މަރުގެ އަދަބު ތަންފީޒުކުރުމާ ބެހޭ ހާއްސަ ބިލެއް މަޖިލީހަށް ހުށަހެޅުމުގެ މަސައްކަތް ސަރުކާރުން ކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ މަރުގެ އަދަބު ދިނުމުގައި އަމަލުކުރާނެ ގޮތްތައް އުސޫލެއްގައި ލިޔެފައި ބޭއްވުމަކީ އެންމެ ރަނގަޅުގޮތެއް ނޫން ކަމަށެވެ.
އެހެންކަމުން އެކަމަށްޓަކައި ޚާއްސަ ގާނޫނެއް ވުޖޫދުކުރުމަށްޓަކައި އެކަމާ ގުޅޭ ބިލެއް މަޖިލީހަށް ހުށަހެޅުމުގެ މަސައްކަތް ބަންޑާރަނައިބުގެ އޮފީހުން ކުރަމުން އަންނަ ކަމަށެވެ.
ރައީސް ވިދާޅުވީ ޝަރުއީ ކޯޓަކުން މީހެއްގެ މައްޗަށް މަރުގެ ހުކުމް އިއްވުމުން އެ ހުކުމް ތަންފީޒުނުކޮށް ބޭއްވުމަކީ ދައުލަތުގެ އެންމެ މަތީވެރިޔާއަށް އޮތް ޗޮއިސްއެއް ނޫން ކަމަށެވެ. އަދި އެ ގާނޫނު ވުޖޫދުވުމާއެކު މަރުގެ ހުކުމް އިއްވާފައިވާ މައްސަލަތަކުގައި ޝަރުއީ ހުރިހާ މަރުހަލާތަކެއް ނިމިފައިވާ ފަރާތްތަކަށް އެ ހުކުމް ތަންފީޒުކުރައްވާނެ ކަމަށް ރައީސް ވިދާޅުވިއެވެ.
މަސްތުވާތަކެތި ރާއްޖެ އެތެރެކުރާ ފަރާތްތަކަށް މަރުގެ އަދަބު ދިނުމަށް ދާދިފަހުން މަޖިލީހުން ވަނީ މަސްތުވާތަކެއްޗާ ބެހޭ ގާނޫނު އިސްލާހުކޮށްފައެވެ.
ކިޔުންތެރިންގެ ހިޔާލު