ޛިކުރުކުރުމުގެ ސަބަބުން އިންސާނާގެ ނަފުސަށް ހަމަޖެހުމާއި އުފާވެރިކަން ލިބޭ ކަމަށައި ދިރިއުޅުމުގެ ދަތިތަކާއި ތަކުލީފުތަކަކަށް އޮތް އެންމެ މަތިވެރި އަދި އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
މިއަދުގެ ހުކުރު ޚުޠުބާގެ މަޢުޟޫއަކީ “ގިނަގިނައިން ﷲ ހަނދުމަކުރުން” އެވެ.
ދިރިއުޅުމުގެ ހާސްކަމާއި ބުރަކަން ފިލުވައިދޭ ކަމަށެވެ. މާތް ﷲގެ މަތިވެރިކަމާއި، ހައިބަވަންތަކަމާއި، ކާއިނާތުގައިވާ އެންމެހައި ނިޢުމަތްތަކަކީ އެކަލާނގެ ދެއްވި ތަކެތިކަން ގަބޫލުކޮށް، އެކަލާނގެ މަދަދާއި ނަޞްރު އަބަދުވެސް އަހަރެމެންނާ އެކުގައި ވާކަން އިހުސާސްކޮށްދޭ ކަމަށެވެ.
ޚުޠުބާގައި ވިދާޅުވީ މާތް ﷲ ހަނދުމަކުރުން މައިގަނޑު ތިން ބަޔަކަށް ބެހިގެންވާ ކަމަށެވެ. ފުރަތަމައީ، ހިތުގެ އިޚްލާޞްތެރިކަމާއެކު ހަނދުމަކުރުމެވެ. މިއީ މާތް ﷲގެ ކުޅަދުންވަންތަކަމާއި، މި ކައުނުގައިވާ އެކަލާނގެ މަތިވެރި އުފެއްދުންތަކާ މެދު ފުންކޮށް ފިކުރުހިންގައި، ތަޞައްވުރުކުރުމެވެ. އަދި ތިމާ ކުރާ ކޮންމެ ކަމެއް މާތް ﷲ ބައްލަވައިވޮޑިގެންވާކަން ދަނެ، އެކަލާނގެއަށް ބިރުވެތިވުމާއި، ލޯބިވުމާއި، ވަކީލުކުރުމުގެ ސިފަ ހިތުގައި ވަރުގަދަކުރުމެވެ. ދެވަނައީ، ދުލުން ޛިކުރުކުރުމެވެ. އެއީ މާތް ﷲގެ މަތިވެރިކަން ބަޔާންކޮށް، އެކަލާނގެއަށް ޙަމްދާއި ޘަނާގެ ކަލިމަތައް ދުލުން ކިޔައިއުޅުމެވެ. އޭގެ ތެރޭގައި ކީރިތި ޤުރްއާން ކިޔެވުމާއި، ތަސްބީޙަކިޔުމާއި، ފާފަފުއްސެވުމަށް އެދި ދުޢާކުރުމުގެ އިތުރަށް، ކީރިތި ރަސޫލާ zގެ މައްޗަށް ޞަލަވާތްކިޔެވުން ހިމެނެއެވެ. ތިންވަނައީ، ޢަމަލީ ގޮތުން ނުވަތަ ގުނަވަންތަކުގެ ޒަރީޢާއިން މާތް ﷲ ހަނދުމަކުރުމެވެ. ފަރުޟު ފަސް ނަމާދު އަދާކުރުމާއި، ރޯދަ ހިފުމާއި، ޒަކާތް ދިނުމާއި، ޙައްޖާއި ޢުމްރާގެ އަޅުކަން ފުރިހަމަކުރުމަކީ މީގެ ތެރޭގައި ހިމެނޭ ކަންކަމެވެ. ހަމަ އެއާ އެކު، މައިންބަފައިންނަށް އޯގާތެރިވުމާއި، މީސްތަކުންނަށް އެހީތެރިވެ ހެޔޮ ފޯރުވުމަކީ ވެސް ޢަމަލުން މާތް ﷲ ހަނދުމަކުރުމުގެ މަތިވެރި ނަމޫނާތަކެވެ.
“މާތް ﷲގެ މަތީން ހަނދުމަކުރުމަކީ ޝައިޠާނާގެ ވަސްވާސްތަކާ ދުރުކޮށްދީ، ރަޙުމާނުވަންތަ ރަސްކަލާނގެ ރުހިވޮޑިގަތުން ހޯދައިދޭ، މަތިވެރި އަޅުކަމެއް. އެއީ ހިތްތަކުން ހާސްކަމާއި މޮޅިވެރިކަން ފިލުވައިދީ، އުފާވެރިކަމާއި ހަމަޖެހުން ގެނެސްދޭ ކަމެއް.” ހުކުރު ޚުޠުބާ
ދިރިއުޅުމުގެ ދަތިތަކާއި ފިކުރުތަކުގެ ޝަކުވާނުކުރާ މީހަކު މަދެވެ. ޚުޠުބާގައި ވިދާޅުވީ މި ހުރިހައި ތަކުލީފުތަކަކަށް އޮތް އެންމެ މަތިވެރި އަދި އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށެވެ.
“ޛިކުރުކުރުމުގެ ސަބަބުން ހަށިގަނޑަށް ދިރުމާއި ބާރު ލިބި، މޫނުމަތީގެ އުޖާލާކަމާއި ހައިބަތު ފާޅުވޭ. ހަމަ އެއާ އެކު، މާތް ﷲއަށް އޮންނަ ލޯތްބާއި، އެކަލާނގެ މަތިވެރިކަން ހިތުގައި ބިންވަޅުނެގި، އެކަލާނގެ حضرةއަށް ކުއްތަންވުމުގެ މަގުފަހިވޭ. ޛިކުރުކުރުމަކީ މަރުވެފައިވާ ހިތްތަކަށް ދިރުންދީ، ޣާފިލުކަމުގެ ނިދީން އިންސާނާ ހޭލައްވައިދޭ ކަމެއް. އެހެނީ ޛިކުރުކުރުމަކީ ހިތުގެ ކާނާ.” ހުކުރު ޚުޠުބާ
ހުކުރު ޚުޠުބާގައި ވިދާޅުވީ ޛިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫން ކަމަށެވެ. ރިއުޅުމުގެ ކޮންމެ ޙާލަތެއްގައި ވެސް ޛިކުރު ކުރެވިދާނެކަމަށެވެ. އަދި ހިނގާފައި ދާއިރުއާއި ސަވާރީއެއްގައި ދަތުރުކުރާއިރުވެސް އަދި އޮށޯވެ އޮންނަ އިރުވެސް ޛިކުރުކުރެވިދާނެއެވެ. މަސައްކަތުގެ މައިދާނުގައި އުޅޭއިރުވެސް ޛިކުރުކުރެވިދާނެއެވެ. ބާއްޖަވެރިކަމަށް އެދޭ މީހާގެ ދޫ އަބަދު ވެސް އޮންނާންޖެހޭނީ ﷲއަށް ޛިކުރުކުރުން މަތީގައިކަމަށް ޚުޠުބާގައި ވިދާޅުވިއެވެ.
މާތް ﷲ ހަނދުމަކުރުމަކީ ހަމައެކަނި ދުލުން ކިޔާލާ ކަލިމަތަކެއް ނޫނެވެ. ޙަޤީޤީ ޛިކުރަކީ ދުލުން ކިޔާ ކަލިމަތަކާއެކު ހިތްވެސް އެކަމަށް ހާޒިރުކުރުމެވެ. އަދި ﷲ ނަހީކުރެއްވި ފާފައަކާ ދިމާއަށްދެވޭ ހިނދު، ﷲ ހަނދުމަކޮށް އެ ފާފައަކާ ދުރުހެލިވުން ކަމަށް ހުކުރު ޚުޠުބާގައި ވިދާޅުވިއެވެ.
ކިޔުންތެރިންގެ ހިޔާލު