ހަނގުރާމަ ހުއްޓާލުމަށް އީރާނާއެކު ވެފައިވާ އެއްބަސްވުމުގެ މުއްދަތު، އެމެރިކާގެ ރައީސް ޑޮނަލްޑް ޓްރަމްޕް އިތުރުކޮށްފިއެވެ.

އެމެރިކާގެ ރައީސް މިކަން އިއުލާންކޮށްފައިވަނީ އޭނާގެ އަމިއްލަ ޓުރުތު ސޯޝަލްގައި ޕޯސްޓްކުރި މެސެޖެއްގައެވެ.

މެސެޖްގައި ޓްރަމްޕް މަސައްކަތް ކޮށްފައިވަނީ، އީރާނުގެ ވެރިކަމުގައި ރެނދުލާފައިވާކަން ދުނިޔެއަށް ދެއްކުމަށެވެ.

ޓްރަމްޕްގެ މެސެޖްގައި ބުނެފައިވަނީ، އީރާނުގެ ސަރުކާރުގައި ވަރަށް ބޮޑަށް “ރެނދުލައި” ފަޅައިގެން ގޮސްފައިވާ ކަމަށާއި، ހަނގުރާމަ ހުއްޓާލުމުގެ އެއްބަސްވުމުގެ މުއްދަތު އޭނާ އިތުރުކުރީ އެކަމުގެ މައްޗަށް ރިއާޔަތްކޮށް ކަމަށެވެ.

ހަނގުރާމަ ހުއްޓާލުމުގެ އެއްބަސްވުމުގެ މުއްދަތު އެމެރިކާއިން އިތުރު ކުރީ، ޕާކިސްތާނުގެ ބޮޑުވަޒީރު ޝަހްބާޒް ޝަރީފާއި، ޕާކިސްތާނު ސިފައިންގެ ވެރިޔާ ފީލްޑް މާޝަލް އާސިމް މުނީރުގެ އެދިވަޑައި ގަތުމަށް ކަމަށްވެސް އެމެރިކާގެ ރައީސް ބުނެފައި ވެއެވެ.

އަދި މުއްދަތު އިތުރުކުރެވުނީ، އީރާނުގެ ލީޑަރުންނާއި މަންދޫބުންގެ ފަރާތުން އެއްބައިވަންތަ ހުށަހެޅުމެއް ހުށަހަޅަންދެން ކަމަށްވެސް ބުނެފައި ވެއެވެ.

އީރާނުގެ ފަރާތުން ހުށަހެޅުމެއް ހުށަހަޅަންދެން، އީރާނަށް ދަތުރުކުރާ ތެޔޮ ޓޭންކަރުތަކާއި، އާގުބޯޓާއި އަދި އީރާނުން ފުރައިގެންދާ ތެޔޮ ޓޭންކަރުތަކާއި އާގުބޯޓުފަހަރު ބްލޮކް ކުރުމަށް އެމެރިކާ ސިފައިން ކުރަމުންދާ މަސައްކަތްތައް ހުއްޓާނުލާ ކުރިއަށް ގެންދިއުމަށް އަންގާފައިވާނޭ ކަމަށްވެސް، އެމެރިކާގެ ރައީސް ޑޮނަލްޑް ޓްރަމްޕްގެ މެސެޖްގައި ބުނެފައި ވެއެވެ.

ހަނގުރާމަ ހުއްޓާލުމަށް އީރާނާއި އެމެރިކާއާ ދެމެދު ވެފައިވާ ދެ ހަފްތާގެ އެއްބަސްވުމުގެ މުއްދަތު ހަމަވާނީ ރާއްޖޭ ގަޑިން ބުދަ ދުވަހުގެރޭ މެންދަމުއެވެ.

އީރާނާއި އެމެރިކާއާ ދެމެދު އިސްލާމްއާބާދުގައި އެއްބުރުގެ ވާހަކަތައް ބޭއްވި ނަމަވެސް، ދެވަނަ ބުރުގެ ވާހަކަތަށް ދިއުމަށް އީރާނުންވަނީ ދެކޮޅު ހަދާފައެވެ.

ދެވަނަ ބުރުގެ ވާހަކަތަކަށް ދިއުމަށް އީރާނުން ދެކޮޅު ހެދީ، އީރާނުން ހޮރްމޫޒު ކަނޑުއޮޅި ވިޔަފާރި އުޅަނދުފަހަރަށް އެއްކޮށް ހުޅުވާލުމުންވެސް އެމެރިކާއިން އީރާނުގެ އުޅަނދުފަހަރަށް ހުރަސްއެޅުން ހުއްޓާނުލުމުންނެވެ.