މ. އަތޮޅުގެ ހަތް ރަށެއްގައި ފެނަކައިން ދެމުން އައި ޔުޓިލިޓީ ހިދުމަތްތައް ސްޓެލްކޯގެ ބެލުމުގެ ދަށަށް ރަސްމީކޮށް ބަދަލުކޮށް އެ މަސައްކަތް އެ ކުންފުންޏާ ހަވާލުކޮށްފިއެވެ.
މި ރަށްތަކުގެ ޔުޓިލިޓީ ހިދުމަތްތައް ފޯރުކޮށްދިނުމާ ގުޅޭގޮތުން ސްޓެލްކޯ އާއި ފެނަކަ ކޯޕަރޭޝަނާ ދެމެދު އެކުލަވާލި އެއްބަސްވުމުގައި ސޮއިކޮށްފައިވަނީ ދެ ކުންފުނީގެ އިސްވެރިންގެ ހާޒިރުގައެވެ. ސްޓެލްކޯގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޑރ. އަލީ އަޒުވަރެވެ. ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސެއިންނެވެ.
ސްޓެލްކޯއިން މައުލޫމާތު ދޭގޮތުގައި އެ ކުންފުނީގެ ބެލުމުގެ ދަށަށް ގެނެސްފައިވަނީ މ. އަތޮޅުގެ 7 ރަށެކެވެ. އޭގެ ތެރޭގައި ދިއްގަރާއި، ކޮޅުފުށި، މަޑުއްވަރި، މުލި، ނާލާފުށި، ރަތްމަންދޫ އަދި ވޭވަށު ހިމެނެއެވެ. މީގެ ކުރިން މި ހުރިހާ ރަށެއްގެ ކަރަންޓާއި ޔުޓިލިޓީގެ އެހެނިހެން ހިދުމަތްތައް ފޯރުކޮށްދެމުން އައީ ފެނަކައިންނެވެ.
މި ބަދަލަކީ ސަރުކާރުން ރައްޔިތުންނަށް ފޯރުކޮށްދޭ ހިދުމަތްތައް އިތުރަށް ހަރުދަނާކޮށް، ތަރައްގީ ކުރުމުގެ ނިޒާމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނަވަމުންދާ ހެޔޮ ބަދަލުތަކުގެ ތެރެއިން ކުރިއަށްގެންދާ މަސައްކަތެއް ކަމަށް ސްޓެލްކޯއިން ބުނެއެވެ. މި ބަދަލާއެކު ރައްޔިތުންނަށް ފޯރުކޮށްދޭ ހިދުމަތުގެ ފެންވަރު ރަނގަޅުވެ، ހިދުމަތްތައް އަވަސްވެގެން ދިއުމަކީ ސަރުކާރުގެ އަމާޒެކެވެ.
ޔުޓިލިޓީ ހިދުމަތްތަކާ ގުޅޭގޮތުން ސްޓެލްކޯއިން ކުރަމުންދާ މަސައްކަތްތަކުގެ ތެރެއިން، ހުޅުމާލެ ދެވަނަ ފިޔަވަހީގެ ކަރަންޓު ނެޓްވޯކް ބެލެހެއްޓުމުގެ މަސައްކަތްތައް ވެސް އެ ކުންފުންޏާ ވަނީ ހަވާލުކޮށްފައެވެ. ސަރުކާރުގެ އަމާޒަކީ ރާއްޖޭގެ އެކި ކަންކޮޅުތަކުގައި ކަރަންޓުގެ ހިދުމަތް ދެމެހެއްޓެނިވި ގޮތެއްގައި ދެވޭނެ އިންތިޒާމުތައް ހަމަޖެއްސުމެވެ.
ކިޔުންތެރިންގެ ހިޔާލު