އެމްޑީޕީގެ ޗެއާޕާސަންގެ މަޤާމު އެހެން ފަރާތަކަށް ނުދީ، ކުރީގެ ރައީސް މުޙައްމަދު ނަޝީދަށް އެ ފުރުސަތު ދެއްވުމަށް ކުޅުދުއްފުށީ ސިޓީގެ ޑެޕިއުޓީ މޭޔަރު އަޙުމަދު އަބްދުﷲ ގޮވާލައްވައިފިއެވެ.
މީސްމީޑިއާ މެދުވެރިކޮށް ކުރެއްވި ޕޯސްޓެއްގައި އަޙުމަދު އަބްދުﷲ ވިދާޅުވީ، ރައީސް ނަޝީދު އެމްޑީޕީގެ ޗެއާޕާސަންގެ ގޮތުގައި ޚިދުމަތް ކުރެއްވުމަށް ތައްޔާރަށް ހުންނެވި ދަނޑިވަޅެއްގައި، އެހެން ފަރާތަކަށް އެ ފުރުސަތު ދޭންޖެހޭ އެއްވެސް ސަބަބެއް ނެތް ކަމަށެވެ. އެގޮތުން، މިވަގުތު ޕާޓީއަށް އެންމެ ބޮޑަށް ބޭނުންވަނީ އެމްޑީޕީގެ އަސާސީ ސިޔާސަތުތައް ނަގަހައްޓާނެ ވަރުގަދަ ސިޔާސީ ލީޑަރެއްކަމަށް އޭނާ ފާހަގަކުރެއްވިއެވެ. ޕާޓީއަށާއި ޤައުމަށް ބޮޑު ބަދަލެއް އަންނަންޖެހޭކަން އެންމެން ގަބޫލުކުރާ ކަމަށާއި، އެފަދަ ބޮޑު ބަދަލެއް ގެނައުމަށް ބޭނުންވަނީ ތަޖުރިބާހުރި، ހިތްވަރުގަދަ ލީޑަރެއްކަމަށް ޑެޕިއުޓީ މޭޔަރު ވިދާޅުވިއެވެ.
ކުޅުދުއްފުއްޓާއި، ބޮޑުތިލަދުންމަތި އަދި މުޅި އުތުރުގެ ރައްޔިތުންނަށްވެސް އެންމެ ފައިދާހުރި ގޮތަކީ ޗެއާޕާސަން އިންތިޚާބުގައި ރައީސް ނަޝީދަށް ތާއީދުކުރުންކަމަށް އަޙުމަދު އަބްދުﷲ ވިދާޅުވިއެވެ. އަދި މާތް ﷲ ގެ އިރާދަފުޅާއެކު، ކުރެވޭ މަސައްކަތުން ކުޅުދުއްފުށި ސިޓީން ބޮޑު އަޣުލަބިއްޔަތެއް ރައީސް ނަޝީދު ހޯއްދަވާނެ ކަމުގެ ޔަގީންކަންވެސް އޭނާ ދެއްވިއެވެ. މިއީ އުތުރުގެ ސިޔާސީ މަސްރަޙުގައި ރައީސް ނަޝީދަށް އޮތް ތާއީދު ހާމަކޮށްދޭ ކަމެކެވެ.
ކިޔުންތެރިންގެ ހިޔާލު