ދިވެހިރާއްޖޭގެ ސްކައުޓް އެސޯސިއޭޝަނާއި ތިނަދޫ ސިޓީގައި ޙަރަކާތްތެރިވަމުން އަންނަ ޖަމްޢިއްޔާއެއް ކަމަށްވާ، އޯގަނައިޒޭޝަން ފޯރ ކޮމިއުނިޓީ ރެޒިލިއެންސްގެ ދަށުން ހިންގާ ރެޒިލިއެންޓް ސްކައުޓުންނެ ސްކައުޓް ގްރޫޕާއި ގުޅިގެން 26 ސެޕްޓެންބަރު 2026 ވީ ހޮނިހިރު ދުވަހު ތިނަދޫ ސިޓީގައި ގއ އަދި ގދ އަތޮޅަށް ޙާއްސަކޮށް ބޭއްވުނު ޕްރީ-ކަބް މީޓް އަދި ކަބް ރެލީ (ޒޯން 5 ގެ ޕްރީ-ކަބް މީޓް އަދި ކަބް ރެލީ) ކާމިޔާބުކަމާއެކު ނިންމާލައިފިއެވެ.
ތިނަދޫ ސިޓީގެ ފުޓުބޯޅަ ސްޓޭޑިއަމްގައި ބޭއްވުނު ޒޯން 5 ގެ ޕްރީ-ކަބް މީޓް އަދި ކަބް ރެލީގައި ޖުމްލަ 250 އަށްވުރެ ގިނަ ޕްރީ-ކަބުންނާއި ކަބް ސްކައުޓުންގެ އިތުރުން 150 އަށްވުރެ ގިނަ ވޮލަންޓިއަރުން ބައިވެރިވިއެވެ. މި ޙަރަކާތުގެ ބައިވެރިންނަށް އެކި ކަހަލަ ސްޓޯލްތަކުގެ ތެރެއިން އުފެއްދުންތެރި އާޓްގެ މަސައްކަތްތަކާއި، ސަގާފީ އެކި ކުޅިވަރުތަކާއި މަސައްކަތްތައް ތަޖުރިބާކުރުމުގެ އިތުރުން، ތަފާތު އޮބްސްޓެކަލް ކޯސްތައް ތަޖުރިބާކުރުމުގެ ފުރުސަތު ލިބިގެންދިޔައެވެ. އަދި އެކި މުއައްސަސާތަކުން ކުރަމުން އަންނަ މަސައްކަތްތައް ބަލައިލުމުގެ ފުރުސަތުވެސް ވަނީ ލިބިފައެވެ. މީގެއިތުރުން، ސްކައުޓް ޙަރަކާތަށް 70 އަހަރު ފުރުމާ ގުޅިގެން މުޖުތަމަޢަށް 1 މިލިއަން ގަޑިއިރުގެ ޚިދުމަތް ފޯރުކޮށްދިނުމަށް ދިވެހިރާއްޖޭގެ ސްކައުޓް އެސޯސިއޭޝަނުން ހިންގާ ޙަރަކާތާއި، ދައުލަތުގެ 5 މިލިއަން ގަސް އިންދުމުގެ މަޝްރޫޢުއާއި ގުޅުވައިގެން 211 ގަސް މި ޙަރަކާތުގެ ބައިވެރިން ވަނީ އިންދާފައެވެ.
މި ޙަރަކާތް ކާމިޔާބުކަމާއެކު ކުރިއަށްގެންދެވިފައިވަނީ ވަރަށް ގިނަ ފަރާތްތަކެއްގެ އެހީތެރިކަމާއެކުގައެވެ. މިގޮތުން، އެސޯސިއޭޓް ޕާޓްނަރުންގެ ގޮތުގައި ތިނަދޫ ސިޓީ ކައުންސިލް، ތިނަދޫ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ، އަބޫބަކުރު ސްކޫލް، އަދި ތިނަދޫ ސްކޫލް ހިމެނެއެވެ. އަދި މި ޙަރަކާތުގެ ވެނިއު ޕާޓްނަރެއްގެ ގޮތުގައި ތިނަދޫ ސިޓީ ސްޓޭޑިއަމް އަދި މެޑިކަލް ޕާޓްނަރެއްގެ ގޮތުގައި ޑރ. ޢަބްދުއްޞަމަދު މެމޯރިއަލް ހޮސްޕިޓަލުން ވަނީ ޙަރަކާތްތެރިވެފައެވެ.
މީގެއިތުރުން، ސްޓޯލްތައް ހިންގުމުގައި އެކްޓިވިޓީ ޕާޓްނަރުންގެ ގޮތުގައި ބިޒްނަސް ސެންޓަރ ކޯޕަރޭޝަން (ބީސީސީ)، ދިވެހިރާއްޖޭގެ ޤައުމީ ޔުނިވަރސިޓީ، ވިމެން އެމްޕަވަރމަންޓް އެސޯސިއޭޝަން އޮފް ތިނަދޫ، ޔޫއެންއާރްޓްސް، ރަށްފުށު ބޮޑުބެރު، ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) އަދި ދިވެހި ފުލުހުންގެ ޚިދުމަތް ބައިވެރިވެފައިވެއެވެ. އަދި ރިސޯސް ޕާޓްނަރުންގެ ގޮތުގައި ހެޕީ މާކެޓް، ބޭންކް އޮފް މޯލްޑިވްސް އަދި މޯލްޑިވްސް އިސްލާމިކް ބޭންކުގެ އެހީތެރިކަން ލިބިފައިވެއެވެ.
ޕްރީ-ކަބް އަދި ކަބް ސްކައުޓް ސެކްޝަނަށް ޚާއްޞަކޮށްގެން ބާއްވާ މި ދެ ޙަރަކާތަކީ އުމުރުން 5 އަހަރާއި 12 އަހަރާ ދެމެދުގެ ކުދިންނަށް އަމާޒުކޮށްގެން ބޭއްވޭ ޙަރަކާތްތަކެކެވެ. އެހެން އަހަރުތަކެކޭވެސް އެއްފަދައިން މި ޙަރަކާތް ރާއްޖޭގެ އެކި ސަރަޙައްދުތަކުގައި ބޭއްވުމަށް ވަނީ ހަމަޖެހިފައެވެ. މިގޮތުން ކުރިއަށް އޮތް ޕްރީ-ކަބް މީޓް އަދި ކަބް ރެލީތަކަކީ:
• ހއ، ހދ އަދި ށ އަތޮޅަށް ޚާއްޞަ ޕްރީ-ކަބް މީޓް އަދި ކަބް ރެލީ (ޒޯން 1): މި ޙަރަކާތް ބޭއްވުމަށް ހަމަޖެހިފައިވަނީ 10 އޮކްޓޫބަރު 2026 ގައި ހދ. ހަނިމާދޫގައި، ކެތިއަރާ ޖަމްޢިއްޔާގެ “ކެތިއަރާ ސްކައުޓް ގްރޫޕް” އާ ގުޅިގެންނެވެ.
• މ، ފ، ދ، ތ އަދި ލ އަތޮޅަށް ޚާއްޞަ ޕްރީ-ކަބް މީޓް އަދި ކަބް ރެލީ (ޒޯން 3): މި ޙަރަކާތް ބޭއްވުމަށް ހަމަޖެހިފައިވަނީ 10 އޮކްޓޫބަރު 2026 ގައި ލ. ގަމުގައި، އިހައްދޫ ސްކޫލް ސްކައުޓް ގްރޫޕާ ގުޅިގެންނެވެ.
• ނ އަދި ރ އަތޮޅަށް ޚާއްޞަ ޕްރީ-ކަބް މީޓް އަދި ކަބް ރެލީ (ޒޯން 2): މި ޙަރަކާތް ބޭއްވުމަށް ހަމަޖެހިފައިވަނީ 24 އޮކްޓޫބަރު 2026 ގައި ނ. ކުޑަފަރީގައި، ކުޑަފަރީ ސްކޫލް ސްކައުޓް ގްރޫޕާ ގުޅިގެންނެވެ.
• ބ އަދި ޅ އަތޮޅަށް ޚާއްޞަ ޕްރީ-ކަބް މީޓް އަދި ކަބް ރެލީ (ޒޯން 4): މި ޙަރަކާތް ބޭއްވުމަށް ހަމަޖެހިފައިވަނީ 21 ނޮވެމްބަރު 2026 ގައި ބ. ދަރަވަންދޫގައި، ދަރަވަންދޫ ސްކޫލް ސްކައުޓް ގްރޫޕާ ގުޅިގެންނެވެ.
• އައްޑޫ ސިޓީ އަދި ފުވައްމުލައް ސިޓީއަށް ޚާއްޞަ ޕްރީ-ކަބް މީޓް އަދި ކަބް ރެލީ (ޒޯން 6): މި ޙަރަކާތް ބޭއްވުމަށް ހަމަޖެހިފައިވަނީ 21 ނޮވެމްބަރު 2026 ގައި އައްޑޫ ސިޓީގައި ޝަރަފުއްދީން ސްކޫލުގެ ސްކައުޓް ގްރޫޕާ ގުޅިގެންނެވެ.
މީގެއިތުރުން، ޒޯން 7 (މާލެ ސިޓީ) ގައިވެސް މި ޙަރަކާތްތައް ކުރިއަށްގެންދިއުމަށް ވަނީ ހަމަޖެހިފައެވެ. މާލޭގައި ބާއްވާ ޕްރީ-ކަބް މީޓް އަދި ކަބް ރެލީ ބާއްވާނެ ތާރީޚުތައް ފަހުން އިޢުލާނުކުރެވޭނެއެވެ.
ކިޔުންތެރިންގެ ހިޔާލު