ޓެކްސީ ނަފާ ލޯނު ސްކީމްގެ ދަށުން ނަގާފައިވާ ލޯނުތަކާއި ގުޅޭގޮތުންހުރި ކަންބޮޑުވުންތައް އިންސާފުވެރިކަމާއެކު ބަލައި ޙައްލު ހޯއްދަވައިދެއްވާނެކަމަށް ޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު މިއަދު ވިދާޅުވެއްޖެއެވެ.
ވަޒީރު މިހެން ވިދާޅުވީ ޓެކްސީ ނަފާ ލޯނުގެ ކަންބޮޑުވުމާއެކު ވަޒީރަށް އެޑްރެސްކުރައްވައި މީހަކު ސޯޝަލް މީޑިއާގައި ލިޔުއްވި ސިޓީއަކަށް ދެއްވި ޖަވާބުގައެވެ. ވަޒީރު ސަޢީދަށް އެޑްރެސްކޮށް ލިޔެފައިވާ ސިޓީގައި ބުނެފައިވަނީ ޓެކްސީ ނަފާ ލޯނު ސްކީމަކީ ދިވެހި ރައްޔިތުންނަށް، ޚާއްޞަކޮށް ގުރޭޓަރ މާލޭގައި ދިރިއުޅޭ ރައްޔިތުންނަށް، ޓެކްސީ ވިޔަފާރި ފަށައިގަތުމަށް ދޭ ލޯނެއްގެ ގޮތުގައި ތަޢާރަފްކުރެވިގެން ދިޔަ ސްކީމެއްކަމަށެވެ. ނަމަވެސް، ލޯނު ސްކީމްގެ ދަށުން ލިބިފައިވާ ކާރުތައް ރަޖިސްޓަރ ކުރުމުގެ ޢަމަލީ މަސައްކަތް ލަސްވެ، ބައެއް ކާރުތައް ރަޖިސްޓަރ ނުވެ ހުއްޓައި ލޯނުދެއްކުމަށް ލޯނު ދޫކުރި ފަރާތްތަކުން ތަކުރާރުކޮށް ތާއީދު ކުރަމުންދާ ކަމީ، ލޯނު ނެގި ފަރާތްތަކަށް ވަރަށް ބޮޑު ތަކްލީފަކާ ކަންބޮޑުވުންތަކެއް ކުރިމަތިވެފައިވާ ކަމެއްކަމަށެވެ.
ލޯނު ނެގި ފަރާތްތަކަށް ވިޔަފާރިން ލިބެންޖެހޭ ނަފާ ލިބޭނެ ގޮތެއް ނެތި، ލޯނު ދެއްކުމަށް ބާރު ފޯރުވަމުން ދިއުމަކީ ހަމަޔާ ޢަދުލުވެރިކަމާ ޚިލާފު ކަމެއް ކަމަށް ނުދެކޭކަމަށްވެސް މި ސިޓީގައި ބުނެފައިވެއެވެ.
އެ ސިޓީއަށް ޖަވާބުދެއްވަމުން ވަޒީރު ވިދާޅުވީ،އެ ސިޓީގައި ފާހަގަކޮށްފައިވާ ކަންކަން އިންސާފުވެރިކަމާއެކު ބަލައި، ކުރިއަށް ދެވޭނެ އެންމެ އަވަސް މަގުތަކަކާއި ޙައްލުތަކެއް ހޯދަން މަސައްކަތްކޮށްދިނުމަކީ ވަޒީރުގެ އެންމެ އިސް އެއް ވާޖިބު ކަމުގައި ދެކޭކަމަށެވެ. އަދި އެ ސިޓީގައި ފާހަގަކޮށްފައިވާ އެންމެހާ ކަންކަން ބަލައި ދިނުމަށް އެދި ޓްރާންސްޕޯޓްގެ ކަންކަން ބެލެހެއްޓެވުމަށް މަސްއޫލުވެ ތިއްބެވި ބޭފުޅުންނަށް މިހާރު އަންގަވާފައިވާކަމަށް ވަޒީރު ވިދާޅުވިއެވެ. ރައީސް ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ ރައްޔިތުންނާ ވީހައިވެސް ގާތުން ޚިދުމަތްދީ، ރައްޔިތުން އެދޭ މިފަދަ ކަންކަމުގައި އަވަސް ޙައްލެއް ހޯދައި ދިނުމަށް މަސައްކަތްކުރުންކަމަށް ވަޒީރު ވިދާޅުވިއެވެ. އަދި ރައްޔިތުންގެ އަޑު އަބަދުވެސް އަހައިގެން، ރައްޔިތުން ހުށަހަޅާ ކަންކަން ޤާނޫނާއި ޤަވާޢިދުތަކުގެ ތެރެއިން ފަހިކޮށްދިނުމަކީ ރައީސްގެ ވަރަށް މުހިންމު ސިޔާސަތެއްކަމަށވެސް ވަޒީރު ވިދާޅުވިއެވެ.
ކިޔުންތެރިންގެ ހިޔާލު