ޣައްޒާއަށް އަނެއްކާވެސް ޙަމާލާ ދިނުމަށް އިސްރާޢީލުގެ ސިފައިން ފުރިހަމައަށް ތައްޔާރުވެފައިވާ ކަމަށް އިސްރާޢީލުން ބުނެފިއެވެ.
ނިރުބަވެރި އިސްރާއީލް ސިފައިންގެ ޗީފް އޮފް ސްޓާފް އިޔާލް ޒަމީރު ހުކުރު ދުވަހު ބުނީ، ޣައްޒާގައި މިހާރު ކުރިއަށްދާ ދިފާއީ މަސައްކަތްތައް ފުރިހަމަ ހަމަލާތަކަކަށް ބަދަލުކޮށްލުމަށް ސިފައިން ފުރިހަމައަށް ތައްޔާރުވެފައިވާ ކަމަށެވެ. އަދި ހަނގުރާމައިގެ މައިދާނުގައި ކުރިމަތިވާ ކޮންމެ ހުރަހަކަށް ވަރުގަދަ އަސްކަރީ ރައްދުތަކެއް ދީ، އިދިކޮޅު ބާރުތަކުގެ ގާބިލުކަން ނައްތާލާނެ ކަމަށް އޭނާ ބުންޏެވެ.
ޒަމީރު ފާހަގަކުރި ގޮތުގައި ޣައްޒާގައި ހިންގާ ހުރިހާ އަސްކަރީ އޮޕަރޭޝަންތަކަކީ ސިޔާސީ ލީޑަޝިޕްގެ ސީދާ އިރުޝާދުގެ ދަށުން ކުރިއަށްދާ ކަންކަމެވެ. ބައިނަލްއަގުވާމީ ގޮތުން އިންޒާރުތައް ލިބެމުންދިޔަ ނަމަވެސް، އަމުރު ލިބުމާއެކު ވަރުގަދަ ހަމަލާތައް ދިނުމަށް ނިރުބަވެރި ޔަހޫދީ ސިފައިން ތިބީ ތައްޔާރަށް ކަމަށް އޭނާ ބުންޏެވެ.
މި ހަނގުރާމައިގެ މައިގަނޑު މަގްސަދަކީ ހަމާސްގެ އަސްކަރީ ގާބިލުކަން ނައްތާލުމާއި ޣައްޒާ ހަތިޔާރުން ސަލާމަތްކުރުން ކަމަށް އޭނާ ތަކުރާރުކޮށް ބުންޏެވެ. އަދި އިސްރާއީލުގެ ރަށްތަކަށް އޮތް ސަލާމަތީ ނުރައްކާތައް ނައްތާލުމަކީ އެއްވެސް ދޫދިނުމެއް ނެތް ކަމެއް ކަމަށާއި، އެކަން ހާސިލުވުމުގެ ކުރިން ހަމަލާތައް ހުއްޓާނުލާނެ ކަމަށް އޭނާ ބުންޏެވެ.
އަނިޔާވެރި އިސްރާއީލުގެ އަސްކަރިއްޔާއިން ބުނާ ގޮތުގައި، ސަލާމަތީ ގޮތުން ހަމަޖެހުން ގާއިމުކުރެވެންދެން ޣައްޒާގެ ހަނގުރާމަ މެދުނުކެނޑި ކުރިއަށްދާނެއެވެ. އަދި ކޮންމެ ވަގުތެއްގައިވެސް ކުރިމަތިލުންތައް ވަރުގަދަ ކުރަން ޖެހިއްޖެ ހާލަތެއްގައި އެކަމަށް ސިފައިން ތިބީ ތައްޔާރުވެގެން ކަމަށް ޒަމީރު ބުންޏެވެ.
ކިޔުންތެރިންގެ ހިޔާލު