މިދިޔަ އަހަރުގެ 12 ޑިސެމްބަރުގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމެންޓު މިނިސްޓްރީ ހިންގި އިމާރަތްތަކުގައި ހިނގި އަލިފާނުގެ ހާދިސާގައި މިނިސްޓްރީތަކުގެ މަސައްކަތަށް ބުރޫ އެރުމާ ގުޅިގެން، ޗައިނާ އިން ރާއްޖެއަށް އެހީގެ ސާމާނު މިއަދު ހަދިޔާކޮށްފި އެވެ.

ފިނޭންސް މިނިސްޓްރީގައި މިއަދު ބޭއްވި ރަސްމިއްޔާތެއްގައި، ޗައިނާގެ ފަރާތުން ރާއްޖެއަށް ދިން އެހީގެ ސާމާނާ ރަމްޒީ ގޮތުން ހަވާލުވެވަޑައިގެން، ފިނޭންސް މިނިސްޓަރު މޫސާ ޒަމީރު ވަނީ ޗައިނާ ސަރުކާރުން ދިން އެހީއަށް ޝުކުރު އަދާކުރައްވާއެވެ.

އެހީގެ ގޮތުގައި ޗައިނާ އިން ވަނީ 2.8 މިލިއަން ޑޮލަރުގެ އަގުހުރި ސާމާނު ހަދިޔާކޮށްފައެވެ. އޭގެ ތެރޭގައި، އެ ހާދިސާގައި ގެއްލުނު ތަކެތީގެ ބަދަލުގައި ބޭނުންވާ އޮފީސް ސާމާނާއި ފަރުނީޗަރު ހިމެނެއެވެ. އެހީ ހަވާލުކުރުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ޒަމީރު ވިދާޅުވީ ޗައިނާ އިން ދިން އެހީއަކީ ދެ ގައުމުގެ ދެމެދު އޮންނަ ގާތް ގުޅުން ރަމްޒުކޮށްދޭ ކަމެއް ކަމަށެވެ.

އެކި ދާއިރާތަކުން ރާއްޖޭގެ ގާބިލުކަން އިތުރުކުރުމަށް ޗައިނާ ސަރުކާރުން ދެމުން އަންނަ އެއްބާރުލުން ފާހަގަކުރައްވައި މިނިސްޓަރު ޒަމީރު ޝުކުރު އަދާކުރެއްވިއެވެ.