ރާއްޖޭގެ ބޯހިޔާވަހިކަމުގެ މަޝްރޫޢުތަކަކީ ނުފޫޒުން އެއްކިބާވެ، ހާމަކަން ބޮޑު ގޮތެއްގައި ކުރިއަށްދާނެ މަސައްކަތްތަކެއްކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ސަރުކާރުން ހިންގާ ބޯހިޔާވަހިކަމުގެ މަޝްރޫޢުތަކަކީ އެއްވެސް ފަރާތެއްގެ ނުފޫޒެއް ނެތި، އިންސާފުވެރިކަމާއެކު ކުރިއަށްގެންދާ މަޝްރޫޢުތަކެއްކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރައްވައިފިއެވެ. ޕީއެސްއެމް ނިއުސްގެ ނޭޝަން ޗެޓް ޕްރޮގްރާމްގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، މީގެ ކުރީގެ ސަރުކާރުތަކުގައި މިފަދަ ބޮޑެތި މަޝްރޫޢުތަކަށް ނުފޫޒު ފޯރުވުމުގެ ޝަކުވާތައް އޮތް ނަމަވެސް، މި ސަރުކާރުގެ އަމާޒަކީ އެފަދަ ކަންކަމަށް ފުރުސަތު ނުދީ މަސައްކަތް ނިންމުންކަމަށެވެ. ގޯއްޗާއި ފްލެޓް ދޫކުރުމުގައި ވަކި ބަޔަކަށް އިސްކަންދިނުމުގެ ސަގާފަތް ނިމުމަކަށް ގެނައުމަކީ އެމަނިކުފާނު އިސްކަންދެއްވާ މުހިއްމު ކަމެއްކަން ރައީސް ތަކުރާރުކުރެއްވިއެވެ.
ބޯހިޔާވަހިކަމަށް އެދި ހުށައެޅި ފަރާތްތަކުގެ މައުލޫމާތުތައް ގެދޮރުވެރިކަމާ ބެހޭ ވުޒާރާއިން މިހާރު ދަނީ ކްރޮސް ވެރިފިކޭޝަން މަރުހަލާގެ ތެރެއިން ވަރަށް ރަނގަޅަށް ބަލަމުންނެވެ. މި މަސައްކަތުގެ މައިގަނޑު މަޤްޞަދަކީ އެއްވެސް އާއިލާއަކަށް ނުވަތަ ވަކި ފަރުދަކަށް ނާޖާއިޒު ފައިދާއެއް ނުލިބޭނެކަން ކަށަވަރުކުރުމެވެ. ރައީސުލްޖުމްހޫރިއްޔާ ވިދާޅުވި ގޮތުގައި، މި މަރުހަލާގައި އެއްވެސް ވަރެއްގެ ނުފޫޒެއް ފޯރުވުމުގެ ޖާގައެއް ނޯންނާނެއެވެ. ބޯހިޔާވަހިކަމަކީ ރައްޔިތުންގެ ޒަރޫރީ ބޭނުމަކަށްވާއިރު، އެކަމުގައި ހިންގާ ހުރިހާ މުއާމަލާތެއްވެސް ވާންވާނީ އެންމެ އިންސާފުވެރިކޮށްކަމަށް އެމަނިކުފާނު ފާހަގަކުރެއްވިއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފްލެޓް ހޯދުމަށް 35،900 އަށްވުރެ ގިނަ އަދި ގޯތި ހޯދުމަށް 22،000 އަށްވުރެ ގިނަ އެޕްލިކޭޝަން ވަނީ ހުށައެޅިފައެވެ. ކުރީގެ މަޝްރޫޢުތަކާ ޚިލާފަށް، މި ސަރުކާރުން ވަނީ މި މަސައްކަތްތައް ދުރާލާ ހުޅުވާލައި، ދެފުށް ފެންނަ ގޮތަކަށް ކުރިއަށްގެންދިއުމަށް ރާވާފައެވެ. މިއަހަރުގެ ތެރޭގައި ގިނަ މަޝްރޫޢުތަކުގެ އަމަލީ މަސައްކަތް ފެށި، ކުރިއަށް އޮތް ދެ އަހަރެއްހާ ދުވަހުގެ ތެރޭގައި އެތަންތަން ނިމި، ރައްޔިތުންނަށް އެތަންތަނަށް ވަދެވޭނެ އިންތިޒާމު ހަމަޖެހިގެންދާނެކަމުގެ ޔަޤީންކަން ސަރުކާރުން ދެއެވެ. ކުރިން ދައުރު ނިމެން ކައިރިވެފައި އޮއްވައި ބޯހިޔާވަހިކަމަށް ކުރިމަތިލުމަށް ހުޅުވާލުމުގެ ސަބަބުން ކުރިމަތިވި ތަކުލީފުތައް މިފަހަރު ތަކުރާރު ނުވާނެކަމަށް ސަރުކާރުން ހާމަކުރެއެވެ.
ކިޔުންތެރިންގެ ހިޔާލު