ރަޖިސްޓްރީ ނުކުރާ ދަރިވަރުންތަކަކަށް ސެޓްފިކެޓް ދޫކުރި ކަމަށް ބުނެ މޯލްޑިވްސް ކޮލިފިކޭޝަން އޮތޯރެޓީ (އެމްކިއުއޭ)އިން އެވިޑް ކޮލެޖް ޖޫރިމަނާކުރި މައްސަލަ އެ ކޮލެޖުން ދޮގުކޮށްފިއެވެ.
މޯލްޑިވްސް ކޮލިފިކޭޝަން އޮތޯރެޓީން އެވިޑް ކޮލެޖަށް ފިޔަވަޅު އެޅިއިރު، އެ ކޮލެޖާ އެއްވެސް މިންވަރަކަށް އެ މައުލޫމާތު ހިއްސާކޮށްފައި ނުވާކަމަށް އެ ކޮލެޖުން ބުނެއެވެ. އަދި މި މައްސަލައާ ގުޅިގެން އެމްކިއުއޭއިން އެ ކޮލެޖުގެ ފަރާތުން އެއްވެސް މައުލޫމާތެއް ހޯދާފައި ނުވާކަމަށާއި، ކަން ހިނގާފައިވާ ގޮތާ ގުޅޭގޮތުން އެއްވެސް ސުވާލެއް ވެސް ކޮށްފައި ނުވާކަމަށް އެ ކޮލެޖުން ފާހަގަކުރެއެވެ. އެ ކޮލެޖުން ހާމަކުރާ ގޮތުގައި، މިދިޔަ އަހަރުގެ ސެޕްޓެމްބަރު މަހުގެ 10ގެ ފަހުން ބައިނަލްއަގްވާމީ ތައުލީމީ މުއައްސަސާއެއް މެދުވެރިކޮށް އެ ކޮލެޖުން އެއްވެސް ކޯހެއް ހިންގާފައެއް ނުވާނެއެވެ.
އެވިޑް ކޮލެޖުން ދެކޭ ގޮތުގައި، މި ފިޔަވަޅަކީ އެއްވެސް އިޚްލާސްތެރިކަމެއް ނެތި، ރައްޔިތުންގެ ހިތްތަކުގައި އެ ކޮލެޖާ މެދު އޮތް އިތުބާރާއި ޔަގީންކަން ގެއްލުވާލުމަށް އެމްކިއުއޭއިން ހިންގި އަމަލެކެވެ. މިއީ އެ ކޮލެޖުގެ ރީތި ނަން ކިލަނބުކޮށްލުމަށް ކުރި މަސައްކަތެއް ކަމަށް އެ ކޮލެޖުން ބުނެއެވެ. އަދި ފާއިތުވެ ދިޔަ އަހަރުތަކުގައި ބައިނަލްއަގްވާމީ ފެންވަރުގެ އެތައް ތައުލީމީ މުއައްސަސާތަކަކާ ގުޅިގެން އިލްމީ ގުޅުންތައް ދަމަހައްޓަމުން އަންނަ ކަމަށް އެ ކޮލެޖުން ބުނެއެވެ.
މި މައްސަލައާ ގުޅިގެން މީގެ ކުރިން މިއަހަރުގެ ކުރީކޮޅު ސްރީލަންކާގެ ދަރިވަރުންތަކަކަށް ރަޖިސްޓްރީ ނުކޮށް ސަނަދު ދޫކުރި މައްސަލައެއް ފެންމަތިވިއެވެ. އެ ފަހަރު އެމްކިއުއޭއިން ވަނީ އެ ކޮލެޖަށް ނަސޭހަތްތެރިވެ، ފިޔަވަޅު އަޅައި އެކަން އާންމުކޮށް އިއުލާނުކޮށްފައެވެ. ނަމަވެސް މިހާރު މި ހިނގި ކަންތައްތަކާ ގުޅިގެން އެމްކިއުއޭއިން ބުނެފައި ވަނީ، އެޑްވައިޒަރީ ބޯޑުގެ ލަފައާއެކު ދެވަނަ ފިޔަވަޅެއްގެ ގޮތުން އެވިޑް ކޮލެޖު ޖޫރިމަނާކޮށްފައިވާ ކަމަށެވެ. އަދި މިފަދަ ކަންކަން ތަކުރާރު ނުކުރުމަށް އެ ކޮލެޖަށް އަންގާފައިވާ ކަމަށް ވެސް އެ އޮތޯރިޓީން މައުލޫމާތު ދެއެވެ.
ކިޔުންތެރިންގެ ހިޔާލު