މޯލްޑިވްސް ކަރެކްޝަނަލް ސާވިސް އިން ފުލުހުންނާ ގުޅިގެން މާފުށި ޖަލު ބަލައި ފާސްކުރުމުގެ ޚާއްސަ އޮޕަރޭޝަނެއް ފަށައިފިއެވެ.
މާފުށި ޖަލުގައި މިހާރު ކުރިއަށްދާ އޮޕަރޭޝަނަކީ ޖަލުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން މޯލްޑިވްސް ކަރެކްޝަނަލް ސާވިސް އިން ފުލުހުންނާ ގުޅިގެން ކުރިއަށް ގެންދާ މަސައްކަތެކެވެ. މި އޮޕަރޭޝަނާ ގުޅޭގޮތުން އިތުރު ތަފުސީލެއް ކަމާބެހޭ އިދާރާތަކުން އަދި ހާމަކޮށްފައެއް ނުވެއެވެ. ޖަލުތަކުގެ ތެރޭގައި ހިންގާ ގާނޫނާ ޚިލާފު ކަންކަން ހުއްޓުވުމަށްޓަކައި ދޭތެރެ ދޭތެރެއިން މިފަދަ އޮޕަރޭޝަންތައް ފުލުހުންނާއި ކަރެކްޝަންސް ގުޅިގެން ހިންގަމުން ގެންދެއެވެ.
ޖަލުތަކަކީ ކުށްވެރިން އިސްލާހުކުރާ ތަނަކަށް ވީހިނދު، އެތަންތަނުގެ ސަލާމަތީ ކަންކަން ވަރުގަދަކުރުމަކީ ސަރުކާރުން އިސްކަންދޭ ކަމެކެވެ. މީގެ ކުރިން ވެސް މާފުށި ޖަލުން މަނާ ތަކެތި ހޯދުމާއި، ޖަލުތެރޭގައި ހިންގާ ސްކޭމް ކުރުމުގެ މައްސަލަތަކާއި، ޓެރެރިޒަމަށް މަގުފަހިވާ އަމަލުތައް ހުއްޓުވުމަށް ގިނަ އޮޕަރޭޝަންތަކެއް ވަނީ ހިންގާފައެވެ. މިފަދަ އޮޕަރޭޝަންތަކުގެ މައިގަނޑު މަގުސަދަކީ ޖަލުގެ ތެރޭގައި އަމާންކަން ގާއިމުކޮށް، ގާނޫނާ ޚިލާފު ހުރިހާ އަމަލުތަކެއް ހުއްޓުވުމެވެ.
ޖަލުތަކުގެ ސެކިއުރިޓީ ވަރުގަދަކުރުމަށާއި ޖަލުތަކުގެ ޖާގަ އިތުރުކުރުމަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މިގޮތުން ޓެކްނޮލޮޖީގެ އެހީގައި ސަލާމަތީ ފިޔަވަޅުތައް ހަރުދަނާކުރުމަށް އިސްކަންދެމުން ދެއެވެ. އެގޮތުން، މި އަހަރުގެ ފެބްރުއަރީ މަހުގެ ތެރޭގައި މާފުށީ ޖަލުގައި ފުރަތަމަ ފަހަރަށް ބޮޑީ ސްކޭން ކުރެވޭ ސްކޭނަރެއް ބަހައްޓައި އެ ހިދުމަތްތައް ފަށާފައިވެއެވެ. މި ވަސީލަތްތަކުގެ ސަބަބުން ޖަލަށް މަނާ ތަކެތި ވެއްދުން ހުއްޓުވުމަށް ބޮޑެތި ފަސޭހަތަކެއް ލިބިގެން ގޮސްފައިވެއެވެ.
ކިޔުންތެރިންގެ ހިޔާލު