16 ގަޑިއިރުގެ ދަތުރަކަށްފަހު އެމެރިކާގެ ރައީސް ޑޮނަލްޑް ޓްރަމްޕް ދަތުރުކުރި އެއަރފޯސް ވަން މަތިންދާ ބޯޓު ޗައިނާގެ ވެރިރަށް ބެއިޖިންގަށް ޖައްސައިފިއެވެ.
މިއީ، ބެއިޖިންގަށް އިރާކޮޅުގެ ވަގުތެވެ.
މިއީ، 2017 ގެ ފަހުން ޑޮނަލްޑް ޓްރަމްޕް ޗައިނާއަށް ދިޔަ ފުރަތަމަ ފަހަރެވެ. އަދި މިއީ ފާއިތުވެދިޔަ 9 އަހަރުގެ ތެރޭގައި އެމެރިކާގެ ރައީސަކު ޗައިނާއަށް ޒިޔާރަތްކުރާ ފުރަތަމަ ފަހަރުވެސް މެއެވެ.
ދުނިޔޭގެ އެންމެބޮޑު ދެ އިގްތިސާދުގެ ވެރިން ކަމުގައިވާ ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންއާ ދެމެދު ބާއްވާ ރަސްމީ ވާހަތަކާއި، ޓްރަމްޕްގެ ދަތުރާގުޅޭ މުހިންމު އެހެން ކަންކަން ހިނގާނީ މާދައާއި އަނެއް ދުވަހުއެވެ.
ޓްރަމްޕާއި، ޝީ ޖިންޕިއާ ދެމެދު ދެކެވޭ ވާހަކަތަކުގައި އެމެރިކާ-އިސްރާއީލުން އީރާނާ ދެކޮޅަށް ފަށައިގެންއުޅޭ ހަނގުރާމައިގެ މައްސަލަ ހިމެނޭ ކަމަށް މީޑިއާ ރިޕޯޓްތައް ބުނެއެވެ.
އެމެރިކާއިން ފުރުމުގެކުރިން ޓްރަމްޕް ބުނެފައިވަނީ، އީރާނުގެ މައްސަލާގައި އޭނާ ޗައިނާގެ ރައީސާއެކު “ދިގުކޕށް” ވާހަކަ ދައްކާނޭ ކަމަށެވެ.
މީގެއިތުރުން، ދެގައުމުގެ ދެމެދުގައި ކުރެވޭ ވިޔަފާރީގެ މައްސަލަތަކާއި، އެމެރިކާއިން ޓައިވާނަށް ހަތިޔާރު ވިއްކާ މައްސަލައާއި އޭއައިގެ ވާހަކަތައްވެސް ހިމެނޭ ކަމަށް ބުނެފައި ވެއެވެ.
ޓްރަމްޕާއެކު އެމެރިކާގެ ބިޔަ ވަފުދެއް ޗައިނާއަށް ގޮސްފައި ވެއެވެ. އޭގެ ތެރޭގައި އެމެރިކާގެ ފުންނާބުއުސް އެތައް ވިޔަފާރިވެރިންވެސް ހިމެނެއެވެ.
ކިޔުންތެރިންގެ ހިޔާލު