތަރުކާރީ އަދި މޭވާ ފަދަ ތަކެތި ކްލިއާކުރުމަށް މިހާރު ހަތް ދުވަސް ނުވަތަ އަށް ދުވަސް ނަގައެވެ. ނަމަވެސް އާ ބަނދަރުގެ ހިދުމަތާއެކު އެއް ދުވަހުގެ ތެރޭގައި މުދާ ކްލިއާކޮށް، ތާޒާކަންމަތީ ފިހާރަތަކަށް ފޯރުކޮށްދެވޭނެއެވެ.
މިހާރު ތިލަފުށީގައި އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ ސަތޭކަ މީޓަރުގެ މަސައްކަތް ވަނީ ނިމިފައެވެ. ބިންގަނޑު އެއްވަރުކުރުމާއި މަގުތައް ހެދުމުގެ މަސައްކަތް ކުރިއަށްދާއިރު، އެތެރޭގެ ކީ-ވޯލްގެ ހިއްކި ސަރަހައްދު ބެކްފިލް ކުރުމުގެ ސާޅީސް އިންސައްތަ މަސައްކަތް ވަނީ ނިމިފައެވެ. ކޮންކްރީޓް ބްލޮކްތައް އުފެއްދުމާއި މެޝިނަރީ ހޯދުމުގެ މަސައްކަތްވެސް ދަނީ ހިނގަމުންނެވެ.
ސަރުކާރުން މައުލޫމާތުދޭ ގޮތުގައި ތިލަފުށީގައި ގާއިމުކުރެވޭ ސައްތަ ހެކްޓަރުގެ ބަނދަރު ހުޅުވޭއިރު އަހަރަކު ތިން ސަތޭކަ ނަވާދިހަ ހާސް ޓީއީޔޫގެ ކެޕޭސިޓީ ހުންނާނެއެވެ. މުޅި މަޝްރޫއު ނިމޭއިރު މި އަދަދު އަހަރަކު އެކެއް އިންސައްތަ އަށް މިލިއަން ޓީއީޔޫ އަށް އިތުރުކުރެވޭނެއެވެ. ބަނދަރު ހުޅުވާނީ ސާދަ އިންސައްތަ ހަ މީޓަރުގެ ފުންމިނުގައި، ތިން ސަތޭކަ ތިއެދިހަ ފަސް މީޓަރުގެ ކީ-ވޯލަކާއެކުގައެވެ.
އެތެރޭގެ އުޅަނދުފަހަރަށް ހާއްސަކޮށް ދެ ކިލޯމީޓަރަށް ވުރެ ދިގު ކީ-ވޯލެއް ހެދޭނެއެވެ. މުދާ ބަރުކޮށް ބާލައި ހެދުމުގެ ވަގުތު ދެ ދުވަހަށް ކުރުކުރެވޭނެ ކަމަށް އަންދާޒާކުރެވެއެވެ. މިހާރު މާލޭ ބަނދަރުގައި އެކަމަށް ހަތް ދުވަހާއި ސާދަ ދުވަހާ ދެމެދުގެ މުއްދަތެއް ނަގައެވެ. ބަނދަރު ހުޅުވާއިރު ޒަމާނީ ކްރޭންތައް ގާއިމުކުރެވިގެންދާނެއެވެ.
ކިޔުންތެރިންގެ ހިޔާލު