ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއަށް ހިޔާނާތްތެރިވެ، އެ ފައިސާ ލޯންޑާކުރި މައްސަލާގައި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އިތުރު 23 އަހަރަށް ޖަލަށްލާން ހުކުމްކޮށްފިއެވެ.

ހިޔާނާތާއި މަނީ ލޯންޑްރިންގެ ކުށުގައި މީގެކުރިން ބައްސާމަށް ވަނީ ނުވަ އަހަރުގެ ޖަލު ހުކުމެއް އިއްވާފައެވެ.

މިފަހަރު ބައްސާމަށް ހުކުމް ކުރީ އެފްއޭއެމަށް ފީފާއިން ފޮނުވި 1.2 މިލިއަން ޑޮލަރަށް  އޭނާ ހިޔާނާތްތެރިވެފައިވާތީއެވެ.

އިޝްތިހާރު އިޝްތިހާރު

ކޮވިޑް-19 ރިލީފް ލޯނެއްގެ ގޮތުގައި ލިބުނު އެ ފައިސާ ބައްސާމް ބޭނުން ކޮށްފައިވަނީ އަމިން އެވެނިއުގެ ދެ ޕެންޓްހައުސެއް ގަތުމަށެވެ. އެއީ ޑޮލަރު މާރުކުރަން ކަމަށް ބުނެ އެފްއޭއެމްއިން ފައިސާ ނެރުމަށްފަހު އެ ފައިސާ އެޕާޓްމެންޓް ގަތުމަށް އަމިން ކުންފުންޏަށް ދީގެންނެވެ.

އެ މައްސަލާގައި ބައްސާމްގެ މައްޗަށް ހިޔާނާތުގެ ދައުވާ އާއި މަނީ ލޯންޑްރިންގެ ދައުވާ ކުރިއިރު, އަމިން ކުންފުނީގެ މައްޗަށް މަނީ ލޯންޑްރިންގެ ދައުވާ ވެސް ކުރި އެވެ. ނަމަވެސް ކްރިމިނަލް ކޯޓުން މިއަދު ނިންމީ އަމިން ކޮންސްޓްރަކްޝަންގެ މައްޗަށް އެ ކުށް ސާބިތުނުވާ ކަމަށެވެ.

ބައްސާމްގެ މައްޗަށް ހިޔާނާތުގެ ކުށުގައި އަށް އަހަރުގެ ޖަލު ހުކުމެއް އިއްވިއިރު, މަނީ ލޯންޑްރިންގެ ކުށުގައި 15 އަހަރުގެ ޖަލު ހުކުމެއް ވެސް އިއްވި އެވެ. އަދި ލޯންޑާކުރި ފައިސާގެ އަދަދު ފަސް ގުނަ އަދަދު ކަމަށްވާ 44.7 މިލިއަން ރުފިޔާއިން އޭނާ ޖޫރިމަނާ ކުރަން ކޯޓުން ހުކުމް ކުރިއެވެ.

މީގެ އިތުރުން އެފްއޭއެމްއިން ނެރުނު 1.2 މިލިއަން ޑޮލަރަކީ އެފްއޭއެމްއަށް ލިބެން ޖެހޭ ފައިސާއެއް ކަމަށް ކަނޑައަޅައި، އެ ފައިސާ ހަ މަސް ދުވަހުގެ ތެރޭގައި ސިވިލް ކޯޓަށް ދައްކާ ހަލާސްކުރަން ބައްސާމްގެ މައްޗަށް އަމުރުކޮށްފައިވެ އެވެ.