އެމްޑީޕީގެ ޗެއަރޕާސަންގެ ނައިބު (އިދާރީ) އިބްރާހީމް ވަހީދު (އިބްރޭ) އަށް ފިޔަވަޅު އަޅައިދޭން އެ ޕާޓީގެ ޗެއަރޕާސަންކަމަށް ވާދަކުރާ މީކާއީލް އަހްމަދު ނަސީމް އެދިވަޑައިގެންފިއެވެ.
އިބުރޭއަށް ފިޔަވަޅު އަޅައިދިނުމަށް މީކާއިލް އެދިވަޑައިގަތީ، ޗެއަރޕާސަންކަމަށް ވާދަކުރާ ކުރީގެ ރައީސް ނަޝީދުގެ ކެމްޕެއިންގައި އިބުރޭ ބައިވެރިވެވަޑައިގަންނަވާތީއެވެ.
އެމްޑީޕީގެ ޗެއާޕާސަން އަބްދުލް ޣަފޫރު މޫސާ (ގަޕޯ) އަށް މީކާއީލް ފޮނުއްވި ސިޓީއެއްގައި ވިދާޅުވީ ރައީސް ނަޝީދުގެ ކެމްޕެއިންގައި އިބްރޭ އަމަލީ ގޮތުން ބައިވެރިވާތީ އެކަމުގެ ޝަކުވާ ލިބޭ ކަމަށާ އަދި ނަޝީދުގެ ކެމްޕެއިން ހަރަކާތްތަކުގެ ފޮޓޯއާ ވީޑިއޯ އިން އެކަން ކަށަވަރު ކުރެވޭ ކަމަށެވެ. ޗެއާޕާސަންގެ ނައިބު (އިދާރީ) ގެ މަގާމުގައި ހުންނަވާ ބޭފުޅަކީ އެމްޑީޕީ އަށް މެންބަރުން އިތުރުކުރުމާއި ކެމްޕެއިންތައް ހިންގުމާ ހަވާލުވެ ހުންނަވާ ބޭފުޅަކަށް ވާތީ އެ ޕާޓީގެ އެތެރޭގެ އިންތިހާބުތަކުގައި އޭނާ ހުންނަވަން ޖެހޭނީ ވަކިއަތަކަށް ޖެހިވަޑައިނުގެން ކަމަށް ވެސް މީކާއީލްގެ ސިޓީގައި ވިދާޅުވިއެވެ.
މީކާއީލް ވިދާޅުވީ އެމްޑީޕީގެ ޗެއާޕާސަން ހޮވާ އިންތިހާބަކީ އިބުރޭގެ ބެއްލެވުމުގެ ދަށުން ހިންގާ އިންތިހާބަކަށް ވާތީ، ނަޝީދުގެ ކެމްޕެއިނުގައި އިބުރޭ ހަރަކާތްތެރިވެވަޑައިގަންނަވާތީ އެމްޑީޕީގެ ވަރަށް ގިނަ އާއްމު މެންބަރުން ކަންބޮޑުވުން ފާޅުކުރެއެވެ. އެއީ އިންތިހާބުގެ އިންސާފުވެރިކަމާ މެދު އާއްމު މެންބަރުން ސުވާލު އުފައްދާ ކަމެއް ކަމަށް ވާތީ އެކަމަށް ފިޔަވަޅު އެޅުން މުހިއްމު ކަމަށް ވެސް މީކާއީލް ވިދާޅުވިއެވެ. ޗެއާޕާސަންގެ ނައިބު (އިދާރީ) ގެ މަގާމު މިހާރު ފުރުއްވަމުން ގެންދަވާ އިބްރާހީމް ވަހީދު މި ކެމްޕޭނުގެ މުއްދަތަށް އެ މަގާމުގެ މަސްއޫލިއްޔަތުތަކާ ދުރުވުމަށް ވެސް މީކާއިލ ްވަނީ ގޮވާލައްވާފައެވެ. އަދި މި މައްސަލައިގައި ޕާޓީގެ އުސޫލުތަކާއި ކަނޑައެޅިފައިވާ އިޖުރާއަތްތަކާ އެއްގޮތަށް ކުރިއަށް ގެންދެވުމަށް މީކާއިން ވަނީ އެދިވަޑައިގެންފައެވެ. އަދި އެމްޑީޕީގެ ޗެއާޕާސަން ކަމަށް ކުރިމަތިލެއްވީ އެފަދަ ކަންތައްްތައް ތަކުރާރުވިޔަ ނުދޭންކަމަށްވެސް މީކާއިލް ވަނީ ވިދާޅުވެފައެވެ.
މީކާއީލް ވަނީ އެ މައްސަލަ ބަލައި އަވަސް ފިޔަވަޅު އަޅައިދިނުމަށްވެސް އެދިވަޑައިގެންފައެވެ.
އެމްޑީޕީގެ ޗެއަރޕާސަން އިންތިޚާބުގެ ކެމްޕެއިން ފެށި ރައީސް ނަޝީދާއި ރައީސް ޞާލިޙްގެ ފެކްޝަންގެ ކޯޅުން އަލުން ވަނީ ފެށިފައެވެ.
ކިޔުންތެރިންގެ ހިޔާލު