މާލޭގެ ރައްޔިތުންނަށް މިދިޔަ ސަރުކާރުން ގޯތި ދީފައިވާ ހުޅުމާލެ ފޭސް ތިނެއް ހިއްކުމުގެ މަސައްކަތް ނިންމާލައިފިއެވެ.

ހުޅުމާލެ ފޭސް ތިނެއް ހިއްކީ އެމްއޭސީއެލްއާ ހަވާލުކޮށްގެންނެވެ. އެފަޅު ހިއްކަން ގެނައީ ދުނިޔޭގެ އެންމެ ބޮޑެތި ޑްރެޖަރުތަކުގެ ތެރެއިން ޑްރެޖަރުތަކެވެ. އެ ޑްރެޖަރުތަކަކީ އެއް ފަހަރާ 22،000 ކިއުބިކް މީޓަރުގެ ވެލި ނެގުމުގެ ކެޕޭސިޓީ ހުރި ޑްރެޖަރު ކަމަށްވާ ޕްރިންސް ދަ ނެދަލޭންޑެން އަދި އޮރެންޖް އިންނެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތްއިރު، ހުޅުމާލެ ތިން ވަނަ ފިޔަވަހީގައި ހިއްކާފައި އޮތީ ވަރަށް ކުޑަ ސަރަހައްދެކެވެ. އެ ތަނުގައި 100 އެއްހާ ގޯތި ދެވޭ ވަރަށް ވެސް ބިން ހިއްކާފައި ނެތެވެ. ހުޅުމާލެ 3 އިން އޭރު ދޭން ނިންމާފައި އޮތީ 698 ގޯއްޗެވެ.

މި ސަރުކާރުން މިހާރު އެ ވަނީ އެ ފަޅު ހިއްކައި ނިންމާލާފައެވެ.

ޕީއެންސީގެ ކެމްޕެއިން ހަރަކާތެއްގައި މިއަދު ވާހަކަފުޅުދައްކަވަމުން ރައީސް ވިދާޅުވީ، މިދިޔަ ސަރުކާރުން ކަނޑު ފަޅުން ދިން ގޯތިތައް ހިއްކައި ނިންމައި، ހަވާލު ކުުރުމުގެ މަސައްކަތް ހަލުވިކަމާއެކު ކުރިއަށްދާ ކަމަށެވެ. އަދި ހުޅުމާލެ ތިން ވަނަ ފިޔަވަހި ހިއްކާ ނިމިފައިވާ ކަން ވެސް ރައީސް އިއުލާން ކުރެއްވިއެވެ.

“ހުޅުމާލޭގެ ތިން ވަނަ ފިޔަވަހި އޮތީ ހިއްކާ ނިމިފައި މިހާރު، ގިރާވަރުފަޅު، ގުޅީފަޅުން ގޯތިތައް ދީ ނިމި ގޯތިތައް ހަވާލު ކުރުމުގެ މަސައްކަތްވެސް ކުރިއަށް ދާނެ، ގިރާވަރުފަޅު ހިއްކުމުގެ މަސައްކަތް ފަށަން ތައްޔާރުވެ، ދެ ޑެރަޖަރު އޮތީ އެތަނުގެ ކައިރީގައި،”. ރައީސް ވިދާޅުވިއެވެ.