އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން އިއުލާންކުރައްވާފައިވާ ފައްޔާޒު އިސްމާއީލާއި އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ހުށަހެޅުއްވި ‘ބޮޑު ބަދަލު’ ގަރާރު އެމްޑީޕީގެ ކޮންގްރެސްއިން މިއަދު ފާސްކޮށްފިއެވެ.
މި ގަރާރަކީ ‘ބޮޑު ބަދަލު’ އެޖެންޑާގައި ހިމެނޭ ކަންކަމަކީ އެމްޑީޕީގެ ސިޔާސަތުތަކުގެ ގޮތުގައި ކަނޑައަޅައި، އެ ބަދަލުތައް ގާނޫނުއަސާސީއަށް ގެނައުމަށް އެ ޕާޓީން މަސައްކަތްކުރުމަށް އިގުރާރުވުމުގެ ގޮތުން ހުށަހެޅި ގަރާރެކެވެ. ރައްޔިތުންގެ މަޖިލީހުގެ ކުރީގެ މެންބަރު އިލްޔާސް ލަބީބުގެ ތާއީދާއެކު ފައްޔާޒު ހުށަހެޅުއްވި މި ގަރާރު ފާސްވީ ކޮންގްރެސްގައި ހާޒިރުވެތިއްބެވި ފަސްސަތޭކަ ފަސްދޮޅަސް ތިން މަންދޫބުންގެ ތެރެއިން ފަސްސަތޭކަ ވިހި މަންދޫބުންގެ ތާއީދާއެކުގައެވެ.
މި ގަރާރުގައި ގެންނަން ހުށަހަޅާފައިވާ އެންމެ ބޮޑު ބަދަލަކީ ސަރުކާރުގެ އެންމެ އިސްވެރިޔާ އާއި ދައުލަތުގެ އެންމެ އިސްވެރިޔާގެ މަގާމަކީ ތަފާތު ދެ މަގާމަކަށް ހެދުމެވެ. އެގޮތުން ސަރުކާރުގެ ވެރިޔާ ރައްޔިތުންގެ އާންމު ވޯޓަކުން އިންތިހާބުކުރާއިރު، ދައުލަތުގެ ވެރިޔާ އިންތިހާބުކުރާނީ ހާއްސަ މަޖިލީހެއްގެ ވޯޓަކުންނެވެ.
މި ބަދަލުގެ ދަށުން ސަރުކާރު ހިންގުމުގެ އެންމެ އިސްވެރިޔަކަށް ފައްޔާޒު ހުންނެވުމަށާއި، ދައުލަތުގެ ވެރިޔާގެ ގޮތުގައި ނަޝީދު ހުންނެވުމަށް އެ ދެ ބޭފުޅުން ވަނީ ވަކާލާތު ކުރައްވައިފައެވެ. ‘ބޮޑު ބަދަލު’ގެ ކޮންސެޕްޓަކީ ފައްޔާޒުގެ އިސްނެންގެވުމުގެ ދަށުން އެކުލަވައިލި ކޮންސެޕްޓަކަށްވާއިރު، ފަހުން ނަޝީދުވެސް ވަނީ އެ ކޮންސެޕްޓަށް ތާއީދު ކުރައްވައިފައެވެ.
ގާނޫނުއަސާސީއަށް ގެންނަން ހުށަހަޅާ އިތުރު ބަދަލުތަކުގެ ތެރޭގައި، ގާނޫނުއަސާސީއަށް ބަދަލެއް ގެނެވޭނީ ރައްޔިތުންގެ މަޖިލީހުގެ އިތުރުން ރައްޔިތުން އިންތިހާބުކުރާ ކައުންސިލަރުން ހިމެނޭ ހާއްސަ މަޖިލީހަކުން ކަމަށް ކަނޑައެޅުން ހިމެނެއެވެ. އަދި އިންތިހާބީ މަގާމުތަކުގައި ތިއްބަވާ ބޭފުޅުން ދައުރުގެ މެދުތެރެއިން ވަކިކުރުމުގެ ފުރުސަތު ރައްޔިތުންނަށް ލިބިދިނުމާއި، މީހާ ދިރިއުޅޭ ދާއިރާގެ ކައުންސިލަށް ވޯޓު ދެވޭގޮތަށް ބަދަލުކުރުންވެސް ހިމެނެއެވެ.
އޭގެ އިތުރުން ރައްޔިތުންގެ މަޖިލީހުގެ މެންބަރުންގެ އަދަދު އިތުރުނުވާނެހެން ވަކި އަދަދެއްގައި ހިފެހެއްޓުމަށާއި، ސުޕްރީމް ކޯޓުގެ ފަނޑިޔާރުން ވަކިކުރެވޭނީ ރައްޔިތުންގެ އާންމު ވޯޓަކުން ކަމަށް ކަނޑައެޅުމަށްވެސް ވަނީ ހުށަހަޅައިފައެވެ. އަދި ޖުޑީޝަލް ސާވިސް ކޮމިޝަންގެ އެކުލެވުން ސިޔާސީ ނުފޫޒުން އެއްކިބާކުރުމާއި، މިނިވަން މުއައްސަސާތައް ޖަވާބުދާރީކުރުވާނެ ހާއްސަ ކޮމިޝަނެއް އާންމުންގެ މަންދޫބުންނާއެކު އުފެއްދުންވެސް މި ގަރާރުގައި ހިމެނެއެވެ.
ކިޔުންތެރިންގެ ހިޔާލު