ބައު އުޅަނދުތައް ނައްތާލުމަށް ޤާނޫނުގައި ބަޔާންކުރިނަމަވެސް އެކަންކުރާނީ ބަދަލު ދީފައިކަމަށް ދަތުރުފަތުރާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސަޢީދު ވިދާޅުވީ މާލޭގެ ތޮއްޖެހުން ކުޑަކުރުމަށްޓަކައި މަސައްކަތްތަކެއް ކުރެވެމުންދާކަމަށާއި، ދުވަސްވީ އުޅަނދުތައް މުސްކުޅިކުރުމަކީވެސް އޭގެތެރެއިން ބައެއްކަމަށެވެ.
ދާދިފަހުން އެއްގަމު ދަތުރުފަތުގެ ޤާނޫނަށް ގެނައި އިޞްލާހުގައި ވަނީ އެއްގަމު އުޅަނދު ދުއްވޭނީ އެ އުޅަނދެއް ދުއްވި ތާރީޚުން ފެށިގެން 20 އަހަރު ވަންދެންކަމަށް ބަޔާންކޮށްފައެވެ. އެ މުއްދަތު ހަމަވުމުން އެ އުޅަނދެއްގެ ރަޖިސްޓްރީ ބާޠިލުކުރުމަށާއި އޭގެ ކުރިން އެޅަނދެއްގެ ވެރިފަރާތަށް އެކަމުގެ ނޯޓިސް ފޮނުވުމަށްވެސް ވަނީ ބަޔާންކޮށްފައެވެ.
ވަޒީރު ވިދާޅުވީ މިކަން ކުރާނީ ޤަވާއިދެއްގެ ތެރެއިންކަމަށާއި، އުޅަނދުތައް ނައްތާލާނީ އާންމުނަށް ތަކުލީފަކަށް ނުވާނެގޮތަށްކަމަށެވެ.
މިސާލަކަށް ހައްލުކުރަން ޖެހުނަސް، އެ ވެހިކަލެއްގެ އޭރުގެ އަގު، ކޮންމެވެސް ތާޑް ޕާޓީއަކުން އެސެސްކޮށްފައި ނޫން ގޮތަކަށް އަދި އެއަށް ބަދަލެއް ގެނެސްފައި ގޮތަކަށް އެކަމެއް ނުވެސް ކުރާނެ އޭނައަށް ވެހިކަލެއް ލިބޭ ގޮތަށް ހަދާފައި ނޫނީ.
ވަޒީރު ވިދާޅުވިއެވެ.
އާ ގާނޫނުގައި ބުނެފައިވަނީ، މި ގާނޫނަށް އަމަލުކުރަން ފަށާއިރު ރަޖިސްޓަރީކޮށްފައިވާ އުޅަނދުތަކުގެ ތެރެއިން، އެ އުޅަނދެއް އުފެއްދި ތާރީހުން ފެށިގެން 18 އަހަރާއި 20 އަހަރާ ދެމެދުގެ މުއްދަތެއް ވެފައިވާ އުޅަނދުގެ ރަޖިސްޓަރީ ބާތިލުކުރެވޭނީ، މި ގާނޫނަށް އަމަލުކުރަން ފަށާ ތާރީހުން ތިން އަހަދު ދުވަސް ހަމަވާ ތާރީހުގައެވެ.
ކިޔުންތެރިންގެ ހިޔާލު