ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އޮތީ ވަރަށް ވަރުގަދަކަމާއި ބަދަހިކަމާއެކު ކަމަށާއި، ޕާޓީގެ ތެރޭގައި ބައިބައިވުން އުފައްދަން އިދިކޮޅު ފަރާތްތަކުން ކުރާ މަސައްކަތް ކާމިޔާބު ނުވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް ޑރ. މުޢިއްޒު މި ވާހަކަފުޅު ދެއްކެވީ ޕީއެސްއެމް ނިއުސްގެ “ނޭޝަން ޗެޓް” ޕޮޑްކާސްޓްގައި ކުރި ސުވާލަކަށް ޖަވާބުދެއްވަމުންނެވެ.
“މި ގުޅުން ހީނަރު ކުރަން، ބައިބައިކުރަން އެކި ފަރާތްތަކުން މަސައްކަތް ކުރޭ. ނަމަވެސް އަޅުގަނޑުމެންގެ ތެރޭގައި ނެތް އެ އަޑު އަހާނެ ފަރާތްތަކެއް. އަޅުގަނޑުމެންގެ އަޒުމް ވަރަށް ވަރުގަދަ. އަޅުގަނޑުމެން މިތިބީ ގައުމަށް ހިދުމަތް ކުރުމަށް،” ރައީސް ވިދާޅުވިއެވެ.
ޕީއެންސީގެ ލީޑަޝިޕްގެ ތެރޭގައި ޚިޔާލުތަފާތުވުންތައް އުޅޭ ކަމަށް ބުނެ އިދިކޮޅު އެމްޑީޕީން ދައްކަމުންދާ ވާހަކަތަކަށް ރައްދުދެއްވަމުން ރައީސް ވިދާޅުވީ، ޕާޓީގެ ތެރޭގައި ހައިޖާނު އުފެއްދުމަކީ އިދިކޮޅު ފަރާތްތަކުން އަބަދުވެސް އުންމީދުކުރާ ކަމެއް ކަމަށެވެ. އަދި އެބޭފުޅުންގެ ވެރިކަމުގައި ދެ އަހަރާއި ބައިވީއިރު ޕާޓީ އެތެރެއިން ރޫޅިގެންދިޔަ މަންޒަރު ފެނުނު ނަމަވެސް، ޕީއެންސީގެ ސަރުކާރަށް ދެ އަހަރާއި ބައިވީއިރު ޕާޓީ އޮތީ އެއް ރޫހެއްގައި ކަމަށް ރައީސް ފާހަގަކުރެއްވިއެވެ.
ޕާޓީގެ ލީޑަޝިޕުން ފެށިގެން ރައްޔިތުންގެ މަޖިލީހުގެ މެންބަރުންނާއި، ސްޓިއަރިން ކޮމިޓީތަކާއި އާންމު މެންބަރުންވެސް މަސައްކަތް ކުރަނީ ވަރަށް އެކުވެރިކަމާއެކީގައިކަން ފާހަގަކުރައްވަމުން ރައީސް ވިދާޅުވީ، ކުރިއަށް އޮތް ސެޕްޓެމްބަރު މަހުގެ މެދުތެރޭގައި ބޭއްވުމަށް ހަމަޖެހިފައިވާ ޕީއެންސީގެ ކޮންގްރެސް ވެގެންދާނީ ވަރަށް ކާމިޔާބު ކޮންގްރެސްއަކަށް ކަމަށެވެ.
ކިޔުންތެރިންގެ ހިޔާލު