މިއަހަރުގެ ބައިނަލްއަޤްވާމީ އިސްރަށްވެހިންގެ ދުވަހާ ގުޅުވައިގެން، ހުޅުމާލޭގައި ދިރިއުޅޭ ދޮށީ އުމުރުގެ މީހުންގެ ޖިސްމާނީ އަދި ނަފްސާނީ ދުޅަހެޔޮކަން އިތުރުކުރުމުގެ މަގުސަދުގައި “ދުޅަހެޔޮ އިސްރަށްވެހިން” ނަމުގައި ހާއްސަ ޕްރޮގްރާމެއް މިއަދު ފަށައިފިއެވެ.
ހުޅުމާލޭ ސެންޓްރަލް ޕާކުގައި މިއަދު ހެނދުނު ބޭއްވި ހާއްސަ ރަސްމިއްޔާތެއްގައި މި ޕްރޮގްރާމް ރަސްމީކޮށް އިފްތިތާޙު ކޮށްދެއްވީ ސިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވަޒީރު ޑރ. ގީލާ އަލީއެވެ. މި ޕްރޮގްރާމަކީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ސިއްހަތާއި ބެހޭ ވުޒާރާ ގުޅިގެން ކުރިއަށްގެންދާ ހަރަކާތެކެވެ.
ސިއްހަތާއި ބެހޭ ވުޒާރާއިން ބުނީ، މި ޕްރޮގްރާމްގެ މައިގަނޑު މަގުސަދަކީ ދޮށީ އުމުރުގެ ބޭފުޅުން އަބަދު ގޭގައި ތިބެންޖެހުމުގެ ސަބަބުން އިޖުތިމާއީ ގުޅުންތަކުން އެކަހެރިވުން ހުއްޓުވައި، އެފަރާތްތަކަށް ހަރަކާތްތެރި އަދި އުފާވެރި ދިރިއުޅުމެއް ހޯދައިދިނުން ކަމަށެވެ. އަދި މި ޕްރޮގްރާމްގެ ދަށުން ކުރިއަށްގެންދާ ހުރިހާ ހަރަކާތްތަކެއްގައިވެސް އިސްރަށްވެހިންނަށް މުޅިން ހިލޭ ބައިވެރިވެވޭނެ ކަމަށް އެ ވުޒާރާއިން މައުލޫމާތުދެއެވެ.
އެޗްޑީސީން މައުލޫމާތު ދިން ގޮތުގައި، މި ޕްރޮގްރާމްގެ ދަށުން ކޮންމެ ހަފުތާއަކު ތިން ދުވަހު، އިސްރަށްވެހިންގެ އުމުރާ ގުޅޭ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތު ކްލާސްތައް ކުރިއަށްދާނެއެވެ.
މީގެއިތުރުން، އިޖުތިމާއީ ގުޅުން ބަދަހިކުރުމަށް “ގޯލްޑަން އަވާ” ގެ ނަމުގައި ކޮންމެ ހަފުތާއަކު ނުވަތަ ދެ ހަފުތާއިން އެއްދުވަހު ހަވީރުގެ ސައެއް ބޭއްވުމަށް ހަމަޖެހިފައިވާ ކަމަށް ވެސް އެޗްޑީސީން ބުންޏެވެ. އަދި ކޮންމެ މަހަކު އެއްފަހަރު ކުޑަގިރި ފަދަ ހިތްފަސޭހަ ރަށަކަށް ދަތުރުދިއުމާއި، އަހަރަކު ހަތަރު ފަހަރު ލޭގެ ޕްރެޝަރު ބެލުން ފަދަ ސިއްހީ ޗެކަޕްތައް ހެދުމުގެ ހިދުމަތް ދިނުމަށްވެސް ނިންމާފައިވެއެވެ.
އެޗްޑިސީން އިތުރަށް ބުނީ، އިސްރަށްވެހިންގެ ތަޖުރިބާއާއި ދިވެހި ސަޤާފީ މައުލޫމާތުތައް ކުޑަކުދިންނާއި ޒުވާނުންނަށް ފޯރުކޮށްދިނުމުގެ ގޮތުން ހާއްސަ ބައްދަލުވުންތަކެއް ބޭއްވުމަށްވެސް ރޭވިފައިވާ ކަމަށެވެ. އެގޮތުން ބައިވެރިންގެ ސަލާމަތާއި ރައްކާތެރިކަމަށް އިސްކަންދީގެން ކުރިއަށްގެންދާ މި ޕްރޮގްރާމުގައި، ދަތުރުފަތުރުގެ އިންތިޒާމުތަކުގެ އިތުރުން ފަސްޓްއެއިޑްގެ ހިދުމަތާއި، އަރާމުކުރާނެ އެކަށީގެންވާ ތަންތަން ފަހިކޮށްދިނުމަށް ހަމަޖެހިފައިވާކަމަށް ވެސް އެޗްޑީސީން ބުންޏެވެ.
މި ހަރަކާތަކީ ހުޅުމާލެ ހޮސްޕިޓަލް، މޯލްޑިވްސް ޕޮލިސް ސަރވިސް، ފިޒިއޯ ސޮލިއުޝަންސް، ޕެންޝަން އޮފީސް، އެމްޓީސީސީ، އުރީދޫ މޯލްޑިވްސް އަދި ބައެއް މަދަނީ ޖަމްއިއްޔާތަކުގެ އެހީތެރިކަމާއެކު ކުރިއަށްގެންދާ ޕްރޮގްރާމެކެވެ.
އެޗްޑީސީން ފާހަގަކުރި ގޮތުގައި މިއީ ހުޅުމާލެއަކީ ހުރިހާ އުމުރުފުރައެއްގެ ރައްޔިތުންނަށްވެސް ދިރިއުޅެން ހިތްފަސޭހަ، އެކުވެރި އަދި ރައްކާތެރި މާހައުލަކަށް ހެދުމަށްޓަކައި ސަރުކާރުގެ ސިޔާސަތުތަކާ އެއްގޮތަށް ކުރިއަށްގެންދާ ވަރަށް މުހިންމު މަސައްކަތެކެވެ.
ކިޔުންތެރިންގެ ހިޔާލު