މާފުށީ ޖަލަށް ވައްދާ ތަކެތި ސަތޭކަ އިންސައްތަ ސްކޭންކުރުމުގެ މަޤުޞަދުގައި އެ ޖަލުގައި ބެގޭޖް ސްކޭނަރެއް ޤާއިމުކޮށް ރަސްމީކޮށް ބޭނުންކުރަން ފަށައިފިއެވެ.
މާފުށީ ޖަލުގައި ބޭއްވި ޚާއްޞަ ރަސްމިއްޔާތެއްގައި މި ބެގޭޖް ސްކޭނަރުގެ ޚިދުމަތް ފައްޓަވައިދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހްސާންއެވެ. މި ރަސްމިއްޔާތުގައި ކޮމިޝަނަރ އޮފް ޕްރިސަންސް ޙަސަން ޒަރީރާއި ކޮންޓްރޯލަރ ޖެނެރަލް އޮފް އިމިގްރޭޝަން އަޙުމަދު ފަޞީޙުގެ އިތުރުން ކޮމިޝަނަރ ޖެނެރަލް އޮފް ކަސްޓަމްސް ފާޠިމަތު ދިޔާނާ އާއި މޯލްޑިވްސް ކަރެކްޝަނަލް ސަރވިސްގެ އިސްވެރިން ބައިވެރިވެވަޑައިގަތެވެ.
މި ނިޒާމު ފައްޓަވައިދެއްވުމަށްފަހު ވަޒީރު އަލީ އިހްސާން ވިދާޅުވީ ދިވެހިރާއްޖޭގެ ޖަލުތަކުގެ ސަލާމަތީ ކަންކަން ތަރުތީބުކުރަމުން އަންނައިރު އެންމެ މުހިންމު އެއް ކަމަކީ ޖަލަށް ވެއްދޭ ތަކެތި ފުރިހަމައަށް ސްކޭންކުރެވިގެން ވެއްދޭކަން ކަށަވަރުކުރުން ކަމަށެވެ. އަލަށް ޤާއިމުކުރެވުނު ބެގޭޖް ސްކޭނަރުގެ އެހީގައި ޤައިދީންނަށް ޢާއިލާތަކުންނާއި އާންމުން ފޮނުވާ ތަކެތި ފުރިހަމައަށް ބަލައި ފާސްކުރެވޭނެއެވެ. މީގެ ކުރިން އިންޓެލިޖެންސް މައުލޫމާތުގެ މައްޗަށް ބިނާކޮށް ބަލައި ފާސްކުރަމުން އައި އައުމަށް ނިމުމެއް އައިސް މިހާރު ޖަލަށް ވައްދާ ކޮންމެ އެއްޗަކީ ސްކޭންކުރެވިގެން ވެއްދޭ އެއްޗަކަށް ވެގެންދާނެކަމަށް ވަޒީރު ފާހަގަކުރެއްވިއެވެ. އަދި ފޮރުވައިގެން ޖަލަށް އެތެރެކުރަން މަސައްކަތްކުރާ ތަކެތި މި ސްކޭނަރުގެ ޒަރީޢާއިން ފަސޭހަކަމާއެކު ހޯދޭނެކަމަށްވެސް އެމަނިކުފާނު ވިދާޅުވިއެވެ.
ޖަލުތަކަކީ ޤައިދީންގެ ފަރާތުން އާންމު ރައްޔިތުންނަށް އުނދަގޫ ނުވާނެހެން ސަލާމަތީ ކަންކަން ތަރުތީބުކުރެވިފައިވާ ތަންތަނަށް ހެދުމަކީ ސަރުކާރުން ވަރަށް ބޮޑު އިސްކަމެއް ދޭ ކަމެއްކަން ވަޒީރު އަލީ އިހްސާން ފާހަގަކުރެއްވިއެވެ. މިގޮތުން މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުފުޅާ އެއްގޮތަށް މި އަހަރު ނިމުމުގެ ކުރިން ޖަލުގައި ސްކޭން މެޝިންތައް ބަހައްޓައި ނިމިފައިވާކަން އެމަނިކުފާނު ހާމަކުރެއްވިއެވެ. ޖަލު ހިންގާތާ އެތައް އަހަރެއް ވެފައިވާއިރު މިފަދަ ނިޒާމެއް މީގެ ކުރިން ޤާއިމުކުރެވިފައި ނެތުމަކީ ބޮޑު އިހުމާލެއްކަމުގައި ވަޒީރު ސިފަކުރެއްވިއެވެ. ސަރުކާރުގެ މައިގަނޑު އަމާޒަކީ ޖަލުތަކަކީ ޤައިދީންނަށް އަމާން ރައްކާތެރި މާޙައުލަކަށް ހަދައި އެމީހުން އަލުން އަނބުރާ މުޖުތަމަޢަށް ނުކުންނައިރު ބޭނުންތެރި ބަޔަކަށް ހެދުން ކަމަށާއި ޖަލުގެ ޖާގައިގެ ދަތިކަމަށް ދާއިމީ ޙައްލެއް ހޯދުމުގެ މަސައްކަތްތައްވެސް ކުރިއަށްދާކަމަށް ވަޒީރު އިތުރަށް ވިދާޅުވިއެވެ.
ކިޔުންތެރިންގެ ހިޔާލު