ރަޖިސްޓްރީނުކޮށް ރާއްޖޭގައި މެޑިކަލް ކޮލެޖެއް ހިންގާތީ ސަމާލުވުމަށް މިނިސްޓްރީ އޮފް އެޑިޔުކޭޝަން އެންޑް ހަޔާ އެޑިޔުކޭޝަނުން އިލްތިމާސްކޮށްފިއެވެ.
އެ މިނިސްޓްރީން ކޮށްފަވާ އިއުލާނެއްގައި ބުނެފައިވަނީ، “އެސްއޭއެސް މެޑިކަލް ކޮލެޖް”ގެ ނަމުގައި ރާއްޖޭގައި ހިންގާ މެޑިކަލް ކޮލެޖެއްކަމަށް ބުނެ އިޝްތިހާރު ތަކެއް ކުރާކަން މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އެހެންނަމަވެސް އެފަދަ ނަމެއް ކިޔާ މެޑިކަލް ކޮލެޖެއް ރާއްޖޭގައި ރެޖިސްޓްރީ ކޮށްފައި ނެތް ކަމަށް މިނިސްޓްރީން ބުންޏެވެ.
މީގެ އިތުރުން، ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނުގެ 62 ވަނަ މާއްދާގައި ބަޔާންކޮށްފައިވާ ގޮތުން ކޮލެޖެއްގެ ހައިސިއްޔަތު ލިބިގެން ނޫނީ ދިވެހިރާއްޖޭގައި ކޮލެޖެއްގެ ނަމުގައި ތަޢުލީމުދޭ މަރުކަޒެއް ހިންގުމަކީ ކުށެއް ކަމަށާއި، އަދި އެ ޤާނޫނުގެ 64 ވަނަ މާއްދާގައި ބަޔާންކޮށްފައިވާ ގޮތުން އެ ޤާނޫނުގެ ދަށުން ރަޖިސްޓަރީކޮށްފައިވާ މަތީ ތަޢުލީމުދޭ މަރުކަޒަކުން މެނުވީ ޔުނިވާސިޓީއެއް، ކޮލެޖެއް ނުވަތަ އިންސްޓިޓިއުޓެއް ކަމަށް އެއްވެސް ފަރާތަކުން އިޝްތިހާރުކުރުމަކީ ވެސް ކުށެއް ކަމަށް އެ މިނިސްޓްރީގެ އިއުލާނުގައި ބުނެފައިވެއެވެ.
ކިޔުންތެރިންގެ ހިޔާލު