ހުޅުމާލޭގެ ކޮންސްޓްރަކްޝަން ސައިޓެއްގެ ތެރޭގައި ބަންގްލަދޭޝް މީހަކު ރަހީނުކޮށް އަނިޔާކުރި މައްސަލައިގައި ހައްޔަރުކުރި ފަސް މީހުންގެ ތެރެއިން ހަތަރު މީހަކު ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި މި ހާދިސާ ހިނގާފައިވަނީ ފާއިތުވި މާރިޗު މަހުގެ 27 ވަނަ ދުވަހުއެވެ. ހުޅުމާލޭގައި ހަދަމުންދާ އިމާރާތެއްގެ ތެރޭގައި ބަންގްލަދޭޝް ފިރިހެނަކު ރަހީނުކޮށް، އޭނާއަށް އަނިޔާކޮށްފައިވަނީ އޭނާއާއެކު މަސައްކަތްކުރާ އެ ގައުމުގެ ބައެކެވެ. ފުލުހުން ހިންގި ހާއްސަ އޮޕަރޭޝަނެއްގެ ތެރެއިން މި މީހާ ފަހުން ފެނިފައިވަނީ ވިލިމާލެއިންނެވެ.
މި މައްސަލައިގައި ފުލުހުން ވަނީ ބަންގްލަދޭޝްއަށް ނިސްބަތްވާ ފަސް މީހަކު ހައްޔަރުކޮށްފައެވެ. އެއީ އުމުރުން 39 އަހަރުގެ އެމްޑީ ޝާހް އާލަމްއާއި، 34 އަހަރުގެ އެމްޑީ މެހެދީ ހަސަންއާއި، 30 އަހަރުގެ އެމްޑީ ހުސައިންއާއި، 38 އަހަރުގެ ސާފިފް ހަސަންގެ އިތުރުން 20 އަހަރުގެ ރަސަލްއެވެ. މި މީހުންގެ މައްޗަށް ކުރެވިފައިވާ ތުހުމަތުތަކުގެ ތެރޭގައި ހުއްދަނޫން ގޮތުގައި މީހަކު ހިފަހައްޓައިގެން ގެންގުޅުމާއި، ބިރުދެއްކުމާއި، ރަހީނުކުރުމުގެ އިތުރުން މާރާމާރީ ހިންގުން ހިމެނެއެވެ.
އޭޕްރީލް މަހުގެ 10 ވަނަ ދުވަހު ބޭއްވުނު ބަންދުގެ މުއްދަތު ޖަހާ މަޖިލީހުގައި ތަހުގީގުކުރާ އޮފިސަރު ކޯޓަށް މައުލޫމާތު ދީފައިވާ ގޮތުގައި، ނުރައްކާތެރި ހަތިޔާރެއް ބޭނުންކޮށްގެން އަނިޔާ ލިބުނު މީހާއަށް ބޮޑެތި ޖިސްމާނީ އަނިޔާތަކެއް ދީފައިވަނީ އެމްޑީ ހުސައިންއެވެ. އަދި މި އަމަލު ހިންގާފައިވަނީ ގްރޫޕަކުން ކަމަށާއި، މިކަމުގައި އެންމެ އިސްކޮށް ހަރަކާތްތެރިވެފައިވަނީ އޭނާކަމަށް ފުލުހުން ބުނެފައިވެއެވެ.
ކޯޓު އަމުރުގައިވާ ގޮތުން، ހަވާލުކުރެވުނު ޕާސްޕޯޓުތަކެއް އަނބުރާ ދިނުމަށް ދެކޮޅު ހެދުމުން ހިނގި ހަމަނުޖެހުމެއްކަމަށް ބުނެ، ފުރަތަމަ ހުސައިން ވަނީ ތުހުމަތުތަކަށް އިއުތިރާފުވެފައެވެ. ނަމަވެސް، ނުރައްކާތެރި ހަތިޔާރެއް ބޭނުންނުކުރާ ކަމަށާއި، ހަމަލާދިނީ އަތުންކަމަށް އޭނާ ބުނެފައިވެއެވެ. އެހެންނަމަވެސް، މި މަހުގެ 10 ވަނަ ދުވަހު ބޭއްވުނު އަޑުއެހުމުގައި އޭނާ ވަނީ މި ދައުވާތަކަށް އިންކާރުކޮށްފައެވެ.
މި މައްސަލައިގައި ކްރިމިނަލް ކޯޓުން ވަނީ އެމްޑީ ހުސައިންގެ ބަންދަށް 30 ދުވަސް އިތުރުކޮށްދީފައެވެ. އަދި ދެން ތިބި ހަތަރު މީހުން ޝަރީއަތް ނިމެންދެން ބަންދުކުރުމަށް ވަނީ އަމުރުކޮށްފައެވެ.
ފާއިތުވި މަހު ބޭއްވުނު އަޑުއެހުމުގައި އެމްޑީ ޝާހް އާލަމް ކޯޓުގައި ބުނެފައިވަނީ، ހަމަނުޖެހުން ހިނގި ސަރަހައްދުގައި އޭނާ ދިރިއުޅުނު ކަމުގައިވިޔަސް، އެކަމުގައި ބައިވެރިވެ އެއްވެސް މީހަކަށް އަނިޔާކޮށްފައި ނުވާނެ ކަމަށެވެ. ހަމައެފަދައިން، އެމްޑީ މެހެދީ ހަސަންވެސް ވަނީ އޭނާ އެތާނގައި ހުރިނަމަވެސް އެއްވެސް އަނިޔާއެއް ކޮށްފައި ނުވާނެކަމަށް ބުނެފައެވެ. މީގެ އިތުރުން ސާފިފް ހަސަންއާއި ރަސަލްވެސް ވަނީ މާރާމާރީގައި ބައިވެރިނުވާކަމަށާއި އެއްވެސް މީހަކަށް އަނިޔާކޮށްފައި ނުވާނެކަމަށް ކޯޓުގައި ބުނެފައެވެ. މި މައްސަލައިގެ ތަހުގީގު ފުލުހުން ދަނީ އިތުރަށް ކުރިއަށް ގެންދަމުންނެވެ.
ކިޔުންތެރިންގެ ހިޔާލު