އައިޖީއެމްއެޗުގައި މަސައްކަތްކުރި ފިލިޕީންސްގެ ނަރުސް މޭރީ ގްރޭސް މަރާލިކަން ސާބިތުވެ، އޭނާގެ ފިރިމީހާ މާވިން އެސްވައި އުމުރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ.
މޭރީ ގްރޭސް މަރާލުމުގެ ކުށް ސާބިތުވާކަމަށް ކްރިމިނަލް ކޯޓުން މީގެ ކުރިން ކަނޑައަޅާފައިވާއިރު، މިއަދު ކުރިއަށްދިޔައީ އަދަބު ކަނޑައެޅުމުގެ މަޖިލީހެވެ. ދައުލަތުން ވަނީ މާވިންގެ ފަރާތުން ފެނިފައިވަނީ ރަހުމެއް އަދި ހަމްދަރުދީއެއް ނެތް އަމަލެއްކަން ފާހަގަކޮށް، ގާނޫނުގައި އޮންނަ އެންމެ ހަރުކަށި އަދަބު ދިނުމަށް އެދިފައެވެ. ކޯޓުން ވަނީ ދައުލަތުގެ އެދުމާ އެއްގޮތަށް މާވިން އުމުރަށް ޖަލަށްލުމަށް ނިންމައި ހުކުމް އިއްވާފައެވެ.
މޭރީގެ ހަށިގަނޑު އައިޖީއެމްއެޗަށް ގެންދިޔައީ 2021 ވަނަ އަހަރުގެ އޮކްޓޯބަރު މަހުގެ ތެރޭގައި ދަންޖެހިފައިވާކަމަށް ބުނެއެވެ. ނަމަވެސް އޭނާގެ މަރުގައި ޝައްކުކުރެވޭ ކަންތައްތަކެއް ހުރުމުން، މާވިން ހައްޔަރުކުރީ އެ މަހުގެ 27 ވަނަ ދުވަހުއެވެ. ތަހުގީގަށް އެނގުނު ގޮތުގައި މޭރީ މަރާލީ މާވިންއާއި އޭނާގެ ލޯބިވެރިޔާ ހަލީމަތު ލަމްހާ އަބްދުއްރަހްމާންއާ ދެމެދު އޮތް ގުޅުމުގެ ސަބަބުން އުފެދުނު މައްސަލަތަކެއްގެ ތެރެއިންނެވެ. މާވިންގެ މައްޗަށް ދައުލަތުން އުފުލީ އެނގިހުރެ މީހަކު މެރުމުގެ ކުށުގެ ދައުވާއެވެ.
މި މައްސަލައިގައި ހިމެނޭ މާވިންގެ ލޯބިވެރިޔާ ލަމްހާގެ މައްޗަށްވެސް މިއަދު ހުކުމް އިއްވުމަށް ވަނީ ތާވަލުކޮށްފައެވެ. އޭނާގެ މައްޗަށް ސާބިތުވެފައިވަނީ ކުށުގައި ބައިވެރިވުމުގެ ދައުވާގެ އިތުރުން މުދަލަށް ހުއްދަ ނޫން ގޮތުގައި ބާރު ހިންގުމާއި ހުއްދަ ނުނަގައި ކުރުން މަނާ ކަމެއް ކުރުމުގެ ދައުވާއެވެ. މީގެ އިތުރުން، ޖަލު ބަންދުގައި ހުރެ މާވިން ވަނީ އިސްލާމްދީން ގަބޫލުކޮށް އޭނާގެ ނަން ޔޫސުފްގެ ނަމަށް ބަދަލުކޮށްފައިކަންވެސް ފާހަގަކުރެވެއެވެ.
ކިޔުންތެރިންގެ ހިޔާލު