މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން، އދ. އަތޮޅުގެ ހިމާޔަތްކުރެވިފައިވާ ކަނޑުގެ ސަރަޙައްދުގައި ދުއްވާ އުޅަނދުފަހަރުގެ ބުރަފަތީގައި ރައްކާތެރިކަމުގެ ދާޖެހުން މި މަހުގެ 30 ގެ ނިޔަލަށް މަޖުބޫރުކޮށްފިއެވެ.
މި ނިންމުމަކީ އދ. އަތޮޅުގެ ހިމާޔަތްކުރެވިފައިވާ ސަރަޙައްދުގެ ކަނޑުގެ ދިރުންތަކާއި، އެ ސަރަޙައްދުގައި ހަރަކާތްތެރިވާ އިންސާނުންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން އެޅި މުހިންމު ފިޔަވަޅެކެވެ. ބުރަފަތީގައި ރައްކާތެރިކަމުގެ ދާ ހަރުކުރުމުގެ މައިގަނޑު ބޭނުމަކީ، މޫދުގައި އުޅޭ މީހަކު ނުވަތަ ފެހުރިހި ފަދަ ކަނޑުގެ ދިރުންތައް އެނބުރޭ ބުރަފައްޗެއްގައި ޖެހި ލިބިދާނެ ނުރައްކާތެރި އަނިޔާއަކުން ރައްކާތެރިކުރުމެވެ. މީގެ އިތުރުން، މޫދުގައި އޮންނަ އެއްޗެއްގައި ޖެހިގެން އުޅަނދުގެ ބުރަފައްޗަށް ނުވަތަ ގިއަރ ބޮކްސަށް ލިބިދާނެ ގެއްލުމަކުން ސަލާމަތްވުމަށްވެސް މި ފިޔަވަޅުގެ ސަބަބުން މަގުފަހިވެގެންދާނެއެވެ.
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ފާހަގަކޮށްފައިވާ ގޮތުގައި، ހަމައެކަނި ބުރަފަތީގައި ދާ ހަރުކުރުމަކުން ހުރިހާ ނުރައްކަލަކުން ފުރިހަމައަށް ސަލާމަތެއް ނުވެވޭނެއެވެ. އެހެންކަމުން، އުޅަނދު ދުއްވާ ފަރާތްތަކުން ހުރިހާ ވަގުތެއްގައިވެސް ވަށައިގެންވާ މާޙައުލަށް ރަނގަޅަށް ސަމާލުކަންދީގެން އުޅަނދު ދުއްވުމަށް ވަނީ އަންގާފައެވެ. އަދި އިންޖީނު ޖެއްސުމުގެ ކުރިން ބުރަފަތި ކައިރީގައި ނުރައްކަލެއް އޮތްތޯ ކަށަވަރުކުރުމާއި، އިންޖީނު ހިނގާ ވަގުތު ކިލް ކޯޑް ބޭނުންކުރުން ފަދަ ސަލާމަތީ ފިޔަވަޅުތަކަށް އަމަލުކުރުމަށް ވަނީ އިރުޝާދު ދީފައެވެ.
މޫދުގައި އުޅޭ މީހަކު ބުރަފަތީގައި ޖެހިދާނެ ފަދަ ނުރައްކަލެއް އޮތްނަމަ ވަގުތުން އިންޖީނު ނިއްވާލުމަށާއި، މޫދަށް ވެއްޓި ބުރަފަތީގައި ޖެހިދާނެ ފަދަ ނުރައްކާތަކާ ގުޅޭގޮތުން ދަތުރުވެރިންނަށް ކުރިން މަޢުލޫމާތު ދިނުމަށް ވުޒާރާއިން ވަނީ އަންގާފައެވެ. މީގެ އިތުރުން، އެ ސަރަޙައްދުގެ މެނޭޖްމަންޓް ޕްލޭންގައި ކަނޑައަޅާފައިވާ ދުވެލީގެ މިންގަނޑުތަކާއި ދުރުމިނަށް ބޯލެނބުމަކީ ހިތާމަވެރި ހާދިސާތަކުން ރައްކާތެރިވުމަށްޓަކައި ކުރެވޭނެ އެންމެ މުހިންމު މަސައްކަތްކަމުގައި ކަނޑައަޅާފައިވެއެވެ.
ކިޔުންތެރިންގެ ހިޔާލު