ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އައްޑޫ ސިޓީގެ ގަމުގައި އޮންނަ ގަން އިންޓަނޭޝަނަލް އެއާޕޯޓުގެ ކަރަންޓު ވިއުގަ އިތުރަށް ވަރުގަދަކޮށް ހަރުދަނާކުރުމާ ގުޅޭ ގޮތުން، އެ އެއާޕޯޓު ހިންގާ އައްޑޫ އިންޓަނޭޝަނަލް އެއާޕޯޓް ކޮމްޕެނީ (އޭއައިއޭ) އާއެކު މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމަކީ އައްޑޫ ސިޓީއަށް ކަރަންޓުގެ ޚިދުމަތް ފޯރުކޮށްދިނުމުގެ މަސައްކަތާ ރަސްމީކޮށް ސްޓެލްކޯއިން ހަވާލުވުމާ ގުޅިގެން، އެ ކުންފުނީގެ އިސްވެރިން އެ ސިޓީއަށް ކުރައްވަމުންގެންދަވާ ދަތުރުފުޅުގެ ތެރެއިން ބޭއްވި ބައްދަލުވުމެކެވެ. މީގެ ކުރިން އައްޑޫ ސިޓީއަށާއި ގަން އެއާޕޯޓަށް ކަރަންޓުގެ ޚިދުމަތް ފޯރުކޮށްދެމުން އައީ ފެނަކަ ކޯޕަރޭޝަނުންނެވެ.
މި ބައްދަލުވުން ބޭއްވީ ގަން އިންޓަނޭޝަނަލް އެއާޕޯޓުގައެވެ. މި ބައްދަލުވުމުގައި ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރާއި އެ ކުންފުނީގެ އިސް ބޭފުޅުންގެ އިތުރުން އޭއައިއޭގެ އިސްވެރިން ބައިވެރިވެވަޑައިގެންނެވިއެވެ.
ސްޓެލްކޯއިން މަޢުލޫމާތު ދެއްވި ގޮތުގައި، މި ބައްދަލުވުމުގައި ގަން އެއާޕޯޓު އަޕްގްރޭޑް ކުރުމުގެ މަޝްރޫއާއެކު އެއާޕޯޓަށް އިތުރަށް ބޭނުންވާނެ ކަރަންޓުގެ ޚިދުމަތް ފޯރުކޮށްދިނުމާ ގުޅޭ ގޮތުން ފުޅާ ދާއިރާއެއްގައި ވަނީ މަޝްވަރާކުރެވިފައެވެ. މީގެ އިތުރުން އޭއައިއޭގެ މުހިންމު ބޭނުންތައް ދެނެގަނެ، އެއާޕޯޓުގެ ކަރަންޓު ވިއުގަ އިތުރަށް ވަރުގަދަކުރުމަށް ކުރެވެންހުރި މަސައްކަތްތަކާ ގުޅޭ ގޮތުން ވެސް ޚިޔާލު ބަދަލުކުރެވުނެވެ.
ގަން އިންޓަނޭޝަނަލް އެއާޕޯޓު ތަރައްގީ ކުރުމުގެ ބޮޑު މަޝްރޫއެއް ދެ ހާސް ތޭވީސް ވަނަ އަހަރު ވަނީ އިފުތިތާހުކޮށްފައެވެ. އިންޑިއާގެ އެކްޒިމް ބޭންކުގެ ސައްވީސް މިލިއަން ޑޮލަރުގެ ލޯނު އެހީގެ ދަށުން ކުރިއަށްގެންދާ މި މަޝްރޫއު ހަވާލުކޮށްފައިވަނީ އިންޑިއާގެ ރެނާޓަސް ކުންފުންޏާއެވެ.
އެ މަޝްރޫއަކީ އަހަރަކު އެކަކު ބައި މިލިއަން ފަތުރުވެރިންނަށް ޚިދުމަތް ދެވޭ ފެންވަރަށް އެއާޕޯޓުގެ ވަސީލަތްތައް ތަރައްގީކުރުމަށް ރާވާފައިވާ މަޝްރޫއެކެވެ. ނަމަވެސް އެކި ސަބަބުތަކާ ހެދި އެ މަޝްރޫއުގެ މަސައްކަތްތަކަށް ވަނީ ލަސްތަކެއް ކުރިމަތިވެފައެވެ.
މި ވަގުތު ގަން އެއާޕޯޓަށް ގަވާއިދުން ބައިނަލްއަގުވާމީ ދަތުރުތައް ބާއްވަމުން އަންނަނީ ސްރީލަންކަން އެއާލައިންސުން އެކޏެވެ. ސްޓެލްކޯއިން އައްޑޫގެ ކަރަންޓު ވިއުގަ ހަރުދަނާކުރުމަށް ފަށާފައިވާ މަސައްކަތްތަކާއެކު، އެއާޕޯޓުގެ ޚިދުމަތްތައް ފުޅާކުރުމަށް ބޭނުންވާ ކަރަންޓުގެ އިތުބާރު ބޮޑުވެގެންދާނެއެވެ.
ކިޔުންތެރިންގެ ހިޔާލު