މި ސަރުކާރުން ރާއްޖޭގައި ހިންގަން ތައްޔާރުވަމުން އަންނަ ބިޔަ މަޝްރޫއާ ދެކޮޅަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ދެއްކެވި ވާހަކަފުޅުތަކަށް، ރައްޔިތުންގެ މަޖިލީހުގެ ރައީސް އަދި ވެރިކަން ކުރާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިއަދު ވަރުގަދަ ރައްދެއް ދެއްވައިފިއެވެ.
ރަސްމާލޭގައި ހިންގަން އުޅޭ މަޝްރޫއަކީ ރާއްޖޭގައި “ޔަހޫދީ އާބާދީއެއް ގާއިމްކުރަން” ކުރާ ކަމެއް ކަމަށް ތުހުމަތު ކުރައްވައި، އެކްސްގައި މިއަދު ކުރެއްވި ޕޯސްޓެއްގައި ރައީސް ޔާމީން ވަނީ އެ މަޝްރޫއު ދޫކޮށްލުމަށް ޔޫއޭއީގެ އީގަލް ހިލްސް ކުންފުންޏަށް ގޮވާލައްވާފައެވެ.
އެ ތުހުމަތުތަކަށް ރައްދު ދެއްވައި އަބްދުއްރަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، ދިވެހި ރައްޔިތުންނަކީ ބަޔަކު ޖަހާހާ ބެރަކަށް ނަށާ ވަރަށް ވުރެ މާ ބޮޑަށް ތަސައްރަފު ފުދިފައި ތިބި އަދި މާ ހަރުދަނާ ބައެއް ކަމަށެވެ. އަދި ދިވެހިންނަކީ ގައުމާ މެދު ވިސްނައި، ފިކުރުކޮށް ރަނގަޅާއި ނުބައި ވަކިކުރަން ދަންނަ ބައެއް ކަމަށް ވެސް އޭނާ ވިދާޅުވިއެވެ.
މާތްﷲ ގެ ތަނަވަސް ރަހުމަތްފުޅުން ރަސްމާލޭގެ މަޝްރޫއު ނުހުއްޓުވޭނެ. އިރާދަކުރެއްވިއްޔާ ރައީސް ޑރ. މުހައްމަދު މުއިއްޒުގެ ވެރިކަމުގައި ލަހެއް ނުވެ މި ބިޔަ މަޝްރޫއު ފެށިގެންދާނެ. އަދި މި މަޝްރޫއު ކުރިއަށް ދާނީ ދިވެހި ޖުމްހޫރިއްޔާގެ ގާނޫނުއަސާސީއާ ގާނޫނުތަކާ އެއްގޮތްވާ ގޮތުގެ މަތީން. މުސްތަގްބަލުގައި މީގެ ފުރިހަމަ ފައިދާ ދިވެހީންނަށް ލިބިގެންދާނެ.
އަބްދުއްރަހީމް ވިދާޅުވި އެވެ.
ރައީސް ޔާމީނަށް އަމާޒުކުރައްވައި އަބްދުއްރަހީމް ވަނީ ގިނަ ސުވާލުތަކެއް ވެސް އުފައްދަވާފައެވެ. އެގޮތުން، ރަސްމާލެ މަޝްރޫއު ހުއްޓުވަން ޔާމީން ކުރައްވާ މަސައްކަތްޕުޅާއި، އެ މަނިކުފާނުގެ ވެރިކަމުގައި ފ. އަތޮޅު މަޝްރޫއު ހުއްޓުވަން އޭރު އިދިކޮޅުގައި އޮތް އެމްޑީޕީން ކުރި މަސައްކަތާ ހުރި ތަފާތަކީ ކޮބައިތޯ އަބްދުއްރަހީމް އެެއްސެވިއެވެ. އަދި އޭރު ޔާމީން ދެއްކެވި ވާހަކަފުޅުތަކާއި މިހާރު ދައްކަވާ ވާހަކަފުޅުތައް ދިމާވަނީ ކިހާވަރަކަށްތޯ ވެސް އޭނާ އެއްސެވިއެވެ.
ރައީސް ޔާމީނުގެ ވެރިކަމުގައި ސައުދީގެ ކުންފުންޏަކުން ފ.އަތޮޅުގައި ހިންގަން އުޅުނު މަޝްރޫޢު ހުއްޓުވަން އެމް.ޑީ.ޕީ އިސްވެ އޭރު ކުރި މަސައްކަތާ ރަސްމާލޭގައި ޔޫއޭއީގެ ކުންފުންޏަކުން ހިންގަން މި އުޅޭ ބިޔަ މަޝްރޫޢަށް ހުރަސް އެޅުމަށް މިއަދު ރައީސް ޔާމީނު އިސްވެހުރެ އެމްޑީޕީއާ ގުޅިގެން…
— Abdul Raheem Abdulla (@Banafsaa) October 11, 2026
އޭރު ވިދާޅުވީ އެމްޑީޕީ ވެރިކަމުގެ ދަހިވެތި ކަމުގައި ގައުމާ ރައްޔިތުންނަށް ޣައްދާރުވީ ކަމަށް. މިއަދު ހަމަ އެ ދަހިވެތިކަމުގައި އެ މަނިކުފާނަށް އެ ޣައްދާރު ވެވެނީ ގައުމާއި ރައްޔިތުންނަށް ނޫންތޯ؟ ވެރިކަމުގެ ދަހިވެތިކަމުގައި ތިމާއަށް ކުރެވޭ ނުކުރެވޭ ކަމެއް ދެއްކޭ ނުދެއްކޭ ވާހަކައެއް އެނގިވަޑައި ނުގަންނަ ހިސާބަށް ދިޔައީތޯ؟
ޔާމީނަށް ފާޑުވިދާޅުވަމުން އަބްދުއްރަހީމް ވިދާޅުވިއެވެ.
ރަސްމާލެ މަޝްރޫއާ އެންމެ ބޮޑަށް ދެކޮޅު ހައްދަވައި، އެ މަޝްރޫއާ ގުޅުވައިގެން އެންމެ ގިނަ ތުހުމަތުތަކެއް ކުރައްވަމުން ގެންދަވާ ސިޔާސީ ލީޑަރަކީ ކުރީގެ ރައީސް ޔާމީނެވެ. މީގެ އިތުރުން ކުރީގެ ރައީސް އިބްރާހީމް މުހައްމަދު ސޯލިހު ވެސް ވަނީ އެ މަޝްރޫއާ މެދު ކަންބޮޑުވުން ފާޅުކުރައްވާފައެވެ. ނަމަވެސް، ސޯލިހުގެ މައިގަނޑު ކަންބޮޑުވުމަކަށް ވެފައިވަނީ މަޝްރޫއުގެ އެއްބަސްވުމާ ގުޅޭ މައުލޫމާތުތައް ސަރުކާރުން ހާމަނުކުރާ މައްސަލައެވެ.
ކިޔުންތެރިންގެ ހިޔާލު