ޕާކިސްތާނުގެ ދާޚިލީ ވަޒީރު މުހްސިން ނަގްވީ މިވަގުތު ހުންނެވީ އީރާނުގެ ވެރިރަށް ތެހެރާނުގައެވެ.
ތެހެރާނަށް ވަޑައިގެން ޕާކިސްތާނުގެ ދާޚިލީ ވަޒީރު ވިދާޅުވީ، އޭނާ ތެހެރާނަށް ވަޑައިގެންނެވީ ޕާކިސްތާނުގެ ބޮޑުވަޒީރު ޝަހްބާޒް ޝަރީފާއި، ޕާކިސްތާނު އަސްކަރިއްޔާގެ ވެރިޔާ ފީލްޑް މާޝަލް ސައްޔިދު އާސިމް މުނީރުގެ ވަރަށް ޚާއްސަ މެސެޖެއް، އީރާނުގެ ރޫހީ ލީޑަރު އާޔަތުﷲ މުޖުތަބާ ޚާމަނާއީއަށް ރައްދު ކުރެއްވުމަށް ކަމަށެވެ.
އެއީ، ކޮން މެސެޖެއްކަމެއް ޕާކިސްތާނުގެ ދާޚީލީ ވަޒީރު ސީދާ ވިދާޅެއް ނުވެއެވެ. ހަމައެކަނި ވިދާޅުވީ، އެއީ މިހާރުގެ ހާލަތާ ގުޅޭ މެސެޖެއް ކަމަށެވެ.
ހަނގުރާމަ ހުއްޓާލުމާ ގުޅޭގޮތުން އީރާނާއި އެމެރިކާއާ ދެމެދު ނުސީދާކޮށް ދެކެވޭ ވާހަކަތަކާއި އަދި މެސެޖްތައް ބަދަލުކުރުމުގައި މެދުވެރިއެއްގެ ދައުރު އަދާކުރަމުން ގެންދަނީ ޕާކިސްތާނުންނެވެ.
ޕާކިސްތާނުގެ ދާޚިލީ ވަޒީރު މުހްސިން ނަގްވީ ތެހެރާނަށް ވަޑައިގެން އެންމެ ފުރަތަމަ ބައްދަލު ކުރެއްވީ އީރާނުގެ ދާޚީލީ ވަޒީރު އިސްކަންދަރު މުމޭނީއާއެވެ. އީރާނުގެ ޚާރިޖީ ވަޒީރު އައްބާސް އަރަޣްޗީއާވެސް މުހްސިން ނަގްވީ ވަނީ ބައްދަލު ކުރައްވައި މަޝްވަރާތައް ބާއްވާފައެވެ.
ޕާކިސްތާނުގެ ދާޚިލީ ވަޒީރު މުހްސިން ނަގްވީ އީރާނުގެ ރޫހީ ލީޑަރު އާޔަތުﷲ މުޖުތަބާ ޚާމަނާއީއާ ބައްދަލު ކުރައްވާނީ މިއަދުގެ ވަގުތެއްގައި ކަމަށް ބެލެވެއެވެ.
އަދި ޕާކިސްތާނުގެ ދާޚީލީ ވަޒީރު ގެންނެވި މެސެޖަކީ ހަނގުރާމަ ނިމުމަކަށް ގެނައުމުގެ އެންމެ ފަހު ފުރުސަތަށް ވުމަކީ އެކަށީގެންވާ ކަމެއް ކަމަށް ބައެއް ރިޕޯޓްތައް ބުނެއެވެ.
އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފްތާގައި ބުނެފައިވަނީ، އީރާނާއި އެމެރިކާއާ ދެމެދު މި ހަފްތާގައި އެއްބަސްވުމެއް ހެދޭނޭ ކަމަށެވެ.
އެމެރިކާއާ ވާހަކަ ދެއްކުމުގައި އީރާނުގެ ފަރާތުން އީރާނު ޕާލަމެންޓުގެ ރައީސް މުހައްމަދު ބާގިރު ގާލިބާފާއި، ޚާރިޖީ ވަޒީރު އައްބާސް އަރަޣްޗީ އަދި އެހެން ބޭފުޅުން އުޅުއްވި ނަމަވެސް، އެންމެ ފަހުބަސް ވިދާޅުވާ ބޭފުޅަކީ ރޫހީ ލީޑަރެވެ. ޕާކިސްތާނުން މިހާރު މުއާމަލާތް ކުރަމުންގެންދަނީ ސީދާ މުޖުތަބާ ޚާމަނާއީއާއެވެ.
އެމެރިކާއާއި އިސްރާއީލުން އީރާނާ ދެކޮޅަށް ފެށި އުދުވާނީ ހަނގުރާމަ ރަސްމީކޮށް ނިންމުމަށްޓަކައި އެމެރިކާއިން ގެންދަނީ އީރާނާއެކު އެއްބަސްވުމެއް ހެދުމަށް މަސައްކަތް ކުރަމުންނެވެ.
ދެފަރާތުން ނުކުތާތަކެއް ހުށަހަޅައި ވާހަކަ ދައްކަމުން ގެންދިޔަ ނަމަވެސް، އެއްގަލަކަށް ނޭރޭ ބޮޑެތި މައްސަލަތައް އެބަ ހުއްޓެވެ. އޭގެ ތެރޭގައި އީރާނުގެ ނިއުކްލިއަރ ޕްރޮގްރާމާއި، އީރާނުގައި ފައްކާކޮށްފައި ހުރި ޔޫރޭނިއަމްއާއި، ހޮރްމޫޒު ކަނޑުއޮޅީގެ މައްސަލައާއި، އެމެރިކާގެ ބްލޮކޭޑާއި، އެމެރިކާއިން ގަނޑުކޮށްފައިހުރި އީރާނުގެ ފަންޑުތައް ދޫކޮށްލުމާއި، އީރާނަށް ލިބުނު ގެއްލުމުގެ ބަދަލު ހޯދުމުގެ މައްސަލަވެސް ހިމެނެއެވެ.
ކިޔުންތެރިންގެ ހިޔާލު