މިދިޔަ މާޗް މަހު އަތޮޅުތެރޭގެ ގޭބިސީތަކަށް ފެނަކައިން ފޮނުވި ބައެއް ކަރަންޓް ބިލްތައް އާދަޔާ ޚިލާފަށް ބޮޑުވި ކަމުގެ ޝަކުވާ ލިބެމުންދާތީ، ޝަކުވާ ހުށަހަޅާ ބިލްތައް އަލުން ޗެކްކުރާނެ ކަމަށް އެ ކުންފުނިން ބުނެފިއެވެ.
އެކަމާ ގުޅިގެން ފެނަކައިން ނެރުނު ބަޔާނެއްގައި ވަނީ މިދިޔަ މަހު ރީޑިން ނެގުމުގައިއާއި ކަރަންޓު ބިލު ތައްޔާރުކުރުމުގައި އެ ކުންފުނިން އަމަލުކޮށްފައިވާނީ އެހެން މަސްތަކުގައި ވެސް އަމަލުކުރަމުންދާ އުސޫލަށް ކަަމަށެވެ. އަދި ގާނޫނާއި ގަވާއިދުތަކުގައި ކަނޑައެޅިފައިވާ އުސޫލާ ޚިލާފަށް، އެ ކުންފުނިން ޚިދުމަތްދޭ އެއްވެސް ކަސްޓަމަރެއްގެ ބިލު ތައްޔާރުކޮށްފައި ނުވާނެ ކަމުގެޔަގީންކަން އެ ކުންފުނިންދެއެވެ.
އެ ކުންފުނިން ތައްޔާރުކޮށްފައިވާ އެއްވެސް ކަރަންޓު ބިލެއްގައި މައްސަލައެއްް އުޅޭކަމަށް ޝައްކުކުރެވޭނަމަ، އަދި ރީޑިން އިތުރަށް ޗެކްކުރަން ބޭނުންވާނަމަ، އެ އެހީތެރިކަން ފޯރުކޮށްދޭނެ ކަމަށް ފެނަކައިން ބުންޏެވެ.
މީގެ އިތުރުން އެ ކުންފުނިން ވަނީ، ކޮންމެ އަހަރެއްގެ ވެސް މާޗް މަހާއި އޭޕްރިލް މަހުގެ އިތުރުން މެއި މަހަކީ އެންމެ ގިނަ އަދަދަކަށް ކަރަންޓު ބޭނުންކުރެވޭ ދުވަސްވަރަށް ވުމުން، ކަރަންޓު ބޭނުން ކުރުމުގައި ސަމާލުވުމަށް ހަނދާންކޮށްދީފައެވެ.
ކިޔުންތެރިންގެ ހިޔާލު