ކުރިއަށް އޮތް އަޟުޙާ ޢީދުގެ މުނާސަބަތަށް އަލިއަޅުވައިލަމުން، މުސްލިމުންގެ މެދުގައި އޮންނަންޖެހޭ އެކުވެރިކަމާއި ލޯބީގެ ގުޅުން ބަދަހިކުރުމަށް ޚުޠުބާގައި ގޮވައިލިއެވެ. ރުޅިވެރިކަމާއި ޙަސަދަވެރިކަން ދޫކޮށް، އެއްބަނޑު އެއްބަފާ ބައެއްގެ ގޮތުގައި ޢީދުގެ އުފާ ފާޅުކުރުމަށާއި، އެ ކަމުގައި ޝަރުޢީ ހަމަތަކަށް ރިޢާޔަތްކުރުމަށް ހުރިހާ މުސްލިމުންނަށް ވަނީ އިލްތިމާސްކޮށްފައެވެ.
ޙައްޖުގެ މަތިވެރި އަޅުކަމުން ލިބިދޭ ފިލާވަޅުތަކާއި އެ އަޅުކަމުގެ މުހިންމުކަމުގެ މައްޗަށް މިއަދުގެ ހުކުރު ޚުޠުބާ ޚާއްޞަކޮށްފިއެވެ. މިއަދުގެ ޚުޠުބާގައި ބަޔާންކޮށްފައިވާ ގޮތުގައި ޙައްޖުގެ އަޅުކަމުގައި މާތް الله ލައްވައިފައިވާ ޝަޢީރާތަކުން ކަށަވަރުވެ އެނގޭ އެއް ޙަޤީޤަތަކީ، ޙައްޖަކީ އިންސާނާގެ ދުންޔަވީ ޙަޔާތުގެ ކުޑަކުޑަ ދަތުރެއް ކަމެވެ.
ދުނިޔޭގެ ދިރިއުޅުމަކީ ކެހިވެރިކަމުގެ ވަގުތީ އުފަލެއްދޭ އެއްޗެއްކަން ފާހަގަކުރައްވައި، ޚުޠުބާގައި ވިދާޅުވީ ދެމިހުންނަނިވި އުފަލަކީ އާޚިރަތުގެ އުފާ ކަމަށެވެ. ޙައްޖުވެރީން އެބައިމީހުންގެ ވަގުތާއި މުދާ ހޭދަކޮށް، އަޅުކަމުގައި މަޝްޣޫލުވާ ފަދައިން، ޙައްޖުގެ ނަޞީބު ނުލިބޭ މީހުން ވެސް މި ދުވަސްވަރު އަޅުކަމުގައި ހީވާގިވެ، މާތް اللهއަށް ކިޔަމަންތެރިކަން އަދާކުރުމަށް ވަނީ ނަސޭހަތްތެރިވެފައެވެ.
ޙައްޖުގެ މަނާސިކުތަކަކީ މާތް اللهގެ އަމުރުފުޅުތަކަށް އިޖާބަދިނުމަށާއި، މަނާކުރައްވައިފައިވާ ކަންތައްތަކާ ދުރުހެލިވުމަށް ދެވޭ ޢަމަލީ ތަމްރީނުތަކެއްގެ ގޮތުގައި ޚުޠުބާގައި ސިފަކުރެއްވިއެވެ. ޙައްޖުވެރިޔާ އިޙުރާމް ބަންނަ ހިނދުން ފެށިގެން އޭނާގެ މައްޗަށް ލާޒިމުވާ ކަންތައްތަކުގެ ސަބަބުން، އާންމު ދިރިއުޅުމުގައި ވެސް الله ޙަރާމްކުރައްވާފައިވާ ކަންތައްތަކުން ދުރުހެލިވުމަށް ބާރު ލިބޭނެ ކަމަށް ވިދާޅުވިއެވެ.
ޙައްޖުގެ އަޅުކަމަކީ ޖާނާއި މުދަލުން ކުރަންޖެހޭ ބުރަ އަޅުކަމަކަށް ވާއިރު، އެ ކަމުގައި ކެތްތެރިވެ، އުރެދުންތަކުން ދުރުހެލިވާ މީހާއަށް އޮތް އުފާވެރި ޚަބަރު ޚުޠުބާގައި ހަނދާންކޮށްދިނެވެ. ރަސޫލު الله ﷺ ގެ ޙަދީޘްފުޅެއްގެ މާނައިގައިވާ ގޮތުން، “މަބުރޫރު ޙައްޖެއްގެ ޖަޒާއެއްކަމުގައި ސުވަރުގެ މެނުވީ ނުވެއެވެ.” އަދި ފުރިހަމަ ގޮތުގައި ޙައްޖު އަދާކޮށްފި މީހާ އެނބުރި އަންނާނީ މައިމީހާގެ ބަނޑުން އޭނާ އުފަންވީ ދުވަހެކޭ އެއްފަދައިން ފާފަ ފުހެވިގެންވާ ޙާލެއްގައެވެ.
ކިޔުންތެރިންގެ ހިޔާލު