އަށް ބުރުގެ ވޯޓުލުމަށްފަހު، އެމްޑީޕީގެ ފަރާތުން ވާދަކުރެއްވި ޒައީމާ މުހައްމަދު އދ. މަހިބަދޫ ކައުންސިލުގެ ނައިބު ރައީސްކަމަށް އިންތިޚާބުކޮށްފިއެވެ.
ހޯމަ ދުވަހުގެ ރޭ 9:00 ގައި ބޭއްވި ކައުންސިލް ބައްދަލުވުމުގައި ޒައީމާ މި މަގާމަށް ހޮވުނީ 3 ވޯޓު ހޯއްދަވައިގެންނެވެ. އޭނާއާ އެންމެ ގާތުން ވާދަކުރެއްވި ޕީއެންސީގެ ކައުންސިލަރު މުހައްމަދު މައުމޫނަށް ލިބިވަޑައިގަތީ 2 ވޯޓެވެ. ޒައީމާ މީގެ ކުރިން ބޭއްވި ލޯކަލް ކައުންސިލް އިންތިޚާބުގައި ކައުންސިލުގެ ރައީސްކަމަށްވެސް ވާދަކުރައްވާފައިވެއެވެ.
ނައިބު ރައީސްކަމަށް ޒައީމާ، މައުމޫން އަދި މިނިވަން ކައުންސިލަރު ބުންޔާމީން ހަސަން ވާދަކުރެއްވިއެވެ. ފުރަތަމަ ބުރުގައި ޒައީމާ އާއި މައުމޫނަށް ދެ ވޯޓު ލިބުނުއިރު، ބުންޔާމީނަށް ލިބުނީ އެންމެ ވޯޓެކެވެ. މިއަށްފަހު ކުރިއަށްދިޔަ ވޯޓުލުމުގެ ބުރުތަކުގައި ދެ ފަރާތަށްވެސް ހަމަހަމަ ވޯޓު ލިބި، އަދި ބާތިލު ވޯޓެއްގެ ސަބަބުން ނަތީޖާ ނުނެރެވި ކައުންސިލްގެ މަސައްކަތްތައް ހުއްޓިފައި އޮތެވެ.
އާ ކައުންސިލަރުން ހުވާކުރެއްވީ މިދިޔަ އާދީއްތަ ދުވަހުއެވެ. ގަވާއިދުގައިވާ ގޮތުން ކައުންސިލަރުން ހުވާކުރުމަށްފަހު ބާއްވާ ފުރަތަމަ ޖަލްސާގައި ނައިބު ރައީސް ހޮވަން ޖެހެއެވެ. ނަމަވެސް، ކައުންސިލްގެ މަސައްކަތްތައް ހުއްޓިފައި އޮތީ އެ މަގާމަށް މީހަކު އިންތިޚާބު ނުކުރެވުމުގެ ސަބަބުންނެވެ. ހޯމަ ދުވަހުގެ ރޭ ޒައީމާ އަށް ވޯޓު ދެއްވީ ބުންޔާމީން ހަސަނެވެ. އެ ނިންމުން ނިންމެވީ ކައުންސިލްގެ މަސައްކަތްތައް މާ ބޮޑަށް ދިގުލައިގެން ދިއުމުން ކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު