ޣައްޒާގެ ކޮންމެ ތުއްތުކުއްޖަކީ އިސްރާއީލުގެ ދުޝްމަނެއް ކަމަށާއި، ޣައްޒާގައި އެންމެ ކުއްޖަކުވެސް ހުރެގެން ނުވާނޭ ކަމަށް، ޒަޔަނިސްޓު އިސްރާއީލުގެ ކަނާތުފިޔައިގެ ހަރުކަށި ފިކުރުގެ މޯޝޭ ފޭލިން ބުނެފިއެވެ.
އޭނާއަކީ އިސްރާއީލު ޕާލަމެންޓު، ކްނެސެޓްގެ ކުރީގެ މެމްބަރެކެވެ.
އިސްރާއީލުގެ ޗެނަލް14 ޓީވީގައި ވާހަކަ ދައްކަމުން މޯޝޭ ބުނީ، ބަނޑުގައި އޮތަސް، ޅަޔަސް، ކުޑަކުއްޖަކަސް، ޣައްޒާގެ ކޮންމެ ކުއްޖަކީ އިސްރާއީލުގެ ދުޝްމަނެއް ކަމަށެވެ.
އޭނާ މިހެން ބުނެފައިވަނީ، ހޮބީއެއްގެގޮތުގައި ކުޑަކުދިން ނުމަރާނެ ކަމަށް، އިސްރާއީލު ޕާލަމެންޓް މެމްބަރެއް ކަމަށްވާ ޔައިރް ގޯލާން ބުނުމާ ގުޅިގެން އޭނާއަށް ރައްދުދެމުންނެވެ.
ޔައިރް ގޯލާންއަކީ އިސްރާއީލުގެ އިދިކޮޅު ޑިމޮކްރަޓިކް ޕާޓީގެ ލީޑަރެވެ.
އިސްރާއީލުގެ ރަސްމީ ޓީވީ، ކާންއަށް ދިން އިންޓަރވިއުއެއްގައި ޔައިރް ގޯލާން ބުނީ، ވިސްނުންތެރި ބުއްދިވެރި ގައުމަކުން ހޮބީއެއްގެގޮތުގައި ކުޑަކުދިން ނުމަރާނެ ކަމަށާއި، އާންމުންނާ ދެކޮޅަށް ހަނގުރާމައެއް ނުކުރާނެ ކަމަށާއި، ތަނެއްގައި ދިރިއުޅެމުންދާ އާބާދީއެއް އެމީހުންގެ ބިމުން ބޭރުކޮށްނުލާނެ ކަމަށެވެ.
ޔައިރް ބުނީ، އިސްރާއީލުގައި މިހާރު މިއޮތް ސަރުކާރަކީ އެއްވެސް އަޚްލާގެއް ނެތް އަދި ކާރިޘާއެއްގެ ދަނޑިވަޅެއްގައި ގައުމެއް ހިންގުމުގެ ގާބިލްކަމެއްނެތް، ބަދަލުހިފުމުގެ ރޫހުގައި ޖެހިފައިވާ ސަރުކާރެއް ކަމަށެވެ.
މި ސަރުކާރުގެ އަމަލުތައް ހުރިގޮތުން، އިސްރާއީލުގެ ދެމިއޮތުމަށް ނުރައްކާވެފައިވާ ކަމަށްވެސް ޔައިރް ގޯލާން ބުނެފައި ވެއެވެ.
ޔައިރް ގޯލާންއަށް ރައްދު ދެމުން މޯޝޭ ފޭލިން ބުނީ، ޣައްޒާގެ ކޮންމެ ތުއްތު ކުއްޖަކީ އިސްރާއީލުގެ ދުޝްމަނެއް ކަމަށެވެ. އިސްރާއީލުން ޣައްޒާ “ފަތަހަކޮށް” އެތަނުގައި ވަޒަންވެރިވާންޖެހޭ ކަމަށެވެ. އަދި ޣައްޒާގެ އެންމެ ކުއްޖަކުވެސް ޣައްޒާގައި ހުރެގެން ނުވާނެ ކަމަށް އޭނާ ބުނެފައި ވެއެވެ.
ޣައްޒާއިން ހުރިހާ ކުޑަކުދިން ބޭރުކޮށް، ޣައްޒާ ހުސްކޮށްލައިގެންނޫނީ، ޣައްޒާގެ މައްޗަށް ކާމިޔާބު ހޯދޭނެ އެހެން ގޮތެއް ނެތްކަމަށްވެސް މޯޝޭ ބުނެފައި ވެއެވެ.
ޒަޔަނިސްޓު އިސްރާއީލުން ޣައްޒާއަށް ދެމުންގންދާ ހަމަލާތައް އިތުރަށް ފުޅާކޮށްފައި ވާއިރު، މިހާރު މުޅިންވެސް ހަމަލާދެނީ ކުޑަކުދިންނާއި، އަންހެނުންނަށެވެ.
ކުޑަކުދިންނާއެކު އާއިލާތައް ގޭގައި ނުވަތަ ޓެންޓުތަކުގައި ނިދަން ތިބޭ ވަގުތާ ދިމާކޮށް މިސައިލުން ހަމަލާ ދީގެންނާއި، ބޮންއަޅައިގެން ގެންދަނީ އާއިލާތައް އެކުގައި ނައްތާލަމުންނެވެ.
އިސްރާއީލު ސިފައިންގެ މިހާރުގެ މިޝަންއަކީވެސް ކުޑަކުދިން މެރުން ކަމަށް ރިޕޯޓްތައް ބުނެއެވެ. އެއީ، ޣައްޒާގެ މާދަމާގެ މުސްތަގްބަލް ކަމުގައިވާ ކުޑަކުދިން ނައްތާލުމެވެ. މާބަނޑު މީހުންނާއި، އަންހެނުން މަރަނީ ދަރިން ވިހެއުމަށް ހުރަސްއެޅުމުގެ ގޮތުންނެވެ.
ޒަޔަނިސްޓު އިސްރާއީލުން ޣައްޒާގައި މިހާރު ފަށައިގެންއުޅޭ އުދުވާނުގެ މައިގަނޑު މަގްސަދަކީ، ޣައްޒާގެ އެންމެން މަރައި ނުވަތަ ވަޒަނުން ބޭރުކޮށް، ޣައްޒާގެ މައްޗަށް ވެރިވެގަތުމެވެ.
ކިޔުންތެރިންގެ ހިޔާލު