އދ. މަހިބަދޫ ބިން ހިއްކުމުގެ މަޝްރޫއުގެ ދަށުން، އެ ރަށަށް ބޭނުންވާ ބޮޑުހިލައިގެ ފުރަތަމަ ޝިޕްމަންޓް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން އެ ރަށުގެ މަސައްކަތުގެ ސައިޓަށް ގެންގޮސްފިއެވެ.
މި މަޝްރޫއަކީ މަހިބަދޫއަށް ދިމާވެފައިވާ ބިމުގެ ޖާގައިގެ ދަތިކަމަށް ހައްލެއް ހޯދައިދިނުމަށާއި، ރަށުގެ ގިރާ ސަރަހައްދު ހިމާޔަތް ކުރުމަށްޓަކައި ސަރުކާރުން ކުރިއަށްގެންދާ މުހިންމު މަޝްރޫއެކެވެ. މަސައްކަތުގެ ސައިޓަށް ބޮޑުހިލަ ގެންދެވުމާއެކު، މަޝްރޫއުގެ ތެރެއިން ކުރިއަށްދާ ހިމާޔަތްކުރުމުގެ އަމަލީ މަސައްކަތްތައް އިތުރަށް ހަލުވިވެގެންދާނެއެވެ.
މަހިބަދޫ ބިން ހިއްކުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 26 ޖުލައި 2023 ގައެވެ. މި މަޝްރޫއު އެ ކުންފުންޏާ ހަވާލުކުރީ 40.43 މިލިއަން ރުފިޔާއަށް، 240 ދުވަހުގެ ތެރޭގައި ނިންމާ ގޮތަށެވެ.
މި މަޝްރޫއުގެ ދަށުން ސޭންޑް ސާޗް ސާވޭއެއް ހެދުމުގެ މަސައްކަތާއި، މަހިބަދޫގެ ހަތް ހެކްޓަރުގެ ސަރަހައްދެއްގެ ބިން ހިއްކުމުގެ މަސައްކަތް ކުރުމަށް ވަނީ ހަމަޖެހިފައެވެ. މީގެއިތުރުން ބިން ހިއްކުމަށްފަހު އެ ސަރަހައްދު ހިމާޔަތް ކުރުމުގެ ގޮތުން ތޮށިލުމުގެ މަސައްކަތްތައްވެސް ކުރިއަށްދާނެ ކަމަށް އެމްޓީސީސީން މައުލޫމާތުދެއެވެ.
ކިޔުންތެރިންގެ ހިޔާލު