ކުރިއަށް އޮތް ބުރާސްފަތި ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށާއި، އޭގެ ފަހުން ވެސް ވިއްސާރަ ކުރިއަށްދާނެ ކަމަށް މޫސުމާ ބެހޭ ގައުމީ އިދާރާ އިން ލަފާކޮށްފިއެވެ.

މިއީ އާންމުކޮށް ރާއްޖެއަށް އެންމެ ހޫނުގަދަ ދުވަސްވަރު ނަމަވެސް، މިހާރު ކުރަމުންދާ ވިއްސާރައަކީ މި ސަރަހައްދުގައި އުފެދިފައިވާ ބޯ ވިލާގަނޑެއްގެ ސަބަބުން ކުރާ ވިއްސާރައެކެވެ. ވިއްސާރަވި ނަމަވެސް، އިހުސާސްކުރެވޭ ހޫނުމިން މަތިކޮށް ހުންނާނެ ކަމަށް މެޓް އޮފީހުން ލަފާކުރެއެވެ.

މިއަދު ރާއްޖޭގެ އެކި ސަރަހައްދުތަކަށް ވިއްސާރަކޮށް ގުގުރުން އެކަށީގެންވެއެވެ. ބައެއް ރަށްތަކަށް ބޯކޮށް ވާރޭ ވެހޭނެ ކަމަށް ލަފާކުރެވެއެވެ. ދެކުނުގެ ބައެއް އަތޮޅުތަކަށް ވިއްސާރަކޮށް ގުގުރުން އެކަށީގެންވެއެވެ.

ހުޅަނގާއި ހުޅަނގު އުތުރުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެއެވެ. ހުޅަނގު ދެކުނާއި ހުޅަނގުން ގަޑިއަކު 7 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެއެވެ. ވިލާގަނޑުގައި ގަޑިއަކު 30 މޭލަށް ވައި ގަދަވުން އެކަށީގެންވެއެވެ.

ކަނޑުތައް އާންމުގޮތެއްގައި އާދައިގެ ވަރަކަށް މަޑުވި ނަމަވެސް، ވިލާގަނޑުގައި ގަދަވާނެއެވެ. ރާޅުގެ އުސްމިން ހުންނާނީ މެދުތެރެއާއި ދެކުނުގެ ސަރަހައްދުތަކުގައި 2 ފޫޓާއި 5 ފޫޓާ ދެމެދުގައެވެ.