އިދިކޮޅު އެމްޑީޕީގެ ޗެއާޕާސަން ހޮވުމަށް ބޭއްވުމަށް ހަމަޖެހިފައިވާ އިންތިޚާބުގެ ތާވަލު ބާތިލުކުރުމަށް އެދި ސިވިލް ކޯޓަށް މައްސަލައެއް ހުށަހަޅައިފިއެވެ.
މި މައްސަލަ ކޯޓަށް ހުށަހެޅުއްވީ ގާނޫނީ ވަކީލު އަބްދުﷲ ޝާއިރުއެވެ. ޝާއިރުއަކީ ކުރީގެ ރައީސް މުޙައްމަދު ނަޝީދުގެ ގާނޫނީ ޓީމުގައި ވެސް މަސައްކަތް ކުރައްވާފައިވާ ބޭފުޅެކެވެ.
ޝާއިރު ވިދާޅުވި ގޮތުގައި، އިންތިޚާބާ ގުޅޭގޮތުން ހުރި ކަންބޮޑުވުންތައް ހިމަނައި އޭޕްރީލް 23 ގައި އެމްޑީޕީގެ ސެކްރެޓޭރިއަޓަށް ފޮނުވި ސިޓީއަށް ޖަވާބު ދީފައި ނުވާތީ ކޯޓަށް ދާން ނިންމެވީއެވެ. ޕާޓީގެ އުސޫލުތައް ބުނާގޮތުން ޝަކުވާތަކަށް 48 ގަޑިއިރުގެ ތެރޭގައި ޖަވާބު ދޭންޖެހެއެވެ. ނަމަވެސް 10 ދުވަސް ވީއިރު ވެސް ޖަވާބެއް ލިބިފައެއް ނުވެއެވެ.
ޝާއިރުގެ މައިގަނޑު ކަންބޮޑުވުމަކީ އިންތިޚާބުގެ ތާވަލު ކަނޑައެޅުމުގައި ޕާޓީގެ އަސާސީ ގަވާއިދާ ޚިލާފުވެފައިވުމެވެ.
އަސާސީ ގަވާއިދުގެ 46 ވަނަ މާއްދާގައިވާ ގޮތުން އިންތިޚާބުތައް އިންތިޒާމުކޮށް، ތާވަލު ކަނޑައެޅުމުގެ ބާރު އޮންނަނީ އިސްތިއުނާފު ފަނޑިޔާރުންގެ މަޖިލީހުގެ ރައީސަށެވެ.
މިހާރު ތާވަލު ކަނޑައަޅާފައިވަނީ އެ މަޖިލީހުގެ ރައީސްގެ އެއްވެސް ބައިވެރިވުމެއް ނެތި، އެހެން ފަރާތަކުން ކަމަށް ޝާއިރު ތުހުމަތު ކުރައްވައެވެ.
“އަޅުގަނޑުމެން މި އެދެނީ އިންތިޚާބު ބާތިލުކުރާކަށް ނޫން. ނަމަވެސް މިހާރު އިއުލާނުކޮށްފައިވާ ތާވަލު ބާތިލުކުރަން. އަޅުގަނޑުމެންގެ ޝަކުވާއަކީ ތާވަލު ކަނޑައަޅާފައިވަނީ ގޯސްކޮށް ކަމަށްވުން،” ޝާއިރު ވިދާޅުވިއެވެ.
ޝާއިރު އިތުރަށް ފާހަގަކުރެއްވި ގޮތުގައި، ޕާޓީގެ އަސާސީ ގަވާއިދަކީ ޕާޓީގެ “ގާނޫނުއަސާސީ” އެވެ. އެހެންކަމުން އެއާ ޚިލާފަށް އެއްވެސް އުސޫލެއް ނުވަތަ ނިންމުމެއް ނުނިންމޭނެއެވެ.
ކިޔުންތެރިންގެ ހިޔާލު