ގްލޯބަލް ސުމޫދް ފްލޮޓިލާ އަށް ހަމަލާ ދިނުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުށްވެރިކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ ބައިނަލްއަގުވާމީ ކަނޑުގެ ސަރަހައްދުގައި ދަތުރުކުރަމުންދިޔަ “ގްލޯބަލް ސުމޫދް ފްލޮޓިލާ” އަށް އިސްރާއީލުން ހަމަލާދިނުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މިފަދަ ޢަމަލުތަކަށް ފުރުސަތު ދީގެން ނުވާނެ ކަމަށްވެސް ވިދާޅުވިއެވެ.
“އަސާސީ ޙައްޤުތަކާއި އަސާސީ ބޭނުންތަކުން މަޙްރޫމްވެފައިވާ ރައްޔިތުންނަށް އެހީ ފޯރުކޮށްދިނުމަށް ދަތުރުކުރި އުޅަނދުތަކަށް ހަމަލާދިނުމަކީ އިންސާނިއްޔަތަށާއި ބައިނަލްއަޤްވާމީ ޤާނޫނުތަކަށް ކުރެވުނު ބޮޑު އިހާނެތި ޢަމަލެއް” ރައީސް މުއިއްޒު ވިދާޅުވިއެވެ.
އިސްރާއީލުން އިންސާނީ ކަރާމާތަށް އިޙްތިރާމް ނުކުރުމާއި، ރަޙުމްކުޑަ އަނިޔާވެރި ޢަމަލުތައް ހިންގުމުގެ ސަބަބުން، ދުނިޔޭގެ އެހެން ޤައުމުތަކާ އެ ޤައުމު އިތުރަށް އެކަހެރިވަމުންދާ ކަމަށް އެމަނިކުފާނު ވިދާޅުވިއެވެ.
އިސްރާއީލުން ބައިނަލްއަޤްވާމީ ޤާނޫނުތަކާ ޚިލާފަށް ހިންގަމުންދާ ޢަމަލުތަކާ ދެކޮޅަށް ހަރުދަނާ ފިޔަވަޅުތަކެއް އެޅުމަށް ބައިނަލްއަޤްވާމީ މުޖުތަމަޢުއަށް ރައީސުލްޖުމްހޫރިއްޔާ ގޮވާލެއްވިއެވެ.
ފަލަސްޠީނު ރައްޔިތުންގެ އިންސާނީ ޙައްޤުތަކަށާއި، ޢަދުލު އިންސާފަށާއި، ސުލްޙައަށް ކުރާ ހަމަޖެހޭ ނިކަމެތި މަސައްކަތުގައި ދިވެހިރާއްޖެއިން އެ ރައްޔިތުންނާއެކު ސާބިތުކަމާއެކު ދެމިހުންނާނެ ކަމަށްވެސް އެމަނިކުފާނު ވިދާޅުވިއެވެ.
ފަލަސްތީނުގެ ރައްޔިތުންނަށް އިންސާނީ އެހީ ހިފައިގެން 50 އަށްވުރެ ގިނަ ކަނޑުއުޅަނދު އެ ގައުމަށް މިހާރު ދަނީ ދަތުރުކުރަމުންނެވެ. ޔަހޫދީ އިސްރާއީލުން ދަނީ އެ އުޅަނދުތަކަށް ހަމަލާދީ އޭގައި ތިބި ބައެއް މީހުން ރަހީނުކޮށްފައެވެ.
ކިޔުންތެރިންގެ ހިޔާލު