ރައްޔިތުން ވޯޓުދޭ ގޮތަކަށް ބަލައިގެން ސަރުކާރުން ޚިދުމަތްތައް ފޯރުކޮށްނުދޭނެ ކަމަށާއި، އިންތިޚާބުތަކުގެ ނަތީޖާ ކޮންމެ ގޮތަކަށް އައި ނަމަވެސް ހުރިހާ ރަށެއްގައި ވެސް ތަރައްގީގެ މަޝްރޫއުތައް މެދުކެނޑުމެއްނެތި ކުރިއަށްދާނެ ކަމުގެ ޔަގީންކަން ހައުސިންގ، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. ޢަބްދުﷲ މުއްޠަލިބު ދެއްވައިފިއެވެ.
މިނިސްޓަރު މި ޔަގީންކަން ދެއްވީ މިއަދު އޮތް ރައްޔިތުންގެ މަޖިލީހުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބުދެއްވަމުންނެވެ.
މި މަހު ބޭއްވި ލޯކަލް ކައުންސިލް އިންތިޚާބުގައި އިދިކޮޅު ކެންޑިޑޭޓުން ގޮނޑިތައް ކާމިޔާބުކުރި ރަށްތަކުގައި މަޝްރޫއުތައް ހުއްޓޭނެ ކަމަށް ބުނެ ދެކެވޭ ވާހަކަތައް މިނިސްޓަރު ދޮގުކުރެއްވިއެވެ. ސަރުކާރުގެ އެންމެ އިސް އަމާޒަކީ ރައްޔިތުންގެ ބޭނުންތައް ފުއްދައިދިނުން ކަމަށް އޭނާ ވިދާޅުވިއެވެ.
ތ. ގާދިއްފުށީގެ ބިން ހިއްކުމުގެ މަޝްރޫއު ހުއްޓާލާފައިވާ ކަމަށް ބުނެ ދެކެވޭ ވާހަކަތަކަކީ ހަގީގަތެއް ނޫން ކަމަށާއި، އެ މަސައްކަތް މިހާރު ވެސް ބާރުމިނުގައި ކުރިއަށްދާކަން މިނިސްޓަރު ކަށަވަރުކޮށްދެއްވިއެވެ.
“ސަރުކާރުގެ ފަލްސަފާއަކީ ރައްޔިތުން ވޯޓުދޭ ގޮތަށް ބަލައިގެން ޚިދުމަތް ދިނުމެއް ނޫން. ވައުދެއް ވެފައިވާނަމަ، އެކަން އަޅުގަނޑުމެން ފުރިހަމަކުރާނަން،” މިނިސްޓަރު ވިދާޅުވިއެވެ.
ބައެއް މަޝްރޫއުތައް ލަސްވަނީ ކައުންސިލްތަކުގެ އެއްބާރުލުން ނުލިބުމުގެ ސަބަބުން ކަމަށް މިނިސްޓަރު ފާހަގަކުރެއްވިއެވެ. މިސާލެއްގެ ގޮތުން މާލޭގެ ބޭރު މަގުތައް ހެދުމުގެ މަޝްރޫއާއި އާ މާރުކޭޓުގެ މަސައްކަތް ލަސްވަނީ މާލެ ސިޓީ ކައުންސިލްގެ ފަރާތުން ބޭނުންވާ އެއްބާރުލުން އެންމެ ފުރިހަމައަށް ނުލިބޭތީ ކަމަށް އޭނާ ވިދާޅުވިއެވެ.
މިނިސްޓަރު މުއްޠަލިބު ވަނީ ރައްޔިތުންނަށް ދޭންޖެހޭ ޚިދުމަތްތައް އަވަސްކުރުމަށްޓަކައި، ސިޔާސީ ފިކުރަށް ބެލުމެއް ނެތި ހުރިހާ ކައުންސިލްތަކަކުން ވެސް ސަރުކާރާއެކު ގުޅިގެން މަސައްކަތް ކުރުމަށް އިލްތިމާސް ކުރައްވާފައެވެ.
ކިޔުންތެރިންގެ ހިޔާލު