ބްލެކްމާކެޓުގައި ޑޮލަރު ވިއްކުން ހުއްޓުވުމަށް ސަރުކާރުން އެޅި ފިޔަވާޅުތަކާއެކު ޑޮލަރުގެ އެކްސްޗޭންޖް ރޭޓް ދަށްވަމުންދާކަމަށް އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، އަރޓިފިޝަލީ މެނިޕިއުލޭޓްކޮށްގެން ޑޮލަރުގެ އަގު ވަރަށް ބޮޑަށް އުފުލަން އެކަމުގައި އުޅޭ ފަރާތްތަކުން މަސައްކަތްކޮށްފަވާކަމަށެވެ. ބޭރުފައިސާ މާރުކުރުމުގެ ލައިސަންސާއި ހުއްދަތައް އޮތްގޮތާއި ޚިލާފަށް ރަސްމީ ރޭޓުގެ ބޭރުން ފައިސާ މާރުކުރުމުގެ މައްސަލަ އޮތީ ވަރަށް ބޮޑުވެފައިކަމަށާއި، ނަމަވެސް ބޭރު ފައިސާއާއި ގުޅޭ ޤާނޫނަށް ގެނައި ބަދަލުތަކާއި ބްލެކް މާކެޓް ހުއްޓުވުމަށް އެޅި ފިޔަވަޅުތަކާއެކު މިހާރު ބޭރު ފައިސާ ބްލެކް މާކެޓްގައި ބޮޑެތި އަގުގައި ވިއްކާ އަގު ދަށްވަމުންދާކަމަށް ވަޒީރު ވިދާޅުވިއެވެ.
މިހާރު މަޢުލޫމާތު ލިބޭގޮތުން، ސަރުކާރު ހަވާލުވިއިރު ހުރި ރޭޓަށްވުރެ ދަށަށް ގޮސްފަވަނީ. ކުރިން ނިމިދިޔަ ސަރުކަރުގައި ހުރި މިންވަތަށް އޭ ރޭޓާ ބޭންޑާ ހަމައަށް ޖެހިއްޖެ. މިއީ ކުރިއެރުމެއް.
Advertisement
އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވިއެވެ.
ވަޒީރު ވިދާޅުވީ، ބައެއް ބޮޑެތި ކުންފުނިން މުސާރަ ދޭއިރުވެސް ބްލެކް މާކެޓް ރޭޓަށް ރިޢާޔަތްކޮށް މުސާރަ ދެމުންދިޔަކަން ހާމަވާކަމަށެވެ. މިކަން ޙައްލުކުރުމަށް ބޭރު ފައިސާގެ އާމްދަނީ ލިބޭ މީހުންނާ ވަރަށް ގާތުން މަސައްކަތް ކުރަމުންދާކަމަށާއި، ސަރުކާރުން މިކުރާ މަސައްކަތް ހުއްޓާނުލާނެކަމުގެ ޔަގީންކަން ވަޒީރު ދެއްވިއެވެ.
މާކެޓުގައި ޑޮލަރު ވިއްކާ ވިޔަފާރިތައް ހުޓުވުމަށް ތަންފީޒީ އިދާރާތަކުން ވަނީ ޚާއްސަ އޮޕަރޭޝަންތަކެއް ފަށާފައެވެ. ބްލެކް މާކެޓުގައި ޑޮލަރު ވިއްކި ބައެއް ތަންތަނުގެ ލައިސަންސް މިހާރު ވަނީ ބާޠިލުކޮށްފައެވެ.
ކިޔުންތެރިންގެ ހިޔާލު