ޓީ.ޖީ.އެސް.ޓީ އާއި ރިސޯޓް ކުލި އިތުރުވުމާއެކު ދައުލަތަށް ލިބުނު އާމްދަނީ 5.1 އިތުރުވެއްޖެ ކަމަށް ފިނޭންސް މިނިސްޓްރީން އެންމެ ފަހުން އާންމުކުރި ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކައިފިއެވެ.
24 ސެޕްޓެމްބަރގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 30.205 ބިލިއަން ރުފިޔާ ލިބިފައިވާއިރު، މިއީ 2025 ވަނަ އަހަރުގެ އެ މުއްދަތުގައި ލިބުނު 28.750 ބިލިއަން ރުފިޔާއާ އަޅާބަލާއިރު 5.1 އިންސައްތައިގެ ކުރިއެރުމެއް ކަމަށް ރިޕޯޓުގައި ފާހަގަކޮށްފިއެވެ. މީގެ ތެރެއިން ޓެކުހުގެ ގޮތުގައި ލިބުނު އާމްދަނީ ވަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެ، 9.5 އިންސައްތައިގެ ކުރިއެރުމެއް ހޯދާފައެވެ.
ފާއިތުވެދިޔަ ހަފުތާގައި ދައުލަތަށް ލިބުނު މައިގަނޑު އާމްދަނީގެ ތެރޭގައި ފަތުރުވެރިކަމުގެ ދާއިރާގެ މުދަލާއި ހިދުމަތުގެ އަގުން ނަގާ ޓެކްސް (ޓީ.ޖީ.އެސް.ޓީ) ހިމެނެއެވެ. ޓީ.ޖީ.އެސް.ޓީގެ ގޮތުގައި މިހާތަނަށް 7.880 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ އެ މުއްދަތުގައި ލިބުނު 7.669 ބިލިއަން ރުފިޔާއާ އަޅާބަލާއިރު 2.7 އިންސައްތައިގެ އިތުރުވުމެކެވެ. މީގެ އިތުރުން ރިސޯޓް ކުލީގެ ގޮތުގައި ލިބުނު އާމްދަނީ 1.245 ބިލިއަން ރުފިޔާއިން 1.267 ބިލިއަން ރުފިޔާއަށް އުފުލި، 1.7 އިންސައްތައިގެ ކުރިއެރުމެއް ވަނީ ލިބިފައެވެ.
އާމްދަނީ ލިބޭ އެހެނިހެން ދާއިރާތަކުން ވެސް މިދިޔަ އަހަރާ އަޅާބަލާއިރު ކުރިއެރުންތަކެއް ވަނީ ފެނިފައެވެ. އެގޮތުން އިމްޕޯޓް ޑިއުޓީ 13.1 އިންސައްތަ އިތުރުވެ 2.484 ބިލިއަން ރުފިޔާ ލިބިފައިވާއިރު، ވިޔަފާރި އާއި މުދަލުގެ ޓެކުހުން ލިބުނު އާމްދަނީ 21.4 އިންސައްތަ އިތުރުވެ 5.778 ބިލިއަން ރުފިޔާއަށް ވަނީ އަރާފައެވެ. އާންމު މުދަލާއި ހިދުމަތުގެ ޓެކްސް (ޖީ.އެސް.ޓީ) 10.8 އިންސައްތަ އިތުރުވެ 4.051 ބިލިއަން ރުފިޔާ ލިބިފައިވާއިރު، އެއާޕޯޓް ސާވިސް ޗާޖާއި ޑިޕާޗާ ޓެކުހުން ލިބުނު އާމްދަނީ 8.8 އިންސައްތަ އިތުރުވެ 1.431 ބިލިއަން ރުފިޔާއަށް ވަނީ އުފުލިފައެވެ. މުދަލުން ލިބޭ އާމްދަނީ 25.3 އިންސައްތަ އިތުރުވެ 1.856 ބިލިއަން ރުފިޔާ ލިބިފައިވާއިރު، ހިލޭ އެހީގެ ގޮތުގައި ލިބުނު މިންވަރު ދެގުނައަށްވުރެ އިތުރުވެ 0.237 ބިލިއަން ރުފިޔާއިން 0.496 ބިލިއަން ރުފިޔާއަށް ވަނީ މަތިވެފައެވެ.
ދައުލަތުގެ ޖުމްލަ ހަރަދު ހުރީ 33.562 ބިލިއަން ރުފިޔާގައެވެ. މިއީ 2025 ވަނަ އަހަރުގެ އެ މުއްދަތުގައި ހަރަދުކުރި 28.251 ބިލިއަން ރުފިޔާއާ އަޅާބަލާއިރު 18.8 އިންސައްތަ އިތުރު އަދަދެކެވެ. ރިކަރަންޓް ހަރަދުތައް 24.321 ބިލިއަން ރުފިޔާއިން 28.897 ބިލިއަން ރުފިޔާއަށް ނުވަތަ 18.8 އިންސައްތަ ވަނީ އިތުރުވެފައެވެ. މީގެ ތެރެއިން އާސަންދައަށް ކުރި ހަރަދު 23.3 އިންސައްތަ އިތުރުވެ 1.748 ބިލިއަން ރުފިޔާއަށް ވަނީ އަރާފައެވެ.
ރިކަރަންޓް ހަރަދުތަކުގެ ތެރެއިން މުސާރަ އާއި އިނާޔަތްތަކަށް ކުރި ހަރަދު 10.1 އިންސައްތަ އިތުރުވެ 10.702 ބިލިއަން ރުފިޔާއަށް އަރާފައިވާއިރު، އިދާރީ އަދި ހިންގުމުގެ ހަރަދުތައް 24.3 އިންސައްތަ އިތުރުވެ 18.123 ބިލިއަން ރުފިޔާއަށް ވަނީ މަތިވެފައެވެ. ސަބްސިޑީއަށް ކުރި ހަރަދު 77.1 އިންސައްތަ އިތުރުވެ 4.148 ބިލިއަން ރުފިޔާއަށް އަރާފައިވާއިރު، ކައުންސިލްތަކަށް ދިން ގްރާންޓް 16.6 އިންސައްތަ އިތުރުވެ 1.884 ބިލިއަން ރުފިޔާއަށް ވަނީ އުފުލިފައެވެ. އަދި އެހެނިހެން އެހީތަކާއި އިނާޔަތްތަކަށް ކުރި ހަރަދު 53.3 އިންސައްތަ އިތުރުވެ 1.899 ބިލިއަން ރުފިޔާއަށް ވަނީ އަރާފައެވެ.
ތަރައްގީގެ މަޝްރޫއުތަކަށް ކުރާ ހަރަދު ނުވަތަ ކެޕިޓަލް ހަރަދުތައް 18.7 އިންސައްތަ އިތުރުވެ 4.666 ބިލިއަން ރުފިޔާއަށް ވަނީ އަރާފައެވެ. މީގެ ތެރެއިން އުމްރާނީ ތަރައްގީގެ ވަސީލަތްތަކަށް ކުރި ހަރަދު 18.7 އިންސައްތަ އިތުރުވެ 4.109 ބިލިއަން ރުފިޔާއަށް އަރާފައިވެއެވެ. އޭގެ ތެރޭގައި ބިމާއި އިމާރާތްތަކަށް ކުރި ހަރަދު 35.2 އިންސައްތަ، ފާލަމާއި ބަނދަރު ހެދުމަށް ކުރި ހަރަދު 57.3 އިންސައްތަ، އަދި އެހެނިހެން އުމްރާނީ ވަސީލަތްތަކަށް ކުރި ހަރަދު 49.3 އިންސައްތަ އިތުރުވެފައިވެއެވެ. މީގެ އިތުރުން ކެޕިޓަލް އިކުއިޕްމަންޓަށް ކުރި ހަރަދު ވެސް ވަނީ 18.6 އިންސައްތަ އިތުރުވެ 0.540 ބިލިއަން ރުފިޔާއަށް އަރާފައެވެ.
މި ރިޕޯޓުގައިވާ ގޮތުން 24 ސެޕްޓެމްބަރު 2026 ގެ ނިޔަލަށް ދައުލަތުގެ ޕްރައިމަރީ ސާޕްލަސް އަކީ 0.442 ބިލިއަން ރުފިޔާއެވެ. ޖުމްލަ އާމްދަނީ އާއި ހިލޭ އެހީގެ ގޮތުގައި 30.205 ބިލިއަން ރުފިޔާ ލިބިފައިވާއިރު، ރިކަރަންޓް ހަރަދާއި ތަރައްގީގެ މަޝްރޫއުތަކަށް ކުރި ޖުމްލަ ހަރަދަކީ 33.562 ބިލިއަން ރުފިޔާއެވެ.
ކިޔުންތެރިންގެ ހިޔާލު