ޔުއެފާ ޗެމްޕިއަންސް ލީގުގައި ރޭ އަމިއްލަ ދަނޑު، އޯލްޑް ޓްރެފޯޑުގައި ކުޅުނު މެޗުގައި ދެ ލަނޑުގެ ފަހަތުން އަރައި، 3-2 ގެ ނަތީޖާއަކުން އިޓަލީގެ އޭއެސް ރޯމާ ބަލިކޮށް މެންޗެސްޓާ ޔުނައިޓެޑުން ފުރިހަމަ މޮޅެއް ހޯދައިފިއެވެ. މި މެޗުގެ ފަހުވަގުތު މެތިއުސް ކޫންޔާ ކާމިޔާބުކޮށްދިން ދެ ލަނޑާއެކު، އޭނާ ވެގެން ގޮސްފައިވަނީ ޔުނައިޓެޑުގެ ސަޕޯޓަރުންގެ ހީރޯއަށެވެ.

މެޗުގެ ފުރަތަމަ ހާފު ފެނިގެންދިޔައީ މައިކަލް ކެރިކްގެ އިރުޝާދުގެ ދަށުން ކުޅެމުން އަންނަ ޔުނައިޓެޑަށް ވަރަށް މާޔޫސްކުރުވަނިވި ގޮތަކަށެވެ. މެޗުގެ 11 ވަނަ މިނެޓުގައި ރޯމާގެ މަޓިއަސް ސޫލޭ ވަނީ ލަނޑެއް ޖަހައި އެ ޓީމަށް ލީޑު ނަގައިދީފައެވެ. އަދި އޭގެ އިރުކޮޅެއް ފަހުން، ލިބުނު ޕެނަލްޓީއަކުން ޑޮންޔެލް މާލެން ވަނީ ރޯމާގެ ލީޑު ދެގުނައަށް ފުޅާކޮށްދީފައެވެ. ފުރަތަމަ ހާފު ނިމުނުއިރު 2-0 އިން ރޯމާ ކުރީގައި އޮތުމުން، މެޗުން މޮޅުވުމުގެ ފުރުސަތު ޔުނައިޓެޑަށް ވަރަށް ބޮޑަށް ހަނިވެގެންދިޔައެވެ.

ނަމަވެސް، ދެވަނަ ހާފުގައި ޔުނައިޓެޑުން ވަނީ ކުޅުން ވަރުގަދަކޮށް މެޗުގެ އޮއިވަރު އެއްކޮށް ބަދަލުކޮށްލާފައެވެ. މެޗުގެ 58 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް، ކެޕްޓަން ބްރޫނޯ ފެނާންޑޭސް ވަނީ ޔުނައިޓެޑަށް އުންމީދު އާކޮށްދީފައެވެ. މި ލަނޑަށްފަހު މުޅި މެޗު ކޮންޓްރޯލް ކުރީ ޔުނައިޓެޑުންނެވެ. އެގޮތުން އެ ޓީމުން ވަނީ ރޯމާގެ ގޯލަށް އަމާޒުކޮށް 15 ހަމަލާއެއް ފޮނުވާލާފައެވެ.

އިޝްތިހާރު އިޝްތިހާރު

ޔުނައިޓެޑުން ދައްކަމުން ދިޔަ މޮޅު ކުޅުމުގެ ނަތީޖާއަކަށްވީ، މެޗު ނިމެން ތިން މިނެޓަށް ވެފައި ވަނިކޮށް، ތިން މިނެޓުގެ ތެރޭގައި ކޫންޔާ ޖެހި ޖެހިގެން ދެ ލަނޑު ކާމިޔާބުކޮށް ޔުނައިޓެޑަށް މޮޅު ކަށަވަރުކޮށްދިނުމެވެ.

މި މުހިންމު މޮޅާއެކު، މައިކަލް ކެރިކްގެ ޔުނައިޓެޑް ވަނީ ޗެމްޕިއަންސް ލީގުގެ ތާވަލުގެ 17 ވަނައަށް ޖެހިލައި، މުބާރާތުގެ ދެވަނަ ބުރަށް ދިއުމުގެ އުންމީދު ދަމަހައްޓާފައެވެ.