ލުބުނާނުގެ ދެކުނުގެ ބައިތު ޔަހޫންއަށް ވަދެގަންނަން މަސައްކަތްކުރި އިސްތިއުމާރީ ސިފައިންގެ ގްރޫޕަކަށް ހިޒްބުﷲއިން ވަރުގަދަ ހަމަލާތަކެއް ދީފިއެވެ.
ބައިތު ޔަހޫންއަކީ ލުބުނާނުގެ ދެކުނުގެ ބިންތު ޖުބައިލް ޑިސްޓްރިކްޓްގެ އުތުރުގައި އޮންނަ އަވަށެކެވެ.
ހިޒްބުﷲއިން މި ހަމަލާ ދީފައިވަނީ ކުރީބައިގައި ގޮވާތަކެތި ހަރުކޮށް، އިސްތިއުމާރީ ސިފައިން ވަދެގަންނަން އުޅުނު ވަގުތު ގޮވާތަކެތި ގޮއްވާލައިގެންނެވެ.
ގޮވާތަކެތި ގޮއްވާލުމާއެކު ހިޒްބުﷲ މުޖާހިދުންވަނީ ފިލާތިބެ ކުއްލި ވަރުގަދަ ހަމަލާތަކެއްވެސް އިސްތިއުމާރީ ސިފައިންނަށް ދީފައެވެ.
މި ހަމަލާގައި އިސްތިއުމާރީ ސިފައިންގެ އެކަކު މަރުވެ އިތުރު އެތައް ބަޔަކު ޒަޚަމްވި ކަމަށް ރިޕޯޓްތައް ބުނަމުން އެބަ ދެއެވެ. އަދި ޒަޚަމްވެފައިވާ ސިފައިން ހެލިކޮޕްޓަރުތަކުގައި ހައިފާއަށް އުފުލަމުންދާ ކަމަށްވެސް ޚަބަރުތައް ބުނެއެވެ.
މި ހަމަލާއާ ގުޅިގެން އިސްތިއުމާރީ ސިފައިން ވަނީ، އެ ސަރަހައްދަށް ބޮޑުބަޑީގެ ހަމަލާތަކެއް ދިނުމުގެއިތުރުން، ވައިގެ ހަމަލާތައްވެސް ދީފައެވެ. ވައިގެ ހަމަލާތައް ދިނުމަކީ، ހަމަލާތައް ހުއްޓާލުމަށް ވެފައިވާ އެއްބަސްވުމާ ޚިލާފަށް ކޮށްފައިވާ ކަމެކެވެ.
ކިޔުންތެރިންގެ ހިޔާލު