ދައުލަތަށް އާމްދަނީ އާއި ހިލޭ އެހީގެ ގޮތުގައި 39.9 ބިލިއަން ރުފިޔާ ލިބިފައިވާތީ، މިދިޔަ އަހަރަކީ މިހާތަނަށް ދައުލަތަށް އެންމެ ގިނައިން އާމްދަނީ ލިބުނު އަހަރު ކަމަށް ފިނޭންސް މިނިސްޓްރީން ބުނެފިއެވެ.
މިދިޔަ އަހަރުގެ ބަޖެޓުގެ ނަތީޖާ ބަޔާން ފިނޭންސް މިނިސްޓރީން މިއަދު ނެރެފައިވާއިރު އެ ބަޔާނުގައި ބުނެފައިވަނީ، 2024 ވަނަ އަހަރު ލިބުނު 35.1 ބިލިއަން ރުފިޔާއާ އަޅައިބަލާއިރު، މިދިޔަ 2025 ވަނަ އަހަރު 4.8 ބިލިއަން ރުފިޔާ އިތުރަށް ލިބިފައިވާކަމަށެވެ. މިއީ 13.6 ޕަސެންޓްގެ ކުރިއެރުމެކެވެ.
މިދިޔަ އަހަރު ދައުލަތަށް ލިބުނު އާމްދަނީ އަންދާޒާ ކުރި މިންވަރަށްވުރެ އިތުރުވެފައިވާކަން ފާހަގަކޮށް، ފިނޭންސް މިނިސްޓްރީން ބުނެފައިވަނީ، 31 އޮކްޓޯބަރު 2024 ގައި އެ މިނިސްޓްރީން ހުށަހެޅި ބަޖެޓުގައި 2025 ވަނަ އަހަރު، އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް އަންދާޒާކުރީ 39.8 ބިލިއަން ރުފިޔާ ކަމަށެވެ.
ނަމަވެސް އަހަރު ނިމުނުއިރު ލިބުނު އާމްދަނީ އަންދާޒާކުރި މިންވަރަށް ވުރެ 74.4 މިލިއަން ރުފިޔާ އިތުރުވެފައިވާކަމަށްވެސް ބުނެފައިވެއެވެ.
އާމްދަނީ އިތުރުވި މައިގަނޑު ސަބަބެއްގެ ގޮތުގައި ފިނޭންސް މިނިސްޓްރީން ފާހަގަ ކޮށްފައިވަނީ، ފަތުރުވެރިކަމުގެ ދާއިރާއިން ލިބުނު ކުރިއެރުމާއި ޓެކްސް ނޫން އާމްދަނީ އިތުރުވުމެވެ.
ބައެއް ދާއިރާތަކުން ލިބުނު އާމްދަނީ އަންދާޒާ ކުރި ވަރަށްވުރެ މަދުވި ނަމަވެސް، އެހެން ދާއިރާތަކުން އިތުރުވި އާމްދަނީއާ އެކު ޖުމުލަ އާމްދަނީ ބަޖެޓުގެ އަމާޒަށް ވާސިލުވެފައިވާކަމަށްވެސް ބުނެފައިވެއެވެ.
ކިޔުންތެރިންގެ ހިޔާލު