ކުދި އަދި މެދު ފަންތީގެ ވިޔަފާރިތަކަކީ ރާއްޖޭގެ އިގްތިސޯދީ ކުރިއެރުމުގެ މައިބަދަ ކަމަށާއި، އެ ވިޔަފާރިތަކަށް ބޭނުންވާ މާލީ އަދި ފަންނީ އެހީތެރިކަން ފޯރުކޮށްދިނުމަށް ސަރުކާރުން ހާއްސަ މަސައްކަތްތަކެއް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ކުދި އަދި މެދު ފަންތީގެ ވިޔަފާރިތަކުގެ ދުވަހުގެ މުނާސަބާގައި މީސް މީޑިއާގައި ކުރެއްވި ޕޯސްޓެއްގައި ރައީސް ފާހަގަކުރެއްވި ގޮތުގައި، މިފަދަ ވިޔަފާރިތަކަކީ ރަށްރަށުގެ ތަރައްގީ އާއި އާންމު ރައްޔިތުންނަށް ފުރުސަތުތައް ފަހިކޮށްދިނުމުގައި އެންމެ މުހިއްމު ދައުރެއް އަދާކުރާ އިގްތިސޯދީ ބާރެވެ. ރާއްޖޭގެ ދެމެހެއްޓެނިވި ތަރައްގީ ކަށަވަރުކުރުމަށްޓަކައި އެންމެ ކުދި ވިޔަފާރިތަކުން ފެށިގެން މެދު ފަންތީގެ ވިޔަފާރިތަކަށް ހިތްވަރު ދިނުމަކީ ސަރުކާރުގެ މުހިންމު ސިޔާސަތެކެވެ.
މޯލްޑިވްސް 2.0 އިނީޝިއޭޓިވްގެ ދަށުން ކުދި ވިޔަފާރިތަކަށް މާލީގޮތުން ބޭނުންވާ އެހީތެރިކަން ލިބޭނެ މަގު ފަހިކޮށްދީ، އެ ވިޔަފާރިތައް ދުނިޔޭގެ ބާޒާރުތަކާ ގުޅާލުމަށް މަސައްކަތްކުރަމުންދާ ކަމަށް ރައީސް ވިދާޅުވިއެވެ. މި މަސައްކަތުގެ ތެރެއިން ކަލްޗަރަލް ސެންޓަރުތަކާއި ކްރިއޭޓާ ހަބްތައް އަދި އެސްއެމްއީ ޑިޖިޓަލް ފައިނޭންސިން އިން މުހިއްމު ދައުރެއް އަދާކުރާނެ ކަމަށް އެމަނިކުފާނު ފާހަގަކުރެއްވިއެވެ.
ބައިނަލްއަގްވާމީ ބާޒާރުތަކަށް ރާއްޖޭގެ ވިޔަފާރިތައް ވަނުމަށް މަގުފަހިކުރުމުގެ ގޮތުން އަލިބާބާ އަދި ޕޭޕަލްގެ ހިދުމަތްތައް ފަސޭހަކަމާއެކު ބޭނުންކުރެވޭނެ އިންތިޒާމުތައް ހަމަޖައްސަމުންދާ ކަމަށް ރައީސް މައުލޫމާތު ދެއްވިއެވެ. މިފިޔަވަޅުތަކުގެ ސަބަބުން ރާއްޖޭގެ ކުދި ވިޔަފާރިތަކަށް ލިބޭ ފުރުސަތުތައް އިތުރުވެ، އެކްސްޕޯޓްކުރުމުގެ ފުރުސަތުތައް ވެސް ފުޅާވެގެންދާނެއެވެ.
ސަރުކާރުން މަސައްކަތް ކުރަމުންދަނީ ހުރިހާ ރައްޔިތުންނަށް ވެސް ހަމަހަމަ ފުރުސަތުތައް ފަހިކޮށްދިނުމަށް ކަމަށް ރައީސް ތަކުރާރުކުރެއްވިއެވެ. އަދި 2026 އަދި 2027 ވަނަ އަހަރަކީ ކުދި ވިޔަފާރިތައް ކުރިއެރުވުމުގެ ހާއްސަ އަހަރުތަކެއްގެ ގޮތުގައި ކަނޑައަޅުއްވާފައިވާކަން ފާހަގަކުރައްވައި، އެ ދާއިރާތައް ކުރިއެރުވުމަށް ބޭނުންވާ ފުރިހަމަ އެހީތެރިކަން ސަރުކާރުން ފޯރުކޮށްދޭނެ ކަމުގެ ޔަގީންކަން އެމަނިކުފާނު ދެއްވިއެވެ.
ކިޔުންތެރިންގެ ހިޔާލު