ދުނިޔޭގެ ކާބޯތަކެތީގެ ރައްކާތެރިކަމުގެ ދުވަސް ފާހަގަކުރަމުންދާއިރު، ކާބޯތަކެތީގެ ރައްކާތެރިކަން ކަށަވަރުކުރުމަކީ އެންމެންގެ ވެސް ޒިންމާއެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.
ކާބޯތަކެތީގެ ރައްކާތެރިކަން ކަށަވަރުކުރުމުގެ މަސައްކަތުގައި ސިއްހީ ދާއިރާގައި ގިނަ އަހަރުތަކެއް ވަންދެން ޚިދުމަތްކުރައްވާފައިވާ ފުޑް ސައިންޓިސްޓެއްގެ ހައިސިއްޔަތުން ފަސްޓް ލޭޑީ ސާޖިދާ މުޙައްމަދު ފާހަގަކުރެއްވި ގޮތުގައި، ކާބޯތަކެތީގެ ޒަރީއާއިން ޖެހޭ ބަލިތައް ނައްތާލުމަކީ ސިއްހީ ނިޒާމަށާއި ރައްޔިތުންގެ ދިރިއުޅުމަށް އުފުލަންޖެހޭ ބުރަ ކުޑަކުރުމަށް ވަރަށް މުހިންމު ކަމެކެވެ. ރައްކާތެރި ކާނާ ބޭނުންކުރުމަކީ އާންމު ސިއްހަތު ރައްކާތެރިކޮށް، ދުޅަހެޔޮ ދިރިއުޅުމެއް އުޅުމަށް އެޅޭ ވަރަށް މުހިންމު ފިޔަވަޅެއްކަން އެކަމަނާ ފާހަގަކުރެއްވިއެވެ.
ކާބޯތަކެތީގެ ރައްކާތެރިކަން ކަށަވަރުކުރުމަކީ ހަމައެކަނި ވަކި ފަރާތެއްގެ މަސައްކަތެއް ނޫން ކަމަށާއި، މިއީ ކާބޯތަކެތި އުފައްދާ ފަރާތްތަކާއި، ވިޔަފާރިކުރާ ފަރާތްތަކާއި، ސިއްހީ ހިދުމަތްތެރިން އަދި އެންމެހާ ކޮންސިއުމަރުންގެ ވެސް ޒިންމާއެއް ކަމަށް އެކަމަނާ ވިދާޅުވިއެވެ. ކާބޯތަކެތި ތައްޔާރުކުރުމާއި، ރައްކާކުރުމާއި އަދި ބޭނުންކުރުމުގެ މަރުހަލާތަކުގައި އެތަކެއްޗަކީ ތަޣައްޔަރުވެފައިވާ ތަކެތި ނޫންކަން ކަށަވަރުކުރުމަކީ ކޮންމެ މީހެއްގެ ވެސް ވާޖިބެއްކަމަށް ފަސްޓް ލޭޑީ ފާހަގަކުރެއްވިއެވެ.
ޢާންމު ސިއްހަތު ރައްކާތެރިކޮށް، ދުޅަހެޔޮ މުސްތަޤްބަލެއް ބިނާކުރެވޭނީ ކާބޯތަކެތީގެ ރައްކާތެރިކަން ކަށަވަރު ކުރުމަށް އެންމެން ގުޅިގެން މަސައްކަތްކޮށް، އެކަމަށް އެހީތެރިވެގެންކަމަށް އެކަމަނާ ވިދާޅުވިއެވެ. ސަރުކާރުން ވެސް ދަނީ ކާބޯތަކެތީގެ ރައްކާތެރިކަން ކަށަވަރު ކުރުމަކީ އާންމު ސިއްހަތު ހިމާޔަތްކުރުމަށްޓަކައި ނުހަނު މުހިންމުކަމެއްގެ ގޮތުގައި ދެކި، އެކަމަށް ބޭނުންވާ ގިނަ ފިޔަވަޅުތަކެއް ތަންފީޒު ކުރަމުންނެވެ.
ކިޔުންތެރިންގެ ހިޔާލު