ބައެއް ނޫސްތަކުގައި ފަތުރާފައިވާ ދޮގު ޚަބަރުތަކާ ގުޅިގެން، ފިތުނަފަސާދަ އުފައްދައިގެން ޕީއެންސީ ބައިބައި ނުކުރެވޭނެކަމަށް ރައްޔިތުންގެ މަޖިލީހުގެ ރައީސް އަދި އެ ޕާޓީގެ ޗެއާޕާސަން އަބްދުއްރަހީމް އަބްދުﷲ އާއި ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވެއްޖެއެވެ.
ފޭސްބުކްގައި ކުރެއްވި ޕޯސްޓެއްގައި އަބްދުއްރަހީމް ވިދާޅުވީ، ފިތުނަފަސާދަ އުފައްދައިގެން ޕީއެންސީ ބައިބައި ނުކުރެވޭނެ ކަމަށެވެ. އަދި އެ ޕާޓީގެ ހުރިހާ މެމްބަރުން ތިއްބެވީ ޕާޓީގެ ރައީސް އަދި ރާއްޖޭގެ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުއާއެކު ސާބިތުވެކަމަށް އޭނާ ފާހަގަކުރެއްވިއެވެ. ޕީއެންސީގެ އެތެރޭގައި އެއްވެސް މައްސަލައެއް ނެތްކަމާއި، އެންމެން ތިބީ އެއް ރޫހެއްގައި ގުޅިގެންކަން އޭނާގެ ވާހަކައިގައި ޔަގީންކޮށްދެއްވިއެވެ.
ބައެއެއް ނޫސްތަކުން ރިޕޯޓުކޮށްފައިވާ ގޮތުގައި، ޕީއެންސީގެ މެމްބަރުން ވަނީ ޕީއެންސީގެ މެންބަރުންގެ މަޖިލީހުން ރައީސް މުއިއްޒުގެ އެދިލެއްވުމެއް ފާސްކުރަން ދެކޮޅުހަދާފައެވެ. ނަމަވެސް އަބްދުއްރަހީމް ވަނީ މި ޚަބަރު މުޅިން ދޮގުކުރައްވާފައެވެ. އޭނާ ވިދާޅުވި ގޮތުގައި، މެމްބަރުންގެ މަޖިލީހުން ވަކި ގޮތެއް ނިންމަން ރިޔާސަތުގައި އިންނެވި ރައީސް މުއިއްޒު އެއްވެސް ކަމެއް ހުށަހަޅުއްވާފައެއް ނުވެއެވެ. އަދި ޕީއެންސީ އަކީ ފިތުނަފަސާދަ އުފައްދައިގެން ބައިބައިކުރެވޭނެ ފަދަ ބަލިކަށި ޕާޓީއެއް ނޫންކަން އޭނާ ތަކުރާރުކުރެއްވިއެވެ.
މި މައްސަލައާ ގުޅިގެން ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހުވެސް ވަނީ އެކްސްގައި ޕޯސްޓެއް ކުރައްވާފައެވެ. ފަލާހު ވިދާޅުވީ، ނޫސްތަކުގައި ފަތުރަމުންދާ އެ ޚަބަރަކީ ހަގީގަތާ ޚިލާފު ދޮގު ޚަބަރެއް ކަމަށެވެ. މީގެ އިތުރުން، ޕީއެންސީ އަކީ ޑިމޮކްރެސީގެ ރިވެތި އުސޫލުތަކުގެ މަތިން ހިންގަމުންދާ ޕާޓީއެއް ކަމަށާއި، އެ ޕާޓީގެ ހުރިހާ ނިންމުންތަކަކީވެސް މެމްބަރުންގެ މެދުގައި މަޝްވަރާކޮށްގެން ނިންމާ ނިންމުންތަކެއްކަމަށް ފަލާހު ވިދާޅުވިއެވެ.
ކިޔުންތެރިންގެ ހިޔާލު