އިންޑިއާ ސަރުކާރުން ދިވެހިރާއްޖެއަށް ފޯރުކޮށްދޭ ހިމަބިއްސާއި ރުބެއްލާ ވެކްސިންގެ ދެވަނަ ޝިޕްމަންޓާއި ތިން ޓަނުގެ ސިއްހީ ސާމާނު މިއަދު މާލެ ގެނެސްފިއެވެ.
މި އެހީގެ ދަށުން ވިހިހާސް ޑޯޒްގެ އެމްއާރް ވެކްސިނާއި، ގާތްގަނޑަކަށް ތިން ޓަނުގެ ސިއްހީ ސާމާނު ވަނީ ރާއްޖެއަށް ގެނެސްފައެވެ. މީގެ ތެރޭގައި ބަލި ދެނެގަތުމަށް ބޭނުންކުރާ ޑައިގްނޯސްޓިކް ކިޓުތަކާއި، ސިއްހީ ފަރުވާގެ ކަންކަމުގައި ބޭނުންކުރާ ތަފާތު ތަކެތި ހިމެނެއެވެ. މި ތަކެއްޗަކީ ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއާ ހަވާލުކުރުމަށް މި މަހުގެ ތެރޭގައި އިންޑިއާ ސަރުކާރުން ހަދިޔާކުރި ތަކެއްޗެވެ.
ރާއްޖޭގައި ހުންނަ އިންޑިއާގެ ހައިކޮމިޝަނުން މީސްމީޑިއާ މަންސަ އެކްސްގައި ކުރެއްވި ޕޯސްޓެއްގައި ބަޔާންކޮށްފައިވާ ގޮތުގައި، މި އެހީއަކީ ދިވެހިރާއްޖެއާއި އިންޑިއާއާ ދެމެދު އޮތް ޒަމާންވީ ވަރުގަދަ ގުޅުމާއި، އާންމު ސިއްހަތު ކުރިއެރުވުމަށް ދެޤައުމުން ދޭ އަހައްމިއްޔަތު ހާމަކޮށްދޭ ކަމެކެވެ. އަދި އަވަށްޓެރި ގައުމަކަށް ކަމެއް ދިމާވާ ހިނދު އެންމެ ފުރަތަމަ އެހީތެރިކަން ފޯރުކޮށްދޭ ގައުމެއްގެ ގޮތުގައި ދެމިއޮތުމަށް އިންޑިއާއިން އަބަދުވެސް އިސްކަންދޭކަން އެ ޕޯސްޓުގައި ފާހަގަކޮށްފައިވެއެވެ.
ދިވެހިރާއްޖެއަށް ދިމާވާ ކަންކަމުގައި އިންޑިއާ ސަރުކާރުގެ ފަރާތުން އަބަދުވެސް ދިވެހިރާއްޖެއަށް އެހީތެރިކަން ލިބެމުންދާތީ، އެކަން ފާހަގަކޮށް އިންޑިއާ ސަރުކާރަށް ދިވެހި ސަރުކާރުގެ ފަރާތުން ވަނީ ޝުކުރު ދަންނަވާފައެވެ. ސިއްހީ ދާއިރާއިން ވެދޭ މިފަދަ އެހީތެރިކަމުގެ ސަބަބުން ރާއްޖޭގެ އާންމު ސިއްހަތުގެ ނިޒާމު އިތުރަށް ހަރުދަނާވެގެންދާނެ ކަމަށް ސަރުކާރުން ދެކެއެވެ.
ކިޔުންތެރިންގެ ހިޔާލު