ޕީއެންސީގެ ފިކުރަކީ ގުނޑުމެއް ނާންނާނެ ވަރުގަދަ ފިކުރެއްކަމަށާއި އެ ޕާޓީއަކީ އެންމެ ކުރު މުއްދަތެއްގައި ރައްޔިތުންގެ އެންމެ ބޮޑު އިތުބާރު ލިބިފައިވާ ޕާޓީކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދ. މީދޫ ކައުންސިލްގެ ރައީސްގެ މަޤާމަށް ބޭފުޅަކު އިންތިޚާބުކުރުމަށް ބޭއްވި އިތުރުބުރުގެ ވޯޓުން ޕީއެންސީއަށް ލިބުނު ކާމިޔާބީ ފާހަގަކުރުމަށް އެ ރަށުގައި ބޭއްވި ޖަލްސާގައި ވާހަކަފުޅުދައްކަވަމުން، ރައީސް ވަނީ އެ އިންތިޚާބު ކާމިޔާބުކުރުމަށް މަސައްކަތްކޮށްދެއްވި ހުރިހާ ފަރާތްތަކަށް ޝުކުރު އަދާކުރައްވާފައެވެ. އަދި ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީއަށް ރަނގަޅު ނަތީޖާއެއް ހޯދައިދިނުމަށް މަސައްކަތްކުރެއްވި ހުރިހާ ބޭފުޅުންނަށްވެސް އެމަނިކުފާނު ޝުކުރު އަދާކުރެއްވިއެވެ.
ޕީއެންސީގެ ފިކުރަކީ އިސްލާމްދީން ޙިމާޔަތްކުރުމާއެކު، ދިވެހިރާއްޖޭގައި އަމާންކަމާއި ޞުލްޙަވެރިކަން ނަގަހައްޓައި، ޤައުމަށް ބޭނުންވާ ކުރިއެރުމާއި ތަރައްޤީ ހޯދައިދިނުމުގައި ސާބިތުވެ އޮންނަ ފިކުރެއްކަމަށް ރައީސް ސިފަކުރެއްވިއެވެ. ފާއިތުވި މުއްދަތުގައި ސަރުކާރުން ކުރި މަސައްކަތްތަކުންނާއި ޕީއެންސީގެ ފަރާތުން ރައްޔިތުންނަށް ފެނިގެންދިޔައީ މި ސިޔާސަތުތައް އަމަލީގޮތުން ތަންފީޒުކުރަމުންދާ މަންޒަރުކަމަށް އެމަނިކުފާނު ވިދާޅުވިއެވެ.
މީގެ އިތުރުން، ނިމިދިޔަ ސަރުކާރުން ރާއްޖޭގެ ކަނޑުގެ ސަރަހައްދުން ބޮޑު ބައެއް ޤާނޫނުއަސާސީއާއި ޤާނޫނުތަކާ ޚިލާފަށް ރައްޔިތުންގެ މަޖިލީހުގެ ބަހެއް ނެތި ދޫކޮށްލާފައިވާކަން ފާހަގަކުރައްވައި، އެ ސަރަހައްދު އަނބުރާ ހޯދުމުގެ މަސައްކަތް ބައިނަލްއަޤުވާމީ މިންގަނޑުތަކުގެ ތެރެއިން މިހާރު ކުރިއަށްދާކަމަށް ރައީސް ވިދާޅުވިއެވެ. މިއީ ޚަރަދު ބޮޑު މަސައްކަތަކަށް ވިޔަސް، ޤައުމުގެ ޙައްޤުގައި ކޮންމެހެން ކުރަންޖެހޭ ކަމެއްކަމަށް އެމަނިކުފާނު ވިދާޅުވިއެވެ.
ސަރުކާރުގެ ޚާރިޖީ ސިޔާސަތަކީ ދިވެހިން އިސްކުރުމުގެ ސިޔާސަތެއްކަން ފާހަގަކުރައްވަމުން، ދިވެހި ރައްޔިތުންގެ ތަރައްޤީއަށް އެހީތެރިވާ ކޮންމެ ޤައުމަކާވެސް ގާތް ގުޅުމެއް ބާއްވާނެކަމަށް ރައީސް ވިދާޅުވިއެވެ. ނަމަވެސް މި ސަރުކާރުގައި އިސްރާއީލާއެކު އެއްވެސް ގުޅުމެއް ނޯންނާނެކަން ކަށަވަރުކޮށްދެއްވަމުން، އިސްރާއީލު ޕާސްޕޯޓުގައި ރާއްޖެއަށް އެތެރެނުވެވޭނެކަން ކަނޑައެޅީ މި ސަރުކާރުންކަން އެމަނިކުފާނު ފާހަގަކުރެއްވިއެވެ. އަދި ސަރުކާރުން ތަންފީޒުކުރާ ކޮންމެ ސިޔާސަތެއްގެ މައިގަނޑު އަސާސަކީ އިސްލާމްދީނަށް ނަޞްރުދިނުންކަމުގައި ރައީސް ވިދާޅުވިއެވެ.
ކިޔުންތެރިންގެ ހިޔާލު